22
OYuda akwikiriza okuliirana oYesu
1 Obugenyi bwa migaati egitatumbisiibwe obwetebwa okwakalibwaku bwali bwigereire, 2 Abakabona abakulu n'abeegesya bamateeka ga diini baatoolyanga engeri ya kwitamu oYesu, kubba baatiinanga abantu. 3 OSitaani naingira omu Yuda Isikaliyoti, omwei okwikumi nababiri. 4 Nayaba egiri abakabona abakulu n'abaakuuranga abalindi ba iramyo, nateesa nabo engeri gyeyabaweeryamu oYesu. 5 Nibasemereerwa muno era nibaikiriza okumuweerya empiiya. 6 OYuda n'aikiriza, era n'atandika okutoolya awambula bantu, we yamuweerayo gyebali.
Ekyaigolo ekyerereireyo
7 Ekiro kya bugenyi bwa migaati egitatumbisiibwe kwe baasaranga ontaama omutomuto owa kwakalibwaku ni bwika. 8 OYesu n'atuma oPeetero n'oYokaana, n'abakoba ati, “Mwabe muteekanize ekiibulo kyakwakalibwaku leke tukiriire amwei.”
9 Ni bamubuulya “Okwendya tukiteekanirize ayi?”.
10 N'abairamu nti “Nimwabba mwakaingira omu kibuga Yerusalemu, mwaitirana omusaiza eyeetiikire ensuwa ya maizi. Mumusengeerye okwika oku nyumba gyeyaingiramu, 11 Omukama wa nyumba mumukobe muti ‘OMwegesya akwendya ekisiika kya bagenyi wayinza okuliira n'abeegesebwa baamwe ekiibulo ekyakwakalibwaku.’ 12 Akwiza okubalanga ekisiika ekyaiguru ekikooto ekirumu ebyakukolesya byona. Eyo nijo muteekanirize.”
13 Ni baaba era ni baaja byona byona nibiri nk'oYesu niyabibakobere; Ni bateekaniza ekiibulo kyakwakalibwaku.
14 Awo esaawa niyaikire, oYesu n'abakwenda baamwe ni baikala oku meeza. 15 N'abakoba ati, “Ntakire muno okulya naanywe ekiibulo kyakwakalibwaku kini nincaali kubonaabona. 16 Mazima nkubakoba nti tindiiramu kukirya kyekikumanyisya kitakaikiriire omu bukama bwa Kanca.”
17 Niyamaare n'aimula ekikopo kya viini n'agyebaarya oKanca n'abakoba ati, “Mukwate eviini gini leke buli omwei anyweku. 18 Mazima nkubakoba tindinywa ku nsande ya byana bya zabbibbu okwikya obukama bwa Kanca nibwizire.”
19 N'aimula omugaati, ni yeebalya oKanca. N'agwendayenda, n'agubaweerya, nakukoba ati, “Guni nigwo mubiri gwange oguweereibweyo oku lwanywe. Kini mukikolenge olwa kunyizukiranga.”
20 Omu ngeri nigyo gimwei, nibamaare okulya ekiibulo, n'akwata ekipo n'akoba ati, “Eviini egiri omu kikopo kini niko kabonero ka ndagaano egiyaaka oKanca gy'akukola n'abantu ng'akwakala omu musaayi gwange ogwasenseka oku lwanywe. 21 Baitu oyo akwaba okumpeeryayo omu banyanzugu bange akukozya amwei nanje. 22 OMwana wa Muntu akwiza okufa nk'oKanca niyateekanize baitu zimwagirye oyo akumuliirana.” 23 Ni batandika okwebuulya bonkai na bonkai naani oku bo akwaba okukola kini.
24 Era ni batandika okukubba empaka bonkai na bonkai nti okubo omukulu naani. 25 OYesu n'abakoba ati, “Abakama ba manga ga nsi bafuga kubbi abantu baabwe; baitu bebafuga babalowozesya nambu basai. 26 Baitu Nywe mutalibba mutyo. Leka omukulu omu nywe abbe nk'omuto; n'oyo omwebembezi abbe nk'omuweereza. 27 Obwo ati naani akusinga obukulu, oyo aikaire okulya oku meeza oba oyo akuweereza? Tiniye oyo ali oku meeza? Baitu nje ndi nk'omuweereza omu nywe. 28 Nywe mwemereire amwei nanje omu kugezesebwa kwange: 29 Era nkubalaamira okufuga omu bukama nk'oitewange njeena bweyandaamire okufuga, 30 leke muliirenge era munywerenge oku meeza amwei nanje, omu bukama bwange era mwikalenge oku ntebe ya bukama nimukulamula enganda za Isirairi ekumi neibiri. ”
31 OYesu n'akoba ati, “Simooni, Simooni, oSetaani asabire okubasegenya nywe nk'eŋaano 32 Baitu nkusabiire okwikiriza kwamu kuleke okukeeya era niwaalibba omaare okuyinduka ogumyanga abairaawo.”
33 OSimooni n'amwiramu ati, “Mukama, neeteekaniize okubbwebwa n'okufeera amwei naawe.”
34 OYesu n'amwiramu ati, “Peetero kankukobere, ekiro kyaleero onkoko atakakookere wanyeegaana emirundi esatu nambu ‘tinkumaite.’”
35 OYesu n'ababuulya, “Ninabatumire nimutalina mpiiya, gonze ensawo oba enkaito alowo kye mwabuurweku?”
Ni bamwiramu nti, “Ndoowo.”
