Yoohani 6

ɄYeesu ahubhaliisya abhantu ashile ɨelufu zisaanu

(Mataayo 14:13-21; Maalʉko 6:30-44; Luuka 9:10-17)

Lwa gaashila ɨgo, ʉYeesu ahalobhoha ɨnsʉmbi ɨyɨ Galilaaya, ɨyo itaawa ɨlyɨnjɨ bhahagaga ɨnsʉmbi ɨyɨ Tibeeliya. 2 Ɨmpʉga ɨngoosi ɨya bhantu bhahali bhahumʼmɨnjɨɨlɨla ʉYeesu, pɨpo bhahali bhalolile amayele ɨgo ahali abhomba hwa bhabhinu. 3 Ɨpo ʉYeesu na bhasundwe bhaakwe bhahazʉbha hwi‑igamba limo na‑akhale peeka. 4 Hu habhaazyo ɨho, ɨshikulukulu ɨshɨ Paasaka ɨya Bhayahuudi yahali ɨli mu pɨɨpɨ.

5 ɄYeesu aheenya, ahayilola ɨmpʉga ɨngoosi ɨya bhantu ɨyo yahali ɨhwɨnza hwa mwene. Ɨpo ahamʼmʉzɨɨlɨzya ʉFilipo ahaga, “Wee Filipo, wɨlɨ, tibhajiiye akale hwoshi ɨshalye ɨsha hubhaliisye abhantu bhonti ɨbha?” 6 ɄYeesu ahamʼmʉzɨɨlɨzya ʉFilipo ɨsho huje anʼjele, pɨpo ʉmwene ahali amɨɨnye ɨsho abhala‑abhombe. 7 ɄFilipo ahamʼmwamula ahaga, “Hwope nkashele takalaga ɨshalye huje shila muntu ayambɨɨlɨle hashe lwene, leelo ɨdinaali ɨmya zibhɨɨlɨ saga zibhajiiye akwɨlane.” 8 Ɨpo ʉAnduleeya ʉyo ahali ʉmo mwa bhasundwe bhaala, nantele ʉmwanakwabho ʉSiimoni Peeteli, ahamʼmwamula ʉYeesu ahaga, 9 “Wee Mwɨnɨ, alɨɨho ʉnʼsahaala ʉmo ɨpa wa‑ali nɨ ntogito zisaanu ɨzyɨ ngongiiwe nɨ nswɨ zibhɨɨlɨ ɨndoodo. Leelo wɨlɨ ɨshalye ɨshi shibhajiiye akwɨle ɨmpʉga yonti ɨnɨ?”

10 Ɨpo ʉYeesu ahabhalajizya abhasundwe bhaakwe ahaga, “Bhabhʉʉzyi abhantu bhakhale pa nsi.” Apantu paala pahali na masole aminji, bhonti bhahakhala pa nsi. Mu mpʉga ɨla, bhahalɨɨho abhalume ɨelufu zisaanu. 11 Ɨpo ʉYeesu aheega ɨntogito ziila, ahanʼsalifya ʉNgʉlʉbhɨ, ahamensulanya, ahabhapeela abhantu bhonti ɨbho bhahali paala. Ahabhomba shɨɨsho nɨ nswɨ ziila zibhɨɨlɨ, shila muntu ahalya na‑angute nanshi ɨsho sha‑ahali ahwanza. 12 Abhantu bhonti lwa bhanguta, ʉYeesu ahabhabhʉʉzya abhasundwe bhaakwe ahaga, “Bhʉngaanyi ɨvyalye vyonti ɨvyo visyalile huje vigandi ananjishe.” 13 Ɨpo bhahabhʉngaanya ɨvyalye vyonti ɨvyo vyahasyalile na‑amemye ɨviseje ishʉmi na vibhɨɨlɨ. 14 Abhantu bhaala lwa bhagalola amayele ɨgo ʉYeesu ahabhombile, bhahayanga bhahaga, “Lyoli ʉmuntu ʉnʉ nʼkuwi wa Ngʉlʉbhɨ ʉyo tahasʉbhɨɨye huje ahayɨnza mu nsi ʉmu.” 15 ɄYeesu ahamanya huje abhantu bhaala bhahwanza hunʼkhate hwi‑ikhone huje bhamʼmɨɨshe abhe Mwɨnɨ waabho. Leelo ʉmwene ahasogola, nantele ahabhala mwene hwi‑igamba.

ɄYeesu ajenda pa mwanya pa mɨnzɨ agɨ nsʉmbi

(Mataayo 14:22-33; Maalʉko 6:45-52)

16 Hu habhaazyo aha lyabheela, abhasundwe bha Yeesu bhahiiha abhale hu nsʉmbi ɨyɨ Galilaaya. 17 Bhahatʉʉha mu waato na hwande alobhoshe ɨnsʉmbi abhale hwi‑ibooma ɨlyɨ Kapelenawumu. Ahabhaazyo ɨho hwahali nɨ hiisi, leelo ʉYeesu ahali asɨɨle saga ali peeka na bheene. 18 Ɨnsʉmbi yahanda avwalangane hu nongwa ya‑aje ɨnkʉngʉ ɨhali tee yahali ɨvugula. 19 Abhasundwe bha Yeesu lwa bhajenzya ʉwaato ɨkilomeeta zisaanu awe nʼtanda, bhahanʼnola ʉmuntu ajenda pa mwanya pa mɨnzɨ, ali pa pɨɨpɨ nʉ waato, ɨpo bhahoogopa tee. 20 Leelo ʉYeesu ahabhabhʉʉzya ahaga, “Nɨɨnɨ, mugandi hwogope!” 21 Ɨpo abheene bhahanzaga huje ʉYeesu atʉʉshe mu waato waabho. Nalinaali ʉwaato wahafiha hwi‑isyɨla ɨlyɨnjɨ ʉhwo bhahali bhabhala.

ɄYeesu ntogito ɨyo ɨhubhapeela abhantu ʉwʉʉmi

22 Ɨndaabhɨ yaakwe, ɨmpʉga ɨya bhantu bha bhahasyalile hwi‑isyɨla ɨlyɨnjɨ ɨlyɨ nsʉmbi, bhahamanya huje wahalɨɨho ʉwaato weeka lwene huula. Nantele, bhahamanya huje ʉYeesu saga atʉʉshɨle mu waato peeka na bhasundwe bhaakwe, leelo abhasundwe bhaala bhahabhalile bheene. 23 Abhantu bhamo bhahɨnza nɨ nyaato ɨzyɨnjɨ afume hwi‑ibooma ɨlyɨ Tibeeliya, bhahafiha ɨpo ɨmpʉga ya bhantu bhahaliiye ɨntogito, hu habhaazyo ɨho ʉYeesu ahanʼsalifiizye ʉNgʉlʉbhɨ. 24 Ɨpo ɨmpʉga ya bhantu bhaala bhahamanya huje ʉYeesu na bhasundwe bhaakwe saga bhalɨɨho paala, bhahatʉʉha mu nyaato ziila na‑abhale mwi‑ibooma ɨlyɨ Kapelenawumu humʼmwanze ʉYeesu.

25 Abhantu bhaala lwa bhamʼmwaga ʉYeesu hwi‑isyɨla ɨlyɨnjɨ ɨlyɨ nsʉmbi, bhahamʼmʉzɨɨlɨzya bhahaga, “Wee Mʼmanyizyi, wɨlɨ, ʉyɨnzɨle ndi ʉhwu?” 26 ɄYeesu ahabhaamula ahaga, “Lyoli ɨhubhabhʉʉzya, ɨmɨɨnye huje saga muhunanza hu nongwa ya huje mwahagagɨɨnye amayele ɨgo nahabhombile, leelo muhunanza hu nongwa ya huje nahabhapiiye ɨntogito, mwahalya na‑angute. 27 Mugandi hushibhombele ɨmbombo ɨshalye ɨsho shinanjiha, leelo mubhanje mubhomba hu nongwa yɨ vyalye ɨvyo saga vinanjiha, ɨvyo vihubhapeela abhantu ʉwʉʉmi ʉwa wiila. Anɨ nɨMwana wa Muntu ɨhubhapeela abhantu ɨvyalye ɨvyo, pɨpo ʉDaada ʉNgʉlʉbhɨ ampiiye ikhone ɨlya‑abhombe ɨgo.”

28 Ɨpo abheene bhahamʼmʉzɨɨlɨzya bhahaga, “Wɨlɨ, tibhombe lyenu huje tibhanje tibhomba ɨmbombo ɨzyo ʉNgʉlʉbhɨ ahwanza?” 29 ɄYeesu ahabhaamula ahaga, “Ɨmbombo ɨyo ʉNgʉlʉbhɨ ahwanza mubhombaje ya yɨɨnɨ, munɨɨtɨshe anɨ, ʉyo ɨnsonteleziiwe nʉ Ngʉlʉbhɨ.” 30 Bhahamʼmʉzɨɨlɨzya bhahaga, “Wɨlɨ, ʉnza hutibhombele mayele wɨlɨ huje tilole na hwɨtɨshe? Ʉnza‑abhombe lyenu? 31 Abhamaama bheetu bhahaliiye ɨshalye ɨsho bhahagaga ɨmaana lwa bhali mu lʉʉgwa nanshi ɨsho ɨsimbwilwe mu Nsimbo ɨMfinjile huje, ‘Ahali abhapiiye ɨshalye afume hu mwanya.’ ” 32 Ɨpo ʉYeesu ahabhabhʉʉzya ahaga, “Lyoli ɨhubhabhʉʉzya, saga yʉ Moose ʉyo ahabhapiiye abhamaama bheenyu ɨshalye afume hu mwanya, leelo yʉ Daada waanɨ ʉyo hwope ɨshi ahubhapeela amwɨ ɨshalye ɨshɨ lyoli afume hu mwanya. 33 Ɨnjanjile ɨsho, pɨpo ɨshalye ɨshɨ lyoli nɨɨnɨ ʉyo ʉNgʉlʉbhɨ ahansonteleziizye afume hu mwanya huje ɨmbapeele abhantu bhonti ʉwʉʉmi ʉwa wiila na wiila.” 34 Ɨpo bhahamʼmwamula bhahaga, “Wee Mwɨnɨ, tilaabha ʉbhanje ʉhutipeela ɨvyalye ɨvyɨ waaji ʉwo ɨnsiku zyonti.”

35 ɄYeesu ahabhaamula ahaga, “Anɨ ɨndi shalye ɨsho shihubhapeela abhantu ʉwʉʉmi. Ʉmuntu wowonti wa‑ahwɨnza huliinɨ na hunɨɨtɨshe, saga anza‑alole ɨnzala nɨ nyoota dumu. 36 Leelo anɨ nahabhabhʉzɨɨzye huje hwope nkashele mundolile ɨbhomba amayele, musɨɨle saga muhunɨɨtɨha. 37 Abhantu bhonti ɨbho ʉDaada waanɨ ahumpeela, bhahayɨnza huliinɨ na hunɨɨtɨshe. Nantele anɨ saga ɨhunʼkhaana ʉmuntu wowonti wa‑ahwɨnza huliinɨ. 38 Ɨnjanjile ɨsho, pɨpo anɨ ɨnɨnzɨle afume hu mwanya huje ɨmbanje ɨbhomba ʉkʉndwe wa Daada ʉyo ahansonteleziizye. Saga ɨnɨnzɨle abhombe ʉkʉndwe waanɨ. 39 Ʉkʉndwe wa Daada ʉyo ahansonteleziizye, ahwanza huje, ɨngandi hunʼteezye nkʉ‑ʉmo mu bhaala ɨbho ampiiye, leelo ɨmbazyʉsye pi‑isiku ɨlya hu malishilo. 40 ɄDaada ahwanza shila muntu ʉyo amanya huje anɨ ɨndi Mwana waakwe na hunɨɨtɨshe, awaaje ʉwʉʉmi ʉwa wiila. Anɨ nahayihunʼzyʉsya pi‑isiku ɨlya hu malishilo.”

