23
OYesu omu maiso ga Piraato
1 Abaali omu lukiiko boona boona ni baimuka ni batwala oYesu e wa Piraato. 2 Ni batandika okumuwaabira nga bakukoba, “Tusangiriirye omusaiza oni nakuwuja abantu baiswe, nakuwakanisya ekya kuweerya oKayisaali omusolo era nakweyeta Kurisito, oMukama.”
3 OPiraato n'abuulya oYesu, “Niiwe mukama w'aBayudaaya?” OYesu n'airamu,
“Nka nokoberembe nimwo kikali.”
4 OPiraato n'akoba okabona omukulu n'abantu boona boona abaalowo nti, “Ekyasinziirwaku okujunaana omusaiza oni tinkukibona.”
5 Abantu ni bongera ni bakoba, “Byakwegesya bikucaacula abantu omu Buyudaaya bwona. Yatandikiire mu Galiraaya ati ngoni aikire e Yerusaalemu.”
6 OPiraato niyawuliire kini n'abulya oba ng'omusaiza oni yaali Mugaliraaya. 7 Niyeetegerye nti oYesu yaali wa mwitwale lya Kerode, n'amusindika e waamwe. Ebiro ebyo oKerode yaali mu Yerusaalemu.
OYesu omu maiso ga Kerode
8 OKerode niyamuboine n'asemereerwa muno, olwakubba yaali nalwire ng'akuwura ebyamubazibwangaku olwa by'amaano bye yakolanga. OKerode n'ayendya amubone nakukola eky'amaano. 9 Yamubuuliriirye, baitu oYesu natamwiramu kigambo kyona kyona. 10 Abakabona abakulu n'abeegesya b'amateeka baali nibeemereire awo nibakwambya omusango gwabwe oku Yesu. 11 OKerode n'abaserikale baamwe ni bamuwemulawemula n'okumusekeera ni bamuzwalikisya ekizwalibwa ekya kitiinisya ni bamwiryayo e wa Piraato. 12 Ekiro ekyo oKerode n'oPiraato ni banywana, baitu obwakarai baali nibanobengaine.
OPiraato akusaara oYesu ogwa kufa
13 OPiraato n'ayetesya abakabona abakulu, abakama n'abantu, 14 N'abakoba, “Mwandeeteire omusaiza oni nimukukoba nambu akucaacula abantu, mubuuliriirye nywena nimulowo baitu timmubweineku musango gwona omwebyo byemuwaabire. 15 N'oKerode tiyamuboineku musango, nikyo yamwiriirye gyetuli. Kini kikulanga nti ndoowo musango gwe yairye oguloomere okumwitisya. 16 Nkwiza kumusuunyamumbe leke mmutaisye.” 17 Buli kiro kya Kwakalibwaku oPiraato yateekwanga okubataisiryayo omusibe omwei.a
18 Abantu ni bakokoomera amwei nti, “Mwitembe omusaiza oyo! Tutaisirye oBalaba!” 19 OBalaba yaali nabbwerwe lwa misango gya bwiti n'okuleeta okwegunga omu Yerusaalemu.
20 OPiraato n'airamu okubaza nabo n'akwendya okutaisya oYesu. 21 Baitu bo ni bakokooma nga bakukoba nti, “Mubambe! Mubambe!”
22 N'abaza nabo omulundi ogwakasatu: “Lwaki? Omusaiza oni airye musango ki? Timboine nsonga eyaakumwitisya. Nkwiza kumusuunyamumbe leke mmutaisye.”
23 Ni beeyongera okubazira aiguru nga bakukoba oYesu abambwe oku musaalaba, n'amaraka gaabwe ni gakirisya oPiraato amaani. 24 OPiraato n'asalawo okubakoora kyebaali nibamusabire. 25 OPiraato n'abataisirya oBalaba ogwe baasabire, eyaali nabwerwe olwa bucaacuki n'obwiti bw'abantu, n'abaweerya oYesu okumwita nka nibaali batakire.
OYesu akubambwa oku musaalaba
26 Nibaali bakumutwala okumwita ni baitirana oSimooni, owa mu kibuga kya Kuleene eyaali nakuliga omu kyalo nakwaba eYerusaalemu. Baamukwaite ni bamubiikiryaku omusaalaba, ni bamuwambiriza okugwetiika nga nimwo akusengeerya oYesu. 27 Abantu banyamwingi ni basengeerya oYesu, muni mwalumu n'abakali abaalumirwe omuno era ni bakubba n'oluboroogo nga bakwatiriire ebisubba byabwe. 28 OYesu n'ayinduka n'abona abakali abo, n'abakoba, “Nywe abakali ba mu Yerusaalemu, mutakungira nje, baitu mwekungire nywe n'abaana baanywe. 29 Olwakubba ebiro byaliika leke abantu bakobe, ‘Abakali abagumba abatatoolangaku nda era abatayoncangaku balina omukisa!’ 30 Bo bakwiza okukoba ensozi nti, ‘Mutugweku!’ Nobusozi obudooli nti, ‘Mutubbiitikire!’ 31 Olwakubba we bakoleire kini oku musaale ogubbisi, nibaliika oku gukalu kiribba kityai?”
