17
Ekibbi, n'okusaasira
1 OYesu n'akoba abeegesebwa baamwe, “Ebintu ebiretera abantu okugwa omu kibbi tebirigaana kwiza, baitu zimwajirye oyo abireeta. 2 Kyakuli kisai omuntu oyo okunagibwa omu nyanja nabbwerwe emengo omwikoti okusinga okusiisisya omwei oku baana bani abato. 3 Ale mwerinde.
“Omugandaawo nakolanga ekibbi munenye, niyeenenya, musaasire. 4 Nakukolanga ekibbi emirundi musanju olunaku, baitu n'aira gyoli emirundi musanju buli mulundi n'akukoba, ‘Neenenyeze,’ oteekwa okumusaasira.”
Okwikiriza
5 Abakwenda nibakoba oMukama, “Twongereku okwikiriza!”
6 OYesu n'abairamu nti, “Nimwakuli n'okwikiriza gonze okudooli nk'akasigo ka kaladaali mwakukobere omukenene guni, ‘Tiduka weesimbe omu nyanja,’ gwona gwakubawuliire.
Okuweereza okwikire
7 “Naani oku nywe nabba n'omwiru akuluma oba akuliisya entaama, asobola okumukoba naire okuzwa oku musiri nti, ‘Iza oikaare olye?’ 8 Tiyaakumukoberembe nti, ‘Nteekaniriza emere, ozwale kusai ompeereze ninkulya ninkunywa era niwamala weena leke olye?’ 9 Omukama waamwe yaakumwebaarye olwa kukola kye yalagiirwe? Bbe. 10 Omu ngeri nigyo gimwei nywena nimumalanga okukola bye mulagiirwe byona mukobenge, ‘Iswe tuli bairu-bwiru; tukoore kye tuteekerwe okukola.’ ”
Okutamba abagenge eikumi
11 OYesu niyaali okwaba e Yerusaalemu, n'ayakaara oku nsaro ya Samaliya n'e Galiraaya. 12 Niyaali akwingira omu kyalo, abasaiza ikumi abagenge ni bamutangarana. ni beemeera alaiku. 13 Ni baamiira bati, “Yesu Mukama waiswe, tukwatirwe ekisa!”
14 Niyababoine, n'akoba, “Mwabe mwerange egiri abakabona.” Nibaali bakwaba ni basemezebwa.
15 Omwei oku bo niyaboine asemezeibwe, n'aira nakuwaisya oKanca, nakubazira aiguru. 16 N'agwa oku magulu ga Yesu n'amwebalya. Omusaiza oyo yaali Musamaliya.
17 OYesu nabuulya, “Boona boona eikumi tibaasemezeibwe? Omwenda bali ayi? 18 Ndowo n'omwei oku bo aire okuwaisya oKanca okwiyaku oni omunyamanga?”
19 Ale awo n'amukoba, “Imuka oyabe; okwikiriza kwamu kukutambire.”
Okwiza okwa bukama bwa Kanca
20 Ekiro kimwei aBafalisaayo baabwirye oYesu, “Obukama bwa Kanca buliiza di?” OYesu n'airamu ati, “Obukama bwa Kanca tibwiza mu lwatu, 21 era abantu tibalikoba bati, ‘Mbuni ani oba mbudi adi,’ olwakubba obukama bwa Kanca buli mu niinywe.”
22 N'akoba abeegesebwa baamwe, “Ebiro bikwiza nimwalyendya okubona ekimwei oku biro bya Mwana wa Muntu, baitu timwalibibona. 23 Abantu balibakoba, ‘Mubone oMwana wa Muntu ngodi adi,’ oba ‘Ngoni ani,’ timuwulukanga kubasengeerya. 24 Nk'onkuba naserya n'amoleka eiguru okuzwa oku rubaju olumwei n'aika oku rubaju olundi, nimwo kyalibba kityo oku kiro kya kwira kwa Mwana wa Muntu. 25 Baitu ateekwa okusooka okubonaabona omuno n'okugaanibwa aba mulembe guni.”
26 “Nka nikyali omu biro bya Nuuwa, nimwo kyalibba kityo omu biro bya kwira kwa Mwana wa Muntu. 27 Abantu baali nibakulya, nibakunywa, nibakuswera n'okusumbirwa okwikya oku kiro oNuuwa kweyaingiriire eryato. Omwizulo ni gwiza ni gubazikya boona boona.”
28 “Era kyali kityo oku mulembe gwa Loti. Abantu baali nibakulya, nibakunywa, nibakugula, nibakutunda, nibakusiga ensigo, n'okwomboka, 29 okwikya ekiro oLoti niyazwire omu Sodoma. Omuuro n'obunyota ni bitoonya okuluga omwiguru ni bibazikya boona.”
30 “Nimwo kyalibbambe kityo oku kiro kya Mwana wa Muntu kyalibonekeramu. 31 Ekiro ekyo omuntu alibba oku lukanga lwa nyumba, ebintu byamwe nibiri omu nyumba tairanga ansi kubiiyamu. N'oyo alibba oku musiri tairanga eka. 32 Mwizukire ebyaikire oku mukali wa Loti!a 33 Buli ajuna obwomi bwamwe alibufeerwa, n'oyo aweeryayo obwomi bwamwe alibujunab. 34 Kambakobere, ekiro ekyo obwire abantu babiri balibba babbasirye omu kitabu kimwei; omwei alitwalibwa owondi alilekebwa. 35 Abakali babiri balibba bakusya obwita oku mengo gimwei, omwei alitwalibwa n'owondi alekebwe.” 36 [Abasaiza babiri balibba oku musiri, omwei alitwalibwa owondi alisigala.]c
37 Abeegesebwa baamwe ni bamubuulya, “Bini byalibba ayi?”
N'abairamu, “Awali omulambo, niwo ensega zikumbaanira.”