41 Ɨpo aBhayahuudi bhahanda ahwibhunanzye, pɨpo ʉYeesu ahajile, “Anɨ ɨndi shalye ɨsho ʉNgʉlʉbhɨ ahasonteleziizye afume hu mwanya.” 42 Bhahabhʉzɨlɨzanya bhahaga, “Wɨlɨ, ʉmuntu ʉnʉ saga yʉ Yeesu, ʉmwana wa Yoosefu ʉyo tibhamɨɨnye abhapaafi bhaakwe bhonti? Ɨshi abhajiiye wɨlɨ ayanje huje afumile hu mwanya?” 43 ɄYeesu ahabhaamula ahaga, “Leshi ahwibhunanzye mwɨmwɨ hu mwɨmwɨ. 44 Nʉʉmo ʉmuntu ʉyo abhajiiye ahwɨnze hwaliinɨ nkashele ʉDaada ʉyo ahansonteleziizye saga anʼnongoziizye. Nanɨ nahayihunʼzyʉsya pi‑isiku ɨlya hu malishilo. 45 Enya, ɨNsimbo ɨMfinjile ɨzya bhakuwi ziyiga, ‘ɄNgʉlʉbhɨ ahayihubhamanyizya abhantu bhonti.’ Ɨshi ʉmuntu wowonti ʉyo ahumʼmwʉmvwa ʉDaada na‑amanyile afume hwa mwene, ʉyo ahwɨnza hwaliinɨ. 46 Nʉʉmo ʉmuntu ʉyo anʼnolile ʉNgʉlʉbhɨ ʉDaada, leelo anɨ nɨmwene ɨnʼnolile, pɨpo ɨmfumile hwa mwene.

47 Lyoli ɨhubhabhʉʉzya huje, ʉmuntu wowonti ʉyo ahunɨɨtɨha anɨ, ali nʉ wʉʉmi ʉwa wiila. 48 Anɨ ɨndi shalye ɨsho shihubhapeela abhantu ʉwʉʉmi. 49 Poshe abhamaama bheenyu bhahaliiye ɨshalye ɨsho bhahagaga ɨmaana mu lʉʉgwa, hwope ɨsho bhahafwiye nanshi abhantu abhanjɨ. 50 Leelo ɨpa shilɨɨho ɨshalye afume hwa Ngʉlʉbhɨ. Nkashele ʉmuntu aliiye ɨshalye ɨsho, saga anza‑afwe dumu. 51 Anɨ ɨndi shalye ɨsho shifuma hu mwanya, ɨsho shihubhapeela abhantu ʉwʉʉmi. Ʉmuntu wowonti wa‑alya ɨshalye ɨshi, ahayibha nʉ wʉʉmi ʉwa wiila. Ɨshalye ɨshi mʼbɨlɨ gwanɨ, ʉgwo ɨnza‑afumye hwa bhantu bhonti huje bhabhe nʉ wʉʉmi ʉwa wiila.”

52 Ɨpo aBhayahuudi bhahanda adaliihane na‑abhʉzɨlɨzanye bhɨɨbho hu bhɨɨbho bhahaga, “Ʉmuntu ʉnʉ abhajiiye wɨlɨ hutipeele ʉmʼbɨlɨ gwakwe huje tilye?” 53 Leelo ʉYeesu ahabhabhʉʉzya ahaga, “Lyoli ɨhubhabhʉʉzya, nkashele saga mulya ʉmʼbɨlɨ gwanɨ na‑amwele idanda lyanɨ anɨ nɨMwana wa Muntu, saga munza‑abhe nʉ wʉʉmi ʉwa wiila na wiila. 54 Ʉmuntu wowonti ʉyo alya ʉmʼbɨlɨ gwanɨ na‑amwele idanda lyanɨ ali nʉ wʉʉmi ʉwa wiila, nanɨ nahayihunʼzyʉsya pi‑isiku ɨlya hu malishilo. 55 Enya, ʉmʼbɨlɨ gwanɨ shalye shɨ lyoli ni‑idanda lyanɨ shimwelo shɨ lyoli. 56 Ʉmuntu wowonti ʉyo alya ʉmʼbɨlɨ gwanɨ na‑amwele idanda lyanɨ, ahayijendeelela alembe peeka naanɨ, nanɨ peeka nawo. 57 Nanshi ɨsho ʉDaada ʉyo ali mwʉmi ahansonteleziizye, nanɨ ɨndi nʉ wʉʉmi afume hwa mwene. Shɨɨsho, ʉmuntu wowonti ʉyo ahundya anɨ, ahuwaaga ʉwʉʉmi afume hwaliinɨ. 58 Ɨshi, anɨ ɨndi shalye sha shifuma hwa Ngʉlʉbhɨ. Ɨshalye ɨshi saga shilɨngaana nɨ shalye ɨsho abhamaama bheenyu bhahaliiye. Bhope bhahafwiye nanshi abhantu abhanjɨ. Leelo ʉmuntu wowonti ʉyo alya ɨshalye ɨshi, ahayibha nʉ wʉʉmi ʉwa wiila.” 59 ɄYeesu ahayanjile amazwi ɨgo lwa‑amanyizya mu nyumba ɨya‑apuutile na‑amanyiilile, ʉhwo mwi‑ibooma ɨlyɨ Kapelenawumu.