OYesu akubambwa oku musaalaba
32 Abasirikale ni batwalana abasaiza abandi babiri, nga bo bayendi b'amateeka, okubaitira amwei n'oYesu. 33 Nibaikire omu kifo ekyetebwa Kyangala, oYesu ni bamubamba oku musaalaba n'abayendi b'amateeka ni bababamba oku misaalaba, omwei oku mukono gwa Yesu ogulyo n'owondi oku gumoso. 34 OYesu n'akoba, “Taata basaasire olwakubba tibamaite kye bakukola.” Ni babagana ebizwalibwa byamwe, nga bakukubba akalulu.
35 Abantu ni bayemeera nga bakuroleera, abakama ni bamugaya, ni bakoba, “Yalokolanga bandi ale yeelokole niyaabba nali eyasukiibweku amafuta, oKanca gwe yakomerye.”
36 Abasirikale boona ni baiza ni bamusekeera ni bamuweerya enkaatu ya viini, 37 ni bakoba, “Niwaabba mukama w'aBayudaaya weiye oku musaalaba.”
38 Waalowo ebigambo ebyawandiikiibwe ni biteekebwa aiguru wa mutwe gwamwe oku musaalaba nga bikusoma biti: ONI NIYE MUKAMA W'ABAYUDAAYA.
Omwei oku bakoli ba bibbi ni yeiramu
39 Omwei okwabo abaabambiibwe naye n'azuma n'amukoba ati, “Toli Kurisito, niwaakubbaire Kurisito, waakweiyire oku musaalaba naiswe n'otwiyaku!”
40 Omwirawaamwe n'amunenya, n'amukoba ati, “Tokutiina Kanca ng'ate weena oli ku kibonerezo nk'ekyamwe? 41 Ekibonerezo kyebatuwaire iswe kituloomere, tukusasula byetwakoore, baitu omusaiza oni ekibbi kyeyakoore kyayi.”
42 Omusaiza oni nayindukira oYesu n'amukoba ati, “Yesu, onyizukiranga noikire omu bukama bwamu.”
43 OYesu n'amwiramu ati, “Kankukobere ekiikire; ekiro kyaleero okwaba okubba nanje omwiguru.”
Okufa kwa Yesu
44 Ekiro ekyo okutandikira akati omwiyangwe onsi yeena yeena yakwaite ekiiruma okwikirya kyarumwei oku saawa yamwenda. 45 Eisana ni rilekayo okwaka, n'eikinga lya mwiramyo ni ryonokamu akati. 46 OYesu n'abazira omwiraka eryaiguru n'akoba ati, “Taata, nkukukwatisya omwoyo gwange.” Niyamaare okubaza ekyo n'atiika.
47 Osirikale omukulu niyaboine ebyalowo, n'awaisya oKanca n'akoba ati, “Mazima omusaiza oni abbaire aikiriire!” 48 Abantu abaakumbaine okuroleera oYesu n'abayendi b'amateeka nibakubambwa nibaaboine ebyalowo ni balugawo nga baizwire enaku. 49 Baitu boona boona abaali nibamaite oYesu, omwali n'abakali abaamusengereirye okuliga e Galiraaya, tibaigereire, baalengerangambe.
Okuziikibwa kwa Yesu
50 Oku lukiiko lwa Bayudaaya olukulu kwaluku omusaiza omusai, ng'aikiriire eyayetebwa Yusufu. 51 OYusufu yaabbanga mu kibuga kya mu Buyudaaya ekyayetebwanga Alimasaaya. Yaikaire nalindiriirye obukama bwa Kanca era tiyasembere kikolwa kya kwita Yesu olukiiko kyelwasaarewo. 52 OYusufu n'ayaba e wa Piraato n'amusaba omulambo gwa Yesu. 53 N'aguwanula oku musaalaba n'aguzinga omu lugoye lwa liiri, n'aguta omu mbi eyaali tekateebwangamu mulambo gundi, eyaali nebaizirwe omwibbaale. 54 Ekiro ekyo kyali kyakweteekaniriza Sabbiiti olwakubba gyali gigereire.
55 Abakali badi abaaligire n'oYesu e Galiraaya, ni basengeerya oYusufu nakutwala omulambo gwa Yesu, ni babona embi n'engeri omulambo gyegwateirwemu. 56 Nibaaligire awo ni bairayo e Yerusaalemu, ni bateekaniza ebyabuwoowo n'amafuta ebya kuta oku mulambo gwa Yesu. Enceege ni bawuumula, olwakubba yaali Sabbiiti, nk'eiteeka lyakanai nirilagira.