19
OZaakayo omusoroolya wa musolo.
1 OYesu n'aingira omu Yeriko, n'atambula n'akwakalamu. 2 Omu Yeriko mwalimu omukulu w'abasoroolya ba musolo, omuguuda, eyayetebwanga Zaakayo. 3 OZaakayo yayenderye okubona oYesu baitu olwakubba yaali mumpi n'atasobola olw'abantu abanyamwingi. 4 Awo n'airuka ni yeebemberamu n'atemba omusaale omusikamoowa leke amubone, anti oYesu yaali akutwalibwa muwanda ogwo.
5 OYesu niyaikire oku musaale n'arola aiguru n'amukoba, “Zaakayo anukayo olwakubba ekiro kyaleero nteekerwe okucaalaku e waamu.” 6 OZaakayo n'anukayo mangu n'amutangiira n'okusemereerwa.
7 Abantu boona boona nibaaboine kini ni batandika okwetongolola nti, “Ayabire okucaara omukoli wa bibbi.”
8 OZaakayo n'ayemeera n'akoba oMukama nti, “Mukama ekimwei ekyakabiri ekya itungo lyange nkwiza okukigabira abaseege. Era niwaabbaawo omuntu yeena yeena gwenagoberyeku ekintu kyona kyona, nkwiza kumuliyira emirundi enai.”
9 OYesu n'amukoba, “Ekyaleero okujunwa kwizire omweka gini, olwakubba omusaiza oni yeena mwana wa Ibbulaimu. 10 Anti oMwana wa Muntu yaizire kutoolya n'okujuna abaabuure.”
Olufumo lwa mina
11 Nibaali bakuwuliirya bini n'abakobera n'olufumo, olwakubba yaali n'ali ampi n'e Yerusaalemu era abantu nibakulowooza nti obukama bwa Kanca bukwaba kwizirawo. 12 N'abakoba, “Omusaiza owa kitiinisya yayabire omu nsi ey'alai okuweebwa obukama niyamala aire. 13 Niyaali acaali kwaba, n'ayeta ikumi oku baweereza baamwe n'abaweerya eminaa ikumi. N'akoba, ‘Muzisuubulisye okwikya nindiira.’ ”
14 “Baitu olwakubba abantu ba mu nsi yaamwe baali bamunobere, ni batuma abakwenda nibakumulugaku enyuma leke bakobe nti, ‘Titukwendya musaiza oyo kubba mukama waiswe.’ ”
15 Baitu n'aweebwa obukama era n'aira omu nsi yaamwe. Niyaire n'ayetesya abaweereza beyawaire empiiya leke abone nibaabba baazigobeseryemu.
16 “Eyekereire n'aiza n'akoba, ‘Mukama wange, emina yaamu ebyaireyo ezindi ikumi.’ Omukama waamwe n'amwiramu nti,”
17 “ ‘Weebale, oli muweereza musai!’ Nka n'obbaire omwesigwa oku kintu ekidooli, nkuwaire obuyinza okufuga ebibuga ikumi.”
18 “Owakabiri n'aiza n'akoba, ‘Mukama wange emina yaamu ebyaireyo ezindi itaanu.’ ”
19 “Omukama waamwe n'amwiramu, ‘Nkuwaire obuyinza okufuga ebibuga bitaanu.’ ”
20 “N'omuweereza owondi n'aiza n'akoba ati, ‘Mukama wange emina yaamu ngini, nagiziringire omu kigoye ni ngibiika. 21 Nakutiinire olwakubba ota musaiza muzubu. Otwala ekitali kyamu, okesa bwotasigire.’ ”
22 “Omukama waamwe n'amwiramu, ‘Oli muweereza mubbi! Ebigambo byobazire nibyo nakusaaramu omusango. Niweetejerye ninta muzubu, nintwala ekitali kyange era ninkesa bwentasigire, 23 lwaki empiiya zange otazibiikisirye basuubuli, ale ninakwire ni nzifuna n'amagoba gazo?’ ”
24 “Omukama nikwo okukoba abaali nibeemereire awo nti, ‘Mumwiyeku emina yaamwe mugiweerye odi alina eikumi.’ ”
25 “Ni bamukoba, ‘Mukama waiswe ye asangirwete nalina emina eikumi!’
