21
Ekirabo kya namwandu
1 OYesu niyaimwire amaiso, n'abona abaguuda nibakuta ebirabo omu kifo awateekebwa ebirabo omu iramyo. 2 Nikwo okubona onamwandu omuseege nakutaamu obumpiiya bubiri. 3 N'akoba, “Kambakobere amazima, onamwandu oni omuseege awaireyo zingi okukira abantu boona. 4 Abantu bani boona boona bawaireyo oku bya buguuda ebibasaagireku; baitu onamwandu oni omu buseege bwamwe awaireyo kyona kyabbaire nakyo. ”
OYesu okulanga okuwereekeera kwa iramyo
5 Abamwei oku beegesebwa baamwe baali bakubaza oku ngeri eiramyo gyeryayombokerwe n'amabbaale agasai n'ebirabo ebyawongeibwe e wa Kanca. OYesu n'abakoba 6 “Kini kyemukubona ati, ekiro kikwiza niwatalisigala ibbaale liikaliire oku liralyalyo, buli limwei lirinagibwa ansi.”
7 “Mwegesya, bini byalibbaawo di? Era kabonero ki akaliranga bini nibiri ampi okubbaawo?”
8 Ye n'airamu, “Mwerinde muno mutalibeyegebwa. Baingi abaliiza omwibara lyange, nibakukoba, ‘Ninje oKurisito,’ era, ‘Ebiro biri ampi.’ Timubaikirizanga. 9 Nimwaliwura obulemu n'okwegunga, timutiinanga. Bini byona biribanza okwikiira, baitu empero necaali kwika.”
10 Era n'abakoba, “Eiyanga lirilwana n'eiyanga, obukama bulirwana n'obukama. 11 Walibbaawo omusisi owa maani n'omu bifo ebimwei walibbaawo enzala, endwaire, n'ebintu ebitiinisya n'obubonero obwa maano omwiguru.”
12 Baitu bini nibicaali kubbaawo, balibararanja ni babakwata. Balibaweeryayo omu makumbaaniro n'omu nkomo, era balibaita omu mbuga z'abakama n'abamasaza, olwakubba muli beegesebwa bange. 13 Kini kiribajuna okubba abakaiso bange. 14 Kini mukimanye nti: timuteekateekanga kye mwaliiramu nimukwejunaaniira. 15 Kubba ndibaweerya ebigambo n'amagezi abanyanzugu bye batalisobola kugaana gonze okuwakanisya. 16 Mu liriiranwa ababyaire, abanganda, abakika n'abanywi bamukago, era abamwei oku nywe balibaita. 17 Abantu boona boona balibanoba nibakubajunaana nje. 18 Baitu ndoowo gonze olusoke olumwei oku mitwe gyanywe oluliwerekeera. 19 Nimwaliguma mwalitunga obwomi obutawaawo.
OYesu akubaza oku kuwereekeera kwa Yerusaalemu
20 OYesu n'akoba, “Nimwalibona oYerusaalemu eiye nirikyeruguliirye, mwalimanya nti, okuwereekeera kwakyo kuli ampi. 21 Abo abalibba omu Buyudaaya bairukiranga mu nsozi, n'abali omu kibuga bazwangamu, n'abali omu byalo tibaingiranga mu kibuga. 22 Olwakubba buni nibwo bwire obwa kubonereza okwikiirya ebyawandiikiibwe byona. 23 Abakali abalina enda n'abakwonkya ka balibona enaku omu bwire obwo! Walibbaawo amabbano agakooto oku nsi n'ekiniga kya Kanca oku bantu bani. 24 Balibaitisya empirima, abandi balinyagwa ni batwalibwa omu manga goona. OYerusaalemu kirisambatiirwa abanyamanga okwikya obwire bwabwe nibuliwaayo.”
25 “Walibbaawo obubonero okwisana, oku kwezi n'oku nyenyeezi. Oku nsi amanga galibba mu kulumwa n'okutuntura olwakutuuta n'okucambaituka kwa nyanja. 26 Abantu balikaba olwa kutiina n'okutuntura olwa bintu ebiribba oku nsi, kubba eby'amaani omwibbanga byalitengeetebwa. 27 Omu biro ebyo balibona oMwana wa Muntu nakwizira omu kicu n'amaani n'ekitiinisya kingi. 28 Ebintu bini nibyalitandika okubbaawo, mwimukanga nimwimula emitwe gyanywe nimurola aiguru kubba okucungurwa kwanywe kulibba kwigereire. ”
OLufumo lwa mutiini
29 OYesu n'abakobera olufumo luni: “Mulowooze oku musaale omutiini amwei n'emisaale egindi gyona. 30 Nigijumba, kini mukibona ni mumanya nti ekyanda kiri ampi. 31 Omu ngeri nigyo gimwei, nimwalibona bini, mwetejanga nti obukama bwa Kanca bwigereire.”
32 “Kambakobere ekya mazima, omulembe guni tiguliwerekeera okwikya bini byona byona nibimaare okubbaawo. 33 Eiguru n'ensi biriwerekeera, baitu ebigambo byange tibiriwerekeera.
34 “Mwerinde emitima gyanywe gireke kwemaara ku butamiire, n'obubbi bwabwo n'okutuntura olwa bintu ebya bwomi buni, ekiro ekyo kireke kubaikaku nk'omutego nimutamaite. 35 Kubba ekiro kini kiriizira abantu boona aba ku nsi. 36 Ale mubonienge ebiro byona, nimukusaba musobole okubba n'amaani okwakala omu byona ebikwaba okubbaawo n'okwemeera omu maiso ga Mwana wa Muntu.”