13
Mwenenye oba muwereekeere
1 Omu bwire nibwo bumwei waalowo abamwei abaakobeire oYesu oku Bagalilaaya abaitirwe oPiraato nibakuweeryayo esadaaka. 2 OYesu n'ababuulya ati, “Mukulowooza aBagaliraaya bani baali basiisi muno okusinga aBagaliraaya abandi, era nikyo baaboneeboneire bati? 3 Bbe! Kambakobere okwiyaku nimwenenyeze, nywena mukwiza kuwereekeera. 4 Oba abo eikumi nomunaanai abaitirwe oku munaala gwa Sirowamu nilwabagwireku, mukulowooza nibo baali abasiisi okukira abandi abaabbanga omu Yerusaalemu? 5 Bbe! Kambakobere okwiyaku nimwenenyeze nywena mukwiza kuwereekeera.”
Olufumo lwa mutiini ogutagwisya
6 OYesu n'abakobera olufumo luni, “Omusaiza yaalina omusaale omutiini gweyasimbire omu musiri gwamwe ogwa mizabbibbu, n'ayaba okutoolyaku ebyana baitu natayajaaku gonze ekimwei. 7 N'akoba omusaiza eyaroleeranga omusiri, ‘Mmaare emyaka esatu ninkwizanga okutoolya ebyana oku mutiini guni baitu ni ntayajaaku gonze ekimwei. Gutemewo gukumala ekifo kya bwereere.’
8 “Omulumi wa ndumiro n'amukoba, ‘Mukama wange, guleke gubbeewo omwaka ogundi, ngwimuureimuure etakali n'okugutaaku ebijimusa. 9 Nigwagwisya kisai! Ni gutaagwisye oligutemawo.’ ”
OYesu akutamba omukali ondeema oku Sabbiiti
10 Ekiro kya Sabbiiti kimwei oYesu yaali nakwegesya omu limwei oku makumbaaniro. 11 Omwikumbaaniro mwalumu omukali eyaali nagoderwe omuzumu okumala emyaka ikumi namunaanai. Yaali niyeegodere natakusobola kwinunuka. 12 OYesu niyamuboine n'amweta omu maiso n'amukoba, “Mukali we, otambirwe obulwaire bwamu!” 13 N'amutaaku emikono gyamwe, amangu ago omukali nainunuka, n'awaisya oKanca.
14 Omukulu waikumbaaniro n'akwatibwa ekiniga, olwakubba oYesu yaali natambire omukali oku Sabbiiti. N'akoba abantu, “Alowo ebiro mukaaga ebyakukooramu emirumu. Mwizenge omu biro ebyo mutambibwe, baitu ti ku kya Sabbiiti.”
15 Omukama n'amwiramu, “Bagobya nywe, buli omwei oku nywe tasandabula ndaawo waamwe oba ndogoyi waamwe omu kisibo oku Sabbiiti n'amutwala okunywa amaizi? 16 Ati omukali oni, omwizukulu wa Ibbulaimