Yaŋhooɓa ŋ Betel
35
1 Wa raakka mbeh, Kooh woosa Yaŋhooɓa ne : « Kaɗa Betel, te fu nik nga ; haɓɗa seeƴkoha nga wuu so, mi yi Koohi teeɓkee ɗa nga, wa fu nupee taambɗoh fu Esaaw. » 2 Yaŋhooɓa woosa ɓi kahan ce na ɓooɓa hunee na ɗe jen ne : « Saɓsukohaat na kooha ciŋ jaambur ci, ci nik na ɗu, ɓoktukaat te ɗu ɓekuk kulɓa wiiriis, 3 ɓoo kaɗ Betel, ŋ haɓɗiɗa Kooh seeƴkoha nga. A yi hirpee so wa ŋ feyu te a ɓaatɗohha so ŋ ɗisik ci ŋ taamb jen. » 4 Ɓa ɓayya kooh ca nikee na ɓa jen, na long-long ca ɓa ɓekkee ŋ nof caŋ ɓa, ɓa eɗta Yaŋhooɓa ca ; a acca ca ŋ tasaŋ kidga yakka nik ŋ sere Sisem. 5 Ƴutta, ɓa cooteeɗa. Kooh tummba, ɓooɓaŋ kur ca wilee ɓa neƴƴohha po, ɓa kaañɗi taambiɗ kuɓuucaŋ Yaŋhooɓa. 6 Yaŋhooɓa na ɓooɓa hunee na ɗe kaɗta po ɓa reesa Luus, weɗ Betel, ŋ kur kaŋ Kanaan poyi. 7 A haɓiɗta seeƴkoha nga, a teekka ɗiska El-Betel (Koohiŋ Betel) laam, Kooh teeɓkohee ɗe ndaam wa a nupee taambɗoh ce.8 Ɓitfa meeɗee ɓapiɗ Rebeka na woyse Debora hunee na ɓa. A yaa kaanohha ndaam. Ɓa acca ɗe ŋ tasaŋ kidga yakka nik ŋ sere Betel ; ɓa teekkaa Kidgiŋ-fuɗ-ci.
9 Ŋ pulohaŋ Yaŋhooɓa Paddan-Aram po a reesa Betel, Kooh teeɓkissa ɗe nga, a barke'iɗta ɗe. 10 A woosa ɗe ne : « Tiikiŋ ɗa wa Yaŋhooɓa, waaye fu ɓeeɗkissasanɗi Yaŋhooɓa, fu teeku Israayel kotii. » Kooh teekka ɗe Israayel. 11 A woyissa ɗe ne : « Ñam Koohi Min. Rimaatɗoha, fu ɓaatuk laam cuuɓ angiɗ na heet laayiɗ hey pulohe nga ɗa ; ɓi buur sah hey raake nga. 12 Kur ki ŋ onee Ibrahiima, ŋ onndaa Isaahha, ŋ hey ɗa wa one, ŋ ona ɓi na hee rimkohe nga ɗa. » 13 Wa a woo po ƴutta, Kooh faɗta Yaŋhooɓa ŋ ndaam, a cootta ɗafka. 14 Yaŋhooɓa ɓayya atoh, a yippaa ŋ ɗiska. A seeƴkohhaa anaah, a yiiffa diwliin ŋ ɗafuk wa. 15 A teekka ɗiska Kooh woyohee na ɗe Betel (kahan Kooh)
Raakuukaŋ Benyaamin na kakaan kaŋ Rasel
16 Wa Yaŋhooɓa na ɓooɓa hunee na ɗe puloh Betel, ɓa kaɗ kaɗ po ɓa tassa ree Efraata, raak Rasel nikee rook, a miskasseeɗa ; raakaŋ ɗe kuɓu misikka lool. 17 Ŋ ɗooƴ miskiɗeem, dooñoha nikee na ɗe woosa ɗe ne : « Kana neƴƴoh, fu raakis kuɓu ƴaar. » 18 Waam raak Rasel kaaneeɗa, bala a nguɗan ɗah, a teekka kuɓka Benooni (kuɓkiŋ miskiɗiŋ ngo). Waaye baab ɓa teekka ɗe Benyaamin (kuɓkiŋ yaah-ñaahmi). 19 Rasel kurukka nga, a acuusa ŋ waas Efraata, weɗ Betlehem. 20 Yaŋhooɓa yippa atoh inhisoha ŋ ruy-ruyaŋ ɗe ; atoh faam wa ɗaa nga po ɗiski maa woyohe na ɗu ndii.
21 Wa Israayel (yi Yaŋhooɓa) puloh ndaam, a kaɗta, a yippa ɗiip caŋ ɗe ŋ finho Migdal-Eder. 22 Ŋ nikaŋ Israayel ndaam, Ruben faanukka na Bilha ñaama baab ɓa ɓayee ɓitiɓ ; Israayel yeggaa.
Yaŋhooɓa raakeen kuɓu ƴaar ndaŋkiyaah na kanak (12). 23 Ɓi a raakee na Leya nikee Ruben saawiŋ ɗe, na Simeyong, na Lewi na Yudaa na Issaakar na Sabuloon. 24 Ɓi a raakee na Rasel nikka Yuusufa na Benyaamin. 25 Ɓi a raakee na Bilha, ñaamaŋ Rasel nikee Daan na Naftaali. 26 Ɓi a raakee na Silpa, ñaamaŋ Leya nikee Gaad na Aser. Ɓeem, ɓeɗ kuɓuuci ƴaar ci Yaŋhooɓa raakoh Paddan-Aram.
Kakaan kaŋ Isaahha
27 Wa raakka mbeh, Yaŋhooɓa dokukka ɗiskaŋ baab ɓa Isaahha ŋ Mamre ŋ sero Kiriyat-Arba wa na woyse Hebron kotii. Ibrahiima na Isaahha genee nga. 28 Isaahha kaan wa a raak kiis teemet na kiis ndaŋkiyaah yasna-kaahay (180). 29 A kaan ŋ finho kipes hutiɗ, a haadda jaanim. Kuɓuuciŋ ɗe Yaŋhooɓa na Esaaw uummba ɗe.