14
Yesu okutamba omusaiza eyazimbagataine
1 Ekiro kya Sabbiiti kimwei oYesu niyayabire okulya omu maka ga mukulu w'aBafalisaayo, abantu abaalowo ni bamuwanga amaiso. 2 Omu maiso ga Yesu waalowo omusaiza eyaali azimbagataine emikono n'amagulu. 3 OYesu n'abuulya aBafalisaayo n'abeeteja b'amateeka, “Omu mateeka kiikirizibwa okutamba oku Sabbiiti kanda bbe?” 4 Nibataamwiremu kigambo, oYesu n'akwata oku musaiza n'amutamba n'amulaga.
5 Ye nikwo okubabuulya nti, “Naani oku nywe omwana waamwe oba ondaawo waamwe nagwa omwizuba oku Sabbiiti ataimukiramu n'amutoolamu?” 6 Mwona pai tibaamwiremu.
Okwedendeeka oku bugenyi
7 OYesu niyaboine abagenyi engeri gye beekomyangamu ebifo ebya kitiinisya oku bugenyi, n'abakobera olufumo luni: 8 “Nibakwetanga oku bugenyi bwa kuswera, toikalanga mu bifo kya kitiinisya, kubba omuntu akukusinga ekitiinisya ayinza okubba nga yayeteibwe. 9 Naika, eyabacalisirye mukali babiri aliiza n'akukoba, ‘Ligira oni aikaare omu kifo mwoli.’ Olikirugamu n'amansoninsoni n'oyaba n'oikaara omu kifo ekya nyuma. 10 We noyetebwanga oku bugenyi bwa kuswera, oikaaranga nyuma okwikya omukama wa bugenyi naliiza, n'akukoba, ‘Munywani wange, iza oikale omu ntebe eya kitiinisya.’ Obwo olitunga ekitiinisya omu bagenyi abairaawo boona. 11 Buli muntu eyeekulya alidendeekebwa, n'oyo eyeedendeeka, alikulisibwa.”
12 Era oYesu n'akoba eyamucalisirye ati, “Nosumbanga ekyamisana gonze ekyaigolo, toyetanga bakaagwa gonze bagandaabo, gonze aba kika kyamu, gonze aba ku mucaamu abaguuda; kubba n'obeeta, boona andaake bakwete obwo obbe nosaswirwe. 13 Baitu we nosumbanga obugenyi, oyetanga abaseege, enzingo, abalema, abaigali ba maiso, 14 leke otunge omukisa. Gonze nga bo tibasobola kukusasula, oKanca alikusasula oku kuyimbooka kwa baikiriire.”
Olufumo lwa bugenyi obwa maani obwagaanibwe
15 Omwei oku bagenyi abaali oku kiibulo niyawuliire kini, n'akoba oYesu, “Ka yeesiimire oyo alibba oku bugenyi omu bukama bwa Kanca.”
16 OYesu n'amwiramu ati, “Waalowo omusaiza eyateekaniize obugenyi obukooto, n'ayeta abagenyi baingi. 17 Obwire bwa bugenyi nibwaikire, n'atuma omuweereza waamwe okumanyisya abagenyi abeete nti, ‘Mwize, buli kimwei kiweire okuteekaniza.’ ”
18 “Baitu boona boona ni batandika okwejunaaniira. Eyeekereire n'akoba, ‘Naakagula ekibanja, nteekwa okwaba okukirola. Nkwesengereirye nsaasira.’
19 “Owondi yeena n'akoba, ‘Naakagulambe endaawo zange eza cuuka ikumi, kubba nkwaba kuzegesya. Nkwesengereirye nsaasira.
20 “N'owondi n'akoba, ‘Nje naakaswera, tinkusobola kwiza.’ ”
21 “Omuweereza n'aira n'akobera omukama waamwe bye bakobere. Omukama waamwe n'agongera muno era n'alagira omuwereza waamwe nti, ‘Yaba mangu omu nguudo n'omu miwanda gya mu kibuga oleete abaseege, enzingo, abaigali ba maiso n'abalema.’
22 “Omuweereza n'aira n'amukoba, ‘Mukama wange kyolagiire kikoleibwe, baitu wacaalowo ebifo.’
23 “Omukama waamwe n'amukoba, ‘Yaba omu miwanda n'obuwanda omu byalo oyete abaliyo baize enyumba yange giizule. 24 Ka mbakobere, ndoowo gonze omwei okwabo abaayeteibwe alibba oku bugenyi bwange.’ ”
Abeegesebwa ba Yesu beerekeeseerya bingi
25 Ekiro kimwei, oYesu niyaali akutambula n'abantu abaingi, n'ayinduka n'abakoba, 26 “Omuntu nayendya okubba omweegesebwa wange, n'atanoba itewaamwe n'omawaamwe, omukali waamwe n'omwana waamwe, omugande n'omunyaanya, gonze obwomi bwamwe tasobola kubba mweegesebwa wange. 27 Buli muntu ateetiika musaalaba gwamwe, tasobola kubba mwegesebwa wange.
28 “Omuntu niyaakwenderye okwomboka omunaala, tiyaakwekereire kubaliira muwendo, okubona oba, alina empiiya ezikumala? 29 Nataawo omusingi n'atamaliirya munaala, abagubona boona boona batandika okumusekeera, 30 nibakumukoba, ‘Omuntu oni yatandikire enyumba n'atasobola kugimaliirya!’
31 “Oba omukama nabba akwaba okulwanisya omukama owondi tiyaakwekereire kwikaara n'abona niyaabba akusobola n'abasaiza omutwalo ogumwei, okulwanisya odi alina emitwalo ebiri? 32 Nabona nga takusobola, amutumira abakwenda okumwitirana nacaali alai, n'amusaba bateese emirembe. 33 Omu ngeri nigyo gimwei, omuntu naterekeeseerya byona tasobola kubba mweegesebwa wange.
Omuunyu okuwaamu ensai