Taambɗoh caŋ Dinaa wirndukɗiɗ ɗe
34
1 Wa raakka mbeh, Dinaa, kuɓka cafƴa Yaŋhooɓa raakee na Leya, kaɗta marka ɓitiɓ caŋ kur ka, 2 raak Hamor, ya ɓaah ŋ cuuɓaŋ Hiw ca a yi adgohee wa ; a raakeen kuɓu ƴaar teeku Sisem. Sisem yeem hotta Dinaa, a ammba ɗe, a siiffa ɗe. 3 A waaɗta ɗe po a jeemeeɗa ɗe nook ŋ haf ce ne yeem waaɗ ɗe ; 4 a woosa baab ɓa Hamor ne : « Baab, ɓayiɗ to cafƴii ɓitiɓ. »5 Wa Yaŋhooɓa kerah ne Sisem yahiɗ kuɓkaŋ ɗe Dinaa, a wooɗi in nga laam wa raak kuɓuucaŋ ɗe ƴaar ca ŋ yohon ca na gat ca ; a sek sek po ɓa hayya.
6 Weɗi Hamor, baab ɓi Sisem kaɗoh ŋ Yaŋhooɓa ne a woo na ɗe. 7 Wa hennda kuɓuucaŋ Yaŋhooɓa pulohha yohon ca, ɓa kerahha ina raak, wa mannda na ɓaseeh nga ɓa. Wa ayrukiɗta ɓa lool laam Sisem haɓiɗ in moɗaaɗi'iɗ ; faanka a faanuk kuɓkaŋ Yaŋhooɓa, ini joyɗi tumu ŋ Israayel. 8 Hamor woosa ɓa ne : « Sisem, kuɓkiŋ ngo waaɗiɗ Dinaa lool ; mi yii kiim ɗu ne ɗu on ɗe ɗe ɓitiɓ. 9 Te, ɓoo kilooktiɗohaat, ɗu ɓayee ɓitiɓ ŋ kuɓuuciŋ ɓoo, ɓoo namee kilook ŋ cafaƴ ciŋ ɗu. 10 Kur ki weɗi wii, genaat na ɓoo, ɗu toontukee nga, ɗu waak merhey nga. »
11 Sisem nammba woo Yaŋhooɓa na taambɗoh caŋ Dinaa ne : « Ɗu teyɗukiɗ to ɗah, in nu ɗu meekis so ɗah, ŋ hey ɗu wa eɗe. 12 Meeksaat to cakiima ɓitiɗ, ŋ hey wa eɗohe. Meeksaat to in laayiɗ, ŋ hey ɗu wa one ; teyɗukaat to on kuɓkiŋ ɗu ɓitiɓ rek. »
13 Sagu yahi taambɗoh ɓa Dinaa yahu, kuɓuuciŋ Yaŋhooɓa ñaañohha Sisem na Hamor, yi baabiŋ ɗe ; 14 ɓa woosa ɓa ne : « Ɓoo minɗi on taambɗoh ɓoo ƴaari nguɗukɗi laam ineem, mand na ɓaseeh nga ɓoo. 15 Ɓoo min ɗu teyɗukiɗ ŋ in yino, weɗ ne ƴaar ciŋ kur ki jen nguɗuk findi ɓoo. 16 Ŋ ineem ɗu hey mine ɓay ɓitiɓ ŋ cafaƴ ciŋ ɓoo, ɓoo min ɓay ngaŋ ɓiŋ ɗu ; ɓoo gen na ɗu, ɓoo nik yino. 17 Waaye ɗu hunɗi ŋ ineem ɗah, ɓoo hey ɓaye taambɗoh ɓoo te ɓoo coot na ɗe. »
18 Weɗ Hamor na kuɓkiŋ ɗe teyɗukoh ineem. 19 A yi Sisem, a arra tum ina a woyu sagu waaɗa a waaɗee kuɓkaŋ Yaŋhooɓa. A nikee ɓoya uupee kerhiɗu ŋ kahan baab ɓa. 20 Hamor na Sisem kaɗta ŋ teembohaara, ŋ aasohaanaŋ kur ka, ɓa woosa ɓooɓaŋ ɓa ne : 21 « Ɓooɓii deey, ɓa raakiɗ jam na ɓoo, ɓoo faɗaat ɓa, ɓa gen ŋ kur ki laam wa angiɗ ; ɓa toontukee nga, ɓoo minee ɓay ɓitiɓ ŋ kuɓuuciŋ ɓa, ɓa namee ɓay ɓitiɓ ŋ ɓiŋ ɓoo. 22 Ɓa hey teyɗuke gen na ɓoo, ɓoo nik yino, waaye, bala ineem minan nik ɗah, ƴaar ciŋ kur ki jen hey nguɗke findiiɓa. 23 Ɓoo teyɗukaat tum ini ɓa woo, ɓa min gen na ɓoo. Wa nik ɗah, gat ciŋ ɓa na raak-raakiŋ ɓa jen jaaran nik cuu ɓoo. » 24 Ƴaar ca nikee ŋ aasohaanaŋ kur ka jen, kerhiɗta Hamor na kuɓkiŋ ɗe Sisem, ɓa nguɗukka.
25 Wa ɓa nguɗuk po wa degga neeh kanak, miskiɗa nikka na ƴaar ca, kanak ŋ kuɓuucaŋ Yaŋhooɓa, Simeyong na Lewi, taambɗoh caŋ Dinaa, ɓayya ndang caŋ ɓa ; ɓa aassa kur ka moɗoɗ, ɓa appa ɓa jen. 26 Ɓa apndohha Hamor na Sisem, ɓa naaffa Dinaa, ɓa cootta na ɗe.
27 Weɗi kuɓuucaŋ Yaŋhooɓa ɓinooɓa rokoh in ca nikee ŋ fiɗaaf ca, ɓa ɓayya ina nikee raak-raak ŋ kur ka jen sagu njoofa taambɗoh ɓa Dinaa ɓeku. 28 Ɓa ɓayya ɗoopaat caŋ ɓa na in ca nikee ŋ ɗooƴ kur ka na yohon ca jen. 29 Ɓa ɓayndohha raak-raakaŋ ɓa jen na komaakca ƴin ca na ɓitiɓ ca, ɓa faɗɗi ali in ŋ kahan ca.
30 Wa ɓa puloh ndeem, Yaŋhooɓa woosa Simeyong na Lewi ne : « Ɗu deey, ɗu tefɗiɗ to ro', ɗu tahiɗ po ɓi Kanaan na ɓi Peris, ɓi gen kur cii, hey yo sange. Ɓa hey ambsukohe, ɓa keen ŋ ɗafuk ko, ɓa apndoh ho na ɓi kahan ndo, laam ɓooɓiŋ ngo laayɗi. » 31 Ɓa loffa ɗe ne : « Ƴaari joyiɗ tum taambɗoh ɓoo findi toonkoh e ? »