Ambuuka na naafuukaŋ Loot
14
1 Wa nikee wa Amrafel nikoh buuraŋ Sinyaar, Aryok nikka yaŋ Elasaar, Kedorlamer yaŋ Elaam na Tidyal yaŋ Goyim ; 2 ɓa hunnda na ɓooɓaŋ ɓa, ɓa hiñoheeɗa na Bera buuraŋ Sodom na Birsa yaŋ Gomor, Sinyab yaŋ Atma, Semeber yaŋ Seboyim na yaŋ Bela, weɗi Sowar. 3 Ɓeɗ ɓi yatuus cii, ɓeɗ ambsukohee ŋ oonaŋ Sidim weɗi Cookmiŋ Meɗaami woti woti. 4 Raak wa tumeen kiis ndaŋkiyaah na kanak (12) ca fu inah ne, e Kedorlamer a yi adgiɗee ɓa, waaye ŋ kiis ka taamb nga ɓa sannga inaam.5 Wa tummba kiis kotii, tahha po, Kedorlamer na buur ca hunee na ɗe heeɗa nga ɓa. Ɓa kocca laɓ Refay ca ngaŋ Asterot-Karnayim, Sus ca ngaŋ Ham, Em ca ngaŋ jooraŋ Kirsatayim, 6 Hoor ca ngaŋ tangoocaŋ ɓa teeku Seyiir. Ɓa nuptoheeɗa ɓa, po ŋ El-Paraŋ ŋ sero kehƴa hulanga. 7 Ɓa pulohha nga, ɓa gurdohha En-Mispat, weɗi Kades ; ɓa degga kur kaŋ Amalek ca jen yaah. Ƴutta ɓa nammba keen ngaŋ Amoor ca genee Hasason-Tamaar.
8 Wa ɓa juuɓee Sodom na Gomor na Atma na Seboyim na Bela, wi Sowar, buur caŋ kur cii puliɗta jalmbaacaŋ ɓa ; ɓa kaɗta hiñoha ŋ oonaŋ Sidim 9 na Kedorlamer buuraŋ Elaam, Tidyal yaŋ Goyim, Amrafel yaŋ Sinyaar na Aryok yaŋ Elasaar : buur yatuus cohha na buur nikiis. Yatuus ca minuusa, ɓa saandoheeɗa.
10 Wa buur caŋ Sodom na Gomor saandohee, raak wong koltaara laayeen ŋ oonaŋ Sidim, ɓum keennda nga ca. Ɓi raawɗi kaan kaɗta ɗemmba ŋ tangooca. 11 Ɓi nuptohee ɓa guridda, ɓayya in ca Sodom na Gomor ambohee jen findi raak-raak na pesoha, ɓa cootta na ca. 12 Loot yi kuɓu ŋ Ibram nameen ɓayndohu na ina a raakee jen, laam raak ɗe ŋ Sodom.
13 Yino ŋ ɓi fusee kaɗta, woosa Ibram wa, yi ɓaah ngaŋ Heber ci ; raak ɗe yip ngaŋ kidig ca yakak caŋ Mamre, yi ɓaah ngaŋ Amoor ci. Mamre raakeen taambɗoh kanak, Eskol na Aner. Ɓeɗ ɓi kaahay ceem ɓa langee na Ibram.
14 Wa Ibram kerah ne Loot, kuɓkaŋ taambɗoh ce ambuuɗ, a cohɗohha ɓa min hiñoh ŋ ƴaaɓa rimohu kahan ce ; ɓa reyeen teemet kaahay na ndaŋkiyaah na yasna-kaahay (318). Ɓa, na ɓi langee na ɓa, taambiɗta buur ca po ŋ Daan. 15 Ibram paysohha ƴaaɓaŋ ɗe, ɓa keennda ɓa na weka, ɓa laɓpa ɓa, ɓa nuptoheeɗa ɓa po ŋ Hoba, ŋ finho Damas. 16 A naaffa in ca ɓa raak jen, a naafndohha Loot na raak-raakaŋ ɗe na ɓitiɓ ca na ɓa ambsee ñaam jen.
Cohaŋ Ibrahiima na Melkisedek na buuraŋ Sodom
17 Wa Ibram laɓ Kedorlamer na langtoh caŋ ɗe po a gurdeeɗa, buuraŋ Sodom pulla kaɗta coha na ɗe ŋ oonaŋ Sawe, wa na woyse Oonaŋ Buur. 18 Melkisedek, buuraŋ Salem, nammba hay na mbuuru na biiñ, a yi seeƴkiɗohi na seeƴkiɗohe wuu Koohiŋ Ɗafki. 19 A kiimiɗta Ibram barke an : « Koohiŋ Ɗafki, yi fer eel ci na kehƴi, barke'ɗaat Ibram ; 20 Koohiŋ Ɗafki, yi amboh ɗa po fu minnda ɓa fu hiñohee na ɓa, a gidmaah gidmu. » Ibram eɗta ɗe ŋ in ca a naafee, ndaŋkiyaah nu nik ɗah, winooraŋ wa.
21 Wa ɓa coh ŋ oonaŋ Sawe, buuraŋ Sodom nammba woo Ibram ne : « Eɗ to ɓooɓi te fu ɓay raak-raaki. » 22 Ibram loffa ɗe ne : « Mi yii meeɓ yaah ŋ giñ Nikiɗi, Koohiŋ Ɗafki, yi fer eel ci na kehƴi ne ; 23 in hend na caas mbaa liiɓ ñafaɗ, ŋ heyɗi wa ɓaye ŋ ini fu raak, po fu minanɗi woo ne, e ñam tah Ibram raak. 24 Ŋ waaɗɗi ali in nga, nikɗi in ci ƴaaɓi raaw ñam ɗah, na ɓakiŋ langtoh ciŋ ngo, Aner na Eskol na Mamre, ɓi fu inah ne, ɓa raakiɗ waɗ nga. »