15
Olufumo lwa ntaama eyabuure.
1 Ekiro kimwei abasoroolya ba musolo baingi n'abasiisi baakumbaine okuwuliirya oYesu. 2 Baitu aBafalisaayo n'abeegesya b'amateeka nibaakiboine, ni bagongoizoka bati, “Oni aigerya abasiisi, n'alya nabo!”
3 OYesu nikwo okubasubiira olufumo luni: 4 “Omwei oku nywe nabba n'entaama ekikumi baitu omwei oku zo nabula, taleka ekyendai nomwendai omu kisiko asai n'ayaba okuswaga abuure, okwikya namubona? 5 Namubona, amuta okwibega n'amutwala eka nasemereirwe. 6 Naika eka ayeta abanywani baamwe n'abataayi baamwe n'abakoba ati, ‘Musagaruke nanje; ontaama wange eyaali abuure mmuboine.’ 7 Kambakobere, omu ngeri nigyo gimwei, wabbaawo okusemereerwa kwingi omwiguru olwa musiisi omwei eyeenenya, okukira abantu ekyendai nomwendai abaikiriire abatataka kwenenya.
Olufumo lwa rupiiya eyabuure
8 “Oba mukali ki abba n'erupiiya eikumi n'abulwaku egimwei, atakoleerya taala, n'ayeya enyumba, n'aswaganiirya okwikya nagibona? 9 Yeena n'agibona, ayeta abanywani n'abataayi baamwe n'abakoba, ‘Munsemereerweku; erupiiya yange eyaali nebuure ngiboine.’ 10 Kambakobere omu ngeri nigyo gimwei, oKanca n'abamalaika baamwe basemereerwa omusiisi omwei eyeenenya.”
Olufumo lwa mwana eyabuure
11 OYesu n'abakoberate olufumo olundi, “Waalowo omusaiza eyaalina abataani baamwe babiri. 12 Omuto n'akoba oitewaamwe ati, ‘Taata, mpeerya omugabo gwa bugwetwa bwange.’ Oitewaabwe n'ababaganiryamu ebintu byamwe.”
13 “Niwaakaire ebiro bidooli, omwana omuto n'akumbania ebintu byamwe byona, n'ayaba omu nsi e y'alai. N'asiisirasiisira eyo ebintu byamwe omu ngeso ezibbi. 14 Niyabimaarewo byona, ni wagwa enzala gingi omu nsi egyo yoona yoona, n'atandika okutaaga olwa nzala. 15 Nikwo okwaba okukoora omuntu omu nsi egyo eyamuwaire okuliisyanga emberege omu iriisiryo lyamwe. 16 Yayendyanga okulya ebimere emberege bye zaalyanga, baitu niwatalowo akubimuweerya.”
17 “Baitu niyairemu akabugezi n'akoba, ‘Abakoli ba itewange baingai abalya emere ni baikuta n'esaagawo, baitu nje nkufeera ani enzala! 18 Nkwiza okwimuka nyireyo e wa itewange mukobe: Itewange nsiisire egiri oKanca n'omu maiso gaamu. 19 Tincalooma na kwetebwa mwana waamu; nfoola nk'omwei oku bakoli baamu.’ 20 Nikwo okwimuka n'airayo e wa itewaamwe.”
“Niyaali n'acaali alaiku oitewaamwe n'amulingaasira, n'amusaasira, n'airuka, n'ayaba gyali, n'amugwa omu kisubba.
21 “Baitu omwana n'amukoba, ‘Itewange nsiisire egiri oKanca n'egiri we. Tincalooma kwetebwa mwana waamu.’
22 “Baitu oitewaamwe n'akoba abairu baamwe ati, ‘Mulabukeku! Muleete ekizwalibwa ekikusinga obusai, mukimuzwalikisye. Mumuzwalikisye empeta n'enkaito. 23 Muleete ondaawo omunoli mumwite leke tusumbe obugenyi; tusemereerwe. 24 Kubba omwana wange yaali nafiire baitu ati ayimbookere; yaali nabuure baitu ati azyawukire.’ Obwo ni batandika okusemereerwa.”
25 “Omwana omukulu yaali nacaali ku musiri. Niyaali nakwira, nali ampi okwika eka, n'awura engoma n'ebyembo nibakubina. 26 Nikwo okweta omwei oku bairu n'amubuulya ekiri eka. 27 Ye n'amwiramu, ‘Omugandaawo aizire, n'oiteewo amwitiire ondaawo omunoli olwakubba aire nali mwomi kusai.’ ”
28 “Omwana omukulu n'agongera n'agaana okwingira. Nikyo oitewaamwe yawulukiire enzai n'amwesengeerya aingire. 29 Baitu omwana n'amukoba, ‘Nje mbaire naawe emyaka gini gyona ninkukuweereza era tingaanangaku gonze omulundi ogumwei kyonkoba. Era mazima tompeeryangaku gonze akabbuli okukalya n'okusemereerwaku n'abanywani bange. 30 Baitu omwana waamu oni eyasiisiresiisire ebintu byamwe omu bamalaaya naire, omwitiire ondaawo omunoli!’