Abhasundwe abhinji bhaleha humʼmwɨtɨshe ʉYeesu

60 Lwa bhʉmvwa ayanga ɨgo, abhinji mu bhasundwe bhaakwe bhahajeehana bhɨɨbho hu bhɨɨbho bhahaga, “Ɨmanyizyo ɨzi home tee! Wɨlɨ, weenu ʉyo abhajiiye huzyɨtɨshe?” 61 ɄYeesu lwa waamanya huje abhasundwe bhaakwe bhahwibhuna hwɨ‑ɨgo, ahabhabhʉzɨɨlɨzya ahaga, “Wɨlɨ, izwi ɨli lihubhaviisya? 62 Ɨshi yahayibha wɨlɨ, lwa mwahayihundola anɨ nɨMwana wa Muntu ɨzʉbha abhale hu mwanya ʉhwo nahali hu wandilo? 63 ɄMʼpepo wa Ngʉlʉbhɨ ya yʉʉyo ahubhapeela abhantu ʉwʉʉmi ʉwa wiila na wiila. Ʉmuntu saga abhajiiye abhombe hohonti hwi‑ikhone lyakwe mwene. Amazwi ɨgo ɨmbabhʉzɨɨzye gafuma hwa Mʼpepo ʉMʼfinjile, nantele gahubhapeela ʉwʉʉmi ʉwa wiila na wiila. 64 Leelo bhalɨɨho bhamo muuhati yeenyu ɨbho bhakhaana hunɨɨtɨshe.”

ɄYeesu ahayanjile ɨsho, pɨpo amɨɨnye afume hu wandilo huje bha bheenu ɨbho bhahayikhaana humʼmwɨtɨshe, nantele weenu ʉyo ahayihunʼsambushila huje abudwe. 65 Ɨpo ahajendeelela ayanje ahaga, “Sha shɨɨsho anɨ ɨmbabhʉzɨɨzye huje nʉʉmo ʉmuntu ʉyo abhajiiye ahwɨnze hwaliinɨ nkashele saga alongoziiwe nʉ Daada waanɨ.”

66 Afume hu habhaazyo ɨho, abhinji mu bhasundwe bhaakwe bhahanʼneha, bhope saga bhahalongozanya nawo nantele. 67 Ɨpo ʉYeesu ahabhabhʉzɨɨlɨzya abhasundwe bhaala ishʉmi na bhabhɨɨlɨ ahaga, “Wɨlɨ, amwɨ namwɨ muhwanza hundeshe?” 68 ɄSiimoni Peeteli ahamʼmwamula ahaga, “Wee Mwɨnɨ, yʉ naanu ʉwɨnjɨ ʉyo tibhajiiye abhale hwa mwene? Aawe weewe ʉli na mazwi ɨgo gahutipeela ʉwʉʉmi ʉwa wiila. 69 Atɨ tihwɨtɨha, nantele timɨɨnye huje aawe we Mʼfinjile afume hwa Ngʉlʉbhɨ.” 70 Ɨpo ʉYeesu ahabhabhʉʉzya ahaga, “Ɨmbasaluuye amwɨ ishʉmi na bhabhɨɨlɨ abhe bhasundwe bhaanɨ, leelo ʉmo muuhati yeenyu alongozewa nʉ Seetano.” 71 Ɨpa ʉYeesu ahali ahunʼnyanga yʉ Yuuda, ʉmwana wa Siimoni Sikalyoti. Ʉyo ya yʉʉyo ahanʼsambushiiye ʉYeesu huje abudwe, poshe ahali ʉmo mwa bhasundwe ishʉmi na bhabhɨɨlɨ.