Kooh ambtiɗohiɗ na Ibrahiima
15
1 Ŋ finho coha na buur ca, Ibram raakka hot hot. A Nikiɗi woyee na ɗe an : « Ka neƴƴoh ali in Ibram, laam e ñam na hee ɗa ɗipe, te aafiŋ ɗa hey yake lool. » 2 Ibram loffa ne : « An fu na hee so ye one Heɗ ɓoo Nikiɗi ? Te ŋ raakɗi kuɓu po Eliyeser yiŋ Damas yii, a yi laman raak-raak kiŋ ngo ! 3 Fu onɗi so kuɓu po jaambri rimkoh ŋ kahan ndo a yi na hee so lame ! » 4 Nikiɗi loffa ɗe ne : « Muk, a yi lamohiŋ ɗa haa, waaye a kuɓki fu rimoot ŋ ñif miŋ ɗa, a yi na hey ɗa lame. » 5 Nikiɗi puliɗta ɗe ŋ hara, a woosa ɗe ne : « Taaknuka, fu kind hor ci ne fu miniɗa ɗah. Fu hotiɗ findi ca laayoh e ? Ɓi rimkohan nga ɗa hendan ɗaa. » 6 Ibram kossa, weɗ tah Nikiɗi ammba ne a ɓo' yurhiɗ.7 A woyissa ɗe ne : « E ñam Nikiɗi yi pulɗoh ɗa Uur ŋ Babilon, ne ŋ on ɗa kur kii, fu raakoota. » 8 A loffa ɗe ne : « Heɗ ɓoo Nikiɗi ŋ min inhoh na ne kur kii e ñam raakana ? » 9 Nikiɗi woosa ɗe ne : « Ɓayiɗ to inoh yu' na pe' yu' na mbaal naar, yaa nu nga ɗah raakaat kiis kaahay, na hoɗ na pitah ƴin. »
10 Ibram ɓayya ɗoopat ceem. A appa ca, yaa nu nga ɗah, a nguɗta ɗe ŋ leerni po tassa sel ca. A yurhiɗohha nguɗ nu nga ɗah na wa ɓaat nga. 11 Suur ca yipkeeɗa ŋ fiɗaaf caŋ ca. Ibram aannja ca.
12 Wa noha na muye, Ibram pani'uusa, pani nooɗiɗ. Neƴƴoh miskiɗ aassa ɗe. 13 Weɗi Kooh woyoh ɗe ne : « Inhaa ne set ciŋ ɗa hey nike jaambur ŋ kur ka ɓa raakɗi, ɓa tumu ñaam nga, ɓa torhiɗu kiis teemet nikiis. 14 Waaye ŋ hey mbugale ɓi kur ka ɓa tumohu ñaam, po ɓa puloh nga na raak-raak laayiɗ. 15 Ŋ ini kaɗ nga ɗa nak, fu hey raake kipes hutiɗ, neɓiɗ, fu kuruk nga moɗoɗ, fu uumbu ŋ jam. 16 E set ciŋ ɗa, ŋ finho kiis teemet nikiis ceem, na hey dokkisse ŋ ndii ; laam aƴaarkiŋ Amoor ci uupɗi yaah ndoom. »
17 Wa noha muy, wa ñuussa tuɗ, ɗekka po njahha ɗuukeeɗa hunnda na kocom kaɓiɗ, ca taammba ŋ harmban nguɗ caŋ sepet ca. 18 Mbaɗi, Nikiɗi ambtiɗohha na Ibram. A woosa ɗe ne : « Ɓooɓi pulohan nga ɗa, ɓeɗ maa hee eɗe kur kii ; ina nguɗoh ŋ kalaŋ Misra po ŋ Efraat, kala yakka. 19 Wa nikka kur kiŋ Ken ci na Kenis ci na Kadmon ci 20 na Hit ci na Peris ci na Refay ci 21 na Amoor ci na Kanaan ci na Girgaas ci na Yebuus ci. »