36 N'airamu n'abakoba, “Baitu ati buni nimwabba mulina empiiya n'ensawo mubitwalane; n'oyo atalina mpirima atunde olugoye lwamwe agigule. 37 Kyawandiikibwe nti, ‘Yabalibwe nk'omwei oku bakoli ba bibbi’, era nkubakoba nti obulangi buni buteekwa okwikiira oku nje, buli kyona ekyampandiikiibweku kiri ampi okwikiira.”
38 Abeegesebwa baamwe ni bamukoba “Mukama bona ebiso mbini bibiri.” Nairamu, “Ebyo bikumala”.
39 Nk'obulinca oYesu n'ayaba oku Lusozi lwa Misaale gy'Oliva, n'abeegesebwa baamwe nibamusengeerya. 40 Nibaikire omu kifo ekyo, n'abakoba, “Musabe muleke kwingira mu kwoyeerwa.” 41 N'abeesorooraku akabbanga, n'afukamira n'asaba, 42 “Taata niwaabba n'osiimire ntoolaku ekikopo kini, ti mu kwendya kwange, baitu kyokwendya nikyo kikolebwe.” 43 Omalaika okuzwa omwiguru n'amubonekera n'amugumya. 44 Omu kulumwa okwingi n'asaba muno n'atuuya era entuuyo ni zisenseka nk'omusaayi.
45 Niyamaare okusaba n'airayo weyalekere abeegesebwa baamwe, n'abaaja nibawungukire nibakeerwe olwa bujune.
46 N'ababuulya, “Lwaki muwungukire? Mwimuke musabe muleke kugwa mu kwoyeerebwa.”
Okukwatibwa kwa Yesu
47 Niyaali nacabaza, abantu abaali nibeebembeirwe omusaiza eyayetebwanga oYuda, omwei okwikumi nababiri, nibaiza. OYuda niyaigereire oYesu, n'amugwa omu kisubba. 48 OYesu n'amubuulya “Yuda, oMwana wa Muntu okumugwa omu kisubba ege okumuliirana?”
49 Abeegesebwa baamwe nibaaboine ekyali kikwaba okubbaawo ni bakoba, “Mukama twaizire n'empirima zaiswe, tubateme?” 50 Era omwei oku bo n'atema omwei oku bairu ba kabona asinga obukulu, n'amwiyaku okutwi okwa gulyo.
51 Baitu oYesu n'akoba, “Lekera awo!” Nakwata oku kutwi kwa musaiza nakutamba! 52 OYesu n'akoba abakabona abakulu, n'abakulu ba balindi ba iramyo n'abakaire, abaizire okumukwata, “Okunyizira n'empirima n'enkubbo ndi munyagi? 53 Ebiro byona bye naali naanywe omu mbuga za iramyo, ka mutankwaite? Baitu ati mukunkwata kubba nibwo bwire bwanywe ng'ekiiruuma kikufuga.” 54 Ni bakwata oYesu, ni bamutwala omu maka ga kabona akusinga obukulu. OPeetero n'asengeerya niyeenagireku akabbanga. 55 Nibaali bamaare okuwemba omuuro akati omu lubuga nibaikaliire amwei, oPeetero yeena n'aikala nabo. 56 Akazyana ni kamubona oku kyengeezi kya muuro naikaliire, ni kamulingaasira ni kakoba, “N'omusaiza oni yaali naye.”
57 OPeetero ni yegaana n'akoba, “Mukali we timmumanyiire kaakimwei!”
58 Niwaayakairewo akaire, omuntu owondi n'abona oPeetero, n'amukoba, “Weena oli omwei okubo.” OPeetero n'airamu, “Musaiza we, nje tindi omwei oku bo.”
59 Niwaayakairewo esaawa nk'emwei, omuntu owondi n'akigumya, “Mazima oni yeena yaali amwei naye, kubba yeena Mugaliraaya.” OPeetero n'airamu, “Musaiza we byokubaza timbimaite!” 60 Niyaali nacabaza, amangu ago onkoko n'akooka. 61 OMukama oYesu nayinduka n'arola oku Peetero obwo oPeetero n'aizukira ekigambo oMukama kyeyamukobere; “Ekiro kya leero onkoko atakakookere waneegaana emirundi esatu.” 62 OPeetero n'azwa omu lubuga n'akunga muno.
Abalindi nibajeejeera oYesu n'okumukubba
63 Abasirikale abaali bakulinda oYesu ni bamujeejeera n'okumukubba. 64 Ni bamubbwa akagoye oku maiso ni bamukoba, “Ale baza! Naani akukubbire?” 65 Ni bamuzuma muno.
OYesu omu maiso ga lukiiko
66 Obwire nibwakeire olukiiko lwa bakaire: abakabona abakulu n'abeegesya b'amateeka ga diini, ni lwikaara, oYesu n'aleetebwa omu maiso gaalwo. 67 Ni bamukoba, “Niwaabba niiwe Kurisito, tukobere.” OYesu n'airamu, “Ninabakobera timwaikirize, 68 era ninababuulya, timwairemu. 69 Baitu okuliga ati OMwana wa Muntu akwiza okwikaara oku mukono ogulyo ogwa Kanca Akira byona.”
70 Boona boona ni babazira aiguru, “We oli Mwana wa Kanca?” N'abairamu, “Kyemukobere nikyo.”
71 Ni bakoba, “Tukyayenderyaki obujuurwa obundi? Tumwewuliriire omwenyenere nakubaza.”