18
Olufumo lwa namwandu n'omulamuli
1 OYesu nikwo okukobera abeegesebwa baamwe olufumo okubalanga nka nibalina okusabanga obutaiyisyaku. 2 N'abakoba, “Omu kibuga ekimwei mwalumu omulamuli ataatiinanga Kanca gonze okufa oku bantu. 3 Era waalowo onamwandu omu kibuga eyaizanga gyali n'amusaba, ‘Ndamula n'omunyanzugu wange.’ ”
4 “Omulamuli n'alwawo nacagaine okumulamula, niyamaare ni yeiramu n'akoba, ‘Nebwenaabba ntatiina Kanca gonze okufa oku bantu, 5 baitu olwa kungadya onamwandu oni kwangadirye namulamula alekere awo okungadya nakwizanga obutaiyisyaku.’ ”
6 Omukama n'aira n'akoba, “Muwure omulamuli oyo atali wa mazima kyeyakoore. 7 OKanca talilamula n'amazima abakomye baamwe abamukungiira emisana n'obwire? Alikeereerwa okubalamulamula? 8 Nkambakobere alibalamula mangu. Baitu oMwana wa Muntu naliiza aliyaja okwikiriza oku nsi?”
Olufumo lwa Mufalisaayo n'o musoloolya wa musolo
9 Abo abeerowoozanga okubba abaikiriire era nibakugaya abantu abandi, oYesu n'abakobera olufumo luni: 10 “Abasaiza babiri baayabire omwiramyo okusaba, omwei yaali Mufalisaayo n'owondi yaali musoroolya wa musolo. 11 OMufalisaayo n'ayemeera ni yeesabira ati: ‘Kanca nkukwebalya kubba tindi nk'abantu abandi, abanyagi, abagobya, abasiyani—gonze nk'oni omusoroolya wa musolo. 12 Nsiiba emirundi ebiri omu wiiki era mpeerya ekimwei kyaikumi oku buli kintu kyona kye ntunga.’ ”
13 “Baitu omusoroolya wa musolo n'ayemeera niyeenagireku akabbanga. Natakusobola na kurola aiguru, baitu ni yeekubba omu kisubba n'akoba ati, ‘Kanca, nsaasira nje omusiisi.’ ”
14 “Kambakobere omusaiza oni yaireyo e waamwe ng'ali kusai omu maiso ga Kanca okukira odi owondi. Buli muntu eyeekulya alibundaazibwa, n'oyo eyebundaaza alikulisibwa.”
OYesu akuweerya abaana abato omukisa
15 Abantu ni bamuleetera n'abaana abato okubakwataku. Abeegesebwa nibaakiboine ni babanenya. 16 Baitu oYesu n'ayeta abaana abato n'akoba, “Muleke abaana abato baize e gyendi, mutabagaana, kubba obukama bwa Kanca bw'abo abaisana nka bani. 17 Mazima nkubakobera, ataikiriza bukama bwa Kanca nk'omwana omuto talibwingiramu.”
Omufuzi omuguuda
18 Omufuzi omwei n'amubuulya, “Mwegesya omusai, nkole ki okugweta obwomi obutawaawo?”
19 “OYesu n'amwiramu, ‘Lwaki okunyeta omusai’ Ndoowo musai okwiyaku oKanca yenkai. 20 ‘Amateeka ogamaite: otalisiyana, otaliita, otaliwangiirya mwiraawo, oitewo n'omaawo obatangamu ekitiinisya.’ ”
21 Omusaiza n'airamu, “Bini byona byona mbiikiriirye okuzwa omu buto bwange.”
22 OYesu niyawuliire kini, n'amukoba, “Ocabulwaku ekintu kimwei. Tunda ebyamu byona byona empiiya ozigabire abaseege, ofune obuguuda omwiguru. Ale oize onsengeerye,”
23 Niyawuliire kini, nakwatibwa obujune kubba yaali muguuda muno. 24 OYesu n'amuroleera n'amukoba “Ka kizibu abaguuda okwingira omu bukama bwa Kanca! 25 Kyangu munno oŋamira okwakala omu kawulu ka nkinzo okusinga omuguuda okwingira omu bukama bwa Kanca.”
26 Abaawuliire kini ni babuulya, “Obwote naani asobola okujunwa?”
27 OYesu n'airamu, “Ebitasoboka egiri abantu bisoboka egiri oKanca.”
28 OPeetero n'amukoba, “Twalekerewo ebyaiswe byona nitukusengeerya!”
29 OYesu nabakoba, “Kambakobere amazima, ndoowo eyalekere eka yaamwe oba mukali oba mugande oba ababyaire baamwe oba abaana baamwe oku lwa bukama bwa Kanca 30 atalifuna ebikusinga obwingi omu mulembe guni, n'obwomi obutaliwaawo omu mulembe ogukwiza.”
OYesu akwiramu okulanga okufa kwamwe
31 OYesu n'airya eikumi nababiri oku ntando n'abakoba, “Tukutembatemba okwaba e Yerusaalemu, ebya wandiikiibwe abalangi oku Mwana wa Muntu byona byona gye byaikiriira. 32 Akwiza okuweebwayo egiri abanyamangaa. Balimukiina, bamuzume, bamucwere ebicwantai, balimusuunyab ni bamwita. 33 Baitu ekiro kyakasatu aliyimbooka.”
34 Kini abeegesebwa tibaakyetejerye gonze akadooli. Amakulu gaakyo gaali gababbisirweku, era tibaamaite kye yabazangaku.
Omusabiirya omwigali wamaiso akulibbulya
35 OYesu niyaigereire oYeriko, omwigali wa maiso yaali n'aikare oku ntando wa luguudo nakusabiirya. 36 Niyawuliire abantu nibakwakalawo, n'abuulya kiki ekiriwo. 37 Ni bamukoba, “OYesu oMunazaaleesi niye akwakala.”
38 N'akokooma “Yesu! oMwana wa Dawudi, nkwatirwa ekisa!”
39 Abaali nibeebembeire ni bamwamira, “Sirika.” Naye ye ni yeeyongera oku kokoomera kimwei, “OMwana wa Dawudi, nkwatirwa ekisa!”
40 OYesu n'ayemeera, n'alagira bamumuleetere. Niyaigereire oYesu, n'amubuulya, 41 “Okwendya nkukoore ki?”
N'amwiramu, “Mukama, nkwendya ndibbulye.”