20
OYesu bakumubuulya gyaiya obuyinza
1 Ekiro kimwei, oYesu niyaali n'akwegesya abantu omu mbuga ya Iramyo nakubakobera Amawuro Agasai, abakabona abakulu n'abeegesya b'amateeka, amwei n'abakaire ni baiza gyali. 2 Ni bamubuulya, “Tukobere obuyinza obukola ebintu bini obwiya ayi? Era naani yabukuwaire?”
3 Ye n'abairamu, “Njeena ka mbabuulye ekibuulyo. Munyiremu, 4 okubatiza kwa Yokaana kwalugire wa Kanca, kanda mu bantu?”
5 Baitu bo ni babazamu bonkai na bonkai nti, “Nitwamukoba nti, ‘Kwazwire wa Kanca,’ akwiza okutubuulya, ‘Obwo lwaki timwamwikiriize?’ 6 Yete nitwakoba nti, ‘Kwazwire mu bantu,’ abantu boona bakwiza okutukubba amabbaale kubba baikiriize nti oYokaana yaali mulangi.”
7 Obwo ni bakoba, “Titumaite gyekwazwire.”
8 OYesu n'akoba, “Njeena tinabakobere obuyinza obunkolesya bini gyembwiya.”
Olufumo lwa bapangisya ba ndumiro ya mizabbibbu.
9 Awo oYesu nikwo okusubiira abantu olufumo luni: “Waalowo omusaiza eyasimbire endumiro ya mizabbibbu, n'agipangisya abalumi ye n'ayaba omu nsi y'alai, n'alwayo. 10 Ebiro bya ku kunokola ni byaikire, n'atuma omwei oku bairu baamwe egiri abapangisya bamuweeryeku ebyana bya mizabbibbu. Baitu abapangisya ni bamukubba ni bamupeka nambula kantu. 11 Nikwo okutuma omwiru owondi, baitu yeena ni bamukubba, ni bamuwemulawemula, ni bamupeka nambula kantu. 12 N'aira n'atuma omwiru owakasatu, yeena ni bamuwutaaza ni bamupeka.”
13 “Omukama wa ndumiro ya mizabbibbu nikwo okwebuulya ati, ‘Nakola ntyai? Natuma omwana wange, gwe ntaka omuno; Kanda ye bamuweerya ekitiinisya.’ ”
14 “Baitu abapangisya ni baamuboine, nibaakobangana bati, ‘Oni niye mugwetwa waamwe,’ ‘Leka tumwite, endumiro ebbe yaiswe.’ 15 Bo nikwo okumuwulukya omu ndumiro ya mizabbibbu, ni bamwita.
“Mukulowooza omukama wa ndumiro ya mizabbibbu alibakola atyai? 16 Aliiza n'aita abapangisya abo, endumiro egyo n'agiweerya abandi.” Abantu nibawuliire kini ni bakoba bati, “Kini kireke kubbaawo!”
17 Baitu oYesu n'abaroleera n'abuulya, “Ale ekyawandiikiibwe kini kimanyisya ki:
“ ‘Eibbaale abomboki lye bagaine
ati lifookere erya ku nsonda?’
18 Omuntu yeena yeena aligwa oku ibbaale lini alicwacwanuka, n'oyo gwe lirigwaku lirimwatyayatya.”
19 Abeegesya b'amateeka n'abakabona abakulu ni basala amagezi aga kumukwatirawo, kubba baakyetejerye nti olufumo luni lukwaite ku nibo. Baitu ni batiina abantu.
Ekibuulyo oku kuwa omusolo
20 Nibaali bakulindiirya obwire obusai obwa kumukwatiramu, ni batuma abakeiti nibakwesanisiirya abantu ab'amazima. Nibakusuubira okumukwatisya omu bigambo byakubaza leke bamuweeryeyo egiri omukama oMurooma. 21 Abakeiti ni bamubuulya: “Mwegesya, tukimaite nti obaza n'oyegesya ebiikire, era nga we tosoroora mu bantu, baitu oyegesya oku muwanda gwa Kanca nk'amazima nigali. 22 Kisemeire iswe okuweerya oKaisaali omusolo kanda bbe?”
25 Ni bairamu, “Kya Kaisaali.” OYesu n'abakoba, “Ale ebya Kayisaali mubiweerye oKaisaali, n'ebya Kanca mubiweerye oKanca.”
26 Nibaalemerwe okumukwatisya omu kigambo kyona kyona omu maiso g'abantu, ni basirikambe nibakwewuunya engeri gye yabairemu.
ABasadukaayo bakubuulya ebikukwata oku kuyimbooka
27 Abamwei oku Basadukaayoa abakoba nambu ndooyo kuyimbooka, ni baiza e wa Yesu ni bamubuulya, 28 “Mwegesya, oMusa yatuwandiikiire eiteeka erikoba nti: Omusaiza ni yaafanga n'aleka omukali, natabyaire mwana, omugande ateekwa okuswera onamwandu okubyara orufa abaana. 29 Ale niwaakulowo abaluganda musanju; omukulu n'aswera omukali, baitu n'afa atabyaire mwana. 30 N'owakabiri n'aswera onamwandu oyo baitu yeena n'afa, 31 n'owakasatu atyo, boona omusanju nibafa batabyaire baana. 32 Kyairai omukali yeena n'afa. 33 Ale ekiro kya kuyimbooka onamwandu alibba mukali wa naani, kubba boona omusanju baamusweireku?”
34 OYesu n'abairamu ati, “Abantu ba biro bini baswera amwei n'okuswerwa. 35 Baitu abantu abalibba basemeire okuyimbooka n'okubba omu mulembe ogwo tibaliswera gonze okuswerwa. 36 Tibaliiramu kufa kubba balibba nk'abamalaika. Balibba baana ba Kanca kubba balibba bayimbookere. 37 N'oMusa yagumirye ekya kuyimbooka kwa bafu, niyawandiikire oku kwaka kwa kisaka, niyayetere oKanca, ‘OKanca wa Ibbulaimu, oKanca wa Isaaka era oKanca wa Yakobo.’b 38 Ye ti Kanca wa bafu baitu owa boomi, olwakubba egiri Ye boona boona boomi.”
39 Abamwei oku beegesya b'amateeka ni bakoba, “Mwegesya obazire kusai.” 40 Okuliga okwolwo, ndoowo wondi eyepampalikire okumubuulya ekibuulyo ekindi.
OKurisito n'oDawudi
41 OYesu n'ababuulya ati, “Lwaki abantu bakoba nti, oKurisito Mwana wa Dawudi?” 42 Yete oDawudi omwenyenere omu kitabo kya zabbuli, akoba ati:
“OMukama yakobere oMukama wange nti:
‘Ikaara oku mukono ogulyo
43 okwica nindifoola abanyanzugu baamu entebe ya magulu gaamu.’
44 ODawudi niyaabba amweta Mukama waamwe, obwote asobola atyai okumweta omwana waamwe?”
Okwerinda abeegesya b'amateeka
45 Abantu boona nibamuwuliriirye, oYesu n'akoba abeegesebwa baamwe ati, 46 “Mwerinde abeegesya b'amateeka abendya okubonebwa nibazwaire engoye eza muwendo ezikukweya, era okulamucibwa omu butale n'okwikaara omu bikaaro ebya kitiinisya omu makumbaaniro n'omu bikaaro ebya kitiinisya oku bugenyi. 47 Bagobya ebintu bya banamwandu ale ni basaba esaala ezinyamulai abantu leke babawaisye. Bani balibonerezebwa muno.”