16
Omubiiki omugobya
1 OYesu n'akoba abeegesebwa baamwe nti, “Waaliwo omusaiza omuguuda eyaalina omubiiki waamwe. Omubiiki oni ni bamuloopa olwa kusiisasiisa ebyamubiikisiibwe. 2 Omubiikisya waamwe n'amwetesya n'amubuulya nti, ‘Bini bye nkukuwuuraku biri bityai? Mbaara bye nyakubiikisirye olwakubba tocasobola kubba mubiiki wange.’ ”
3 “Omubiiki n'akoba omu mwoyo gwamwe, ‘Ati nkole ki? Omukama wange akwaba okuntoolaku omulumu gwange, amaani agakuluma tindinago n'okukodoomeerya kukunkwatisya ensoni. 4 Ati kye nakola, leke abantu bantangiire omu maka gaabwe nibampekere oku mulimu, nkikengere.’ ”
5 “N'ayetesya buli omwei omukama waamwe gwe yatonganga; n'abuulya eyasookere nti, ‘Omukama wange akukutonga ki?’ ”
6 “Eyatongebwanga n'airamu nti, ‘Ebidomola bya mafuta kikumi munsanju nabitaanua.’ Omubiiki n'amukoba, ‘Toola endagaano yaamu oyabe mangu owandiike kinaanai namusanju n'ekitundu.’ ”
7 “N'abuulya owondi, ‘Wete okutongebwaki?’
“Oyo n'amwiramu, ‘Ebigega bya ŋaano lukumib.’
“Omubiiki n'amukoba, ‘Toola endagaano yaamu owandiike lunaanai.’ ”
8 “Omuguuda n'atenda omubiiki oni omugobya olw'amagezi ge yasaare.” OYesu n'akoba, Kini kikulanga nti abantu aba nsi babba bagezigezi omu nkolagana yaabwe okukira abantu aba isana. 9 Kambakobere, mukolesye eitungo lya ku nsi okwenywanira, ale nilyalibba liweirewo, mutangiirwe omu maka gaanywe agataliwaawo.
10 Akabba omwesigwa oku bidooli n'oku bingi abba mwesigwa. N'oyo atabba mwesigwa oku bidooli n'oku bingi tabba mwesigwa. 11 N'olw'ekyo, nimwabba mutabbaire beesigwa omu nkwata ya itungo lya ku nsi, naani alibeesiga oku buguuda obwenyenere? 12 Era nimutaabbe beesigwa oku bintu ebya muntu owondi naani alibaweerya ebyanywe.
13 “Ndoowo muweereza asobola okuweereza abakama babiri. Akiri agaya era n'anoba omwei, n'ayendya era ni yeemaara oku wondi. Timuyinza kwendya bikali bibiri oKanca n'eitungo lya nsi.”
14 ABafalisaayo abaayendyanga eitungo lya nsi nibaawuliire bini ni bamuseka. 15 Ye n'abakoba, “Nywe muli bantu abalanga abandi nti mwikiriire, baitu oKanca amaite emitima gyanywe. Abantu kye batumbya, omu maiso ga Kanca kibba kibbi.”
Amateeka ga Musa n'obukama bwa Kanca
16 Amateeka ga Musa n'ebigambo ebyawandiikiibwe abalangi byalangiriirwe okwikya omu biro bya Yokaana oMubatiza. Okutandikira omu biro ebyo, Amawuro Agasai aga bukama bwa Kanca gakubuulirwa era buli omwei akwekamba okubwingira. 17 Kyangu ensi n'eiguru okuwaawo okusinga akatundu ka nyuguta akamwei okuluga omu mateeka.
18 Omuntu apeka omukali waamwe n'abandula owondi abba asiyaine, n'omusaiza abandula omukali eyapekerwe abba asiyaine.
Omusaiza omuguuda n'oLazaalo
19 Waalowo omusaiza omuguuda eyazwalanga engoye za kikingo n'eza liiri era eyaabbanga omu bwomi bwa kwejalabya. 20 Oku mulyango gwamwe waabbangawo omusaiza omuseege eyaali naizwire ebyoya, eyayetebwanga Lazaalo. 21 OLazaalo yeegombanga okulya obukunkumukire okuluga oku meeza ya muguuda, n'embwene zaizanga ni zikombeera ebyoya byamwe.
22 “Ebiro nibyaikire omusaiza omuseege n'afa, abamalaika ni batwala omwoyo gwamwe okubba amwei n'oIbbulaimu. Omuguuda yeena n'afa n'aziikibwa. 23 Niyaali omu geyeena omu kulumwa okwingi n'aimula amaiso, n'abona oIbbulaimu, oLazaalo namuli e rubaju. 24 Namwamiira nakukoba, ‘Ibbulaimu, itewange nkwatirwa ekisa otume oLazaalo ainike akasonga ka kyala kyamwe omu maizi leke awoleerye olulimi lwange, olwakubba nkubabiirwa omu muuro guni.’ ”
25 “OIbbulaimu n'airamu, ‘Mwana wange, Izukira niwaali nocaali mwomi n'otunga ebyamu ebisai baitu oLazaalo n'abona ebibbi. Ati ye akusemereerwa, we okubabiirwa. 26 Ekindi akati waiswe naawe watairwewo olwina abantu batasala kuliga eni kwiza eyo, oba okuzwa eyo okwiza egye tuli.’ ”
27 “N'airamu ati, ‘Itewange, nkwesengereirye tuma oLazaalo egiri aba kika kyange, 28 olwakubba waliyo abaganda bange bataanu. Abalabule boonate bataliiza mu kifo kini ekya bulumi obwingi.’ ”
29 “OIbbulaimu n'airamu, ‘Balina oMusa n'abalangi, babawuliirye.’
30 “Omuguuda n'akoba nti, ‘Bbe, itewange Ibbulaimu, omwei oku bafu niyayaba gyebali bakwiza kwenenya.’
31 “OIbbulaimu n'amukoba, ‘Nibaabba batawura Musa n'abalangi bazira kwikiriza gonze omuntu niyayimboka.’ ”