26 “Nairamu ati, ‘Kambakobere nywe, akalinawo alyongerwaku ebindi, n'oyo atalinawo n'ekyalinawo kirimwiyibwaku. 27 Baitu abanyanzugu bange abo abatansiimire kubba mukama waabwe mubaleete mubaitire ani omu maiso gange.’ ”
OYesu okwingira omu Yerusaalemu n'ekitiinisya
28 OYesu niyamaare okubaza kini ni yeebembera abeegesebwa baamwe okwaba e Yerusaalemu. 29 Niyaigereire e Besifaageb n'e Besaniya, oku lusozi olwetebwa olwa Oliva, n'atuma babiri oku beegesebwa baamwe, n'abakoba, 30 “Mwabe oku kyalo ekiri omu maiso gaanywe, nimwabba mukukitandika muti, mukwiza okubona omwana wa ndogoyi abbwerwe, ataikaarwangaku muntu yeena yeena mumusandabule mumuleete ani. 31 Omuntu yeena yeena niyababuulya nti, ‘Lwaki mukumusandabula?’ Mumukobe nti, ‘OMukama akumwendya.’ ”
32 Abaatumiibwe ni baaba, ni basangambe ni kiri nka niyabakobere. 33 Nibaali bakusandabula omwana wa ndogoyi abakama baamwe ni bababuulya, “Lwaki mu kusandabula omwana wa ndogoyi?”
34 Ni bairamu nti, “OMukama akumwendya.”
35 Ni bamuleeta egiri Yesu, ni bamwaliiraku engoye zaabwe ni baikalisyaku oYesu. 36 Niyaali nakwaba, abantu ni baaliira engoye zaabwe omu muwanda.
37 Niyaali naigereire e Yerusaalemu, nakusirimuka okuluga oku lusozi lwa Oliva, ekibiina kyona ekya beegesebwa baamwe omu kusemereerwa okwingi ni bawaisya oKanca omu maraka ag'aiguru olwa byamaano byebaali baboine ni bakoba bati,
38 “Awairwe omukisa oMukama akwizira omwibara lya Kanca!”
“Emirembe gibbe omwiguru n'ekitiinisya kibbe aiguru omuno!”
39 Abamwei oku Bafalisaayo abaali omu kibiina ni bakoba oYesu nti, “Mwegesya koba oku beegesebwa baamu, bakututokooteera!”
40 OYesu n'abairamu nti, “Kambakobere, nibaasirika amabbaale gaakokooma.”
OYesu akukungiraku oYerusaalemu
41 Awo niyaali akwigeera ampi n'e Yerusaalemu, n'abona ekibuga n'akikungiraku nakukirumiriirwa, 42 n'akoba ati, “Akiri, we omu boona boona, ekiro kyaleero niwaakumaite ekireeta emirembe! Baitu ati kikubbisirweku. 43 Ebiro birikwizira abanyanzugu baamu nibalikukubbaku olukorogo okukweruguurya, leke bakufundye buli rubaju. 44 Balikwendawo n'abantu baamu okwikira kimwei okwitakali. Tibalireka ibbaale niliri oku liira lyalyo, olwakubba tiweetejerye biro oKanca bye yaiziiremu okukujuna.”
OYesu okwiramyo
45 Awo n'aingira omu mbuga ya iramyo, n'atandika okupekamu abaali bakutundiramu. 46 N'abakoba, “Kyawandiikiibwe kiti, ‘Enyumba yange yaakubbanga nyumba yakusabiramu,’ baitu nywe mugifoire, ‘Mbiso ya banyagi.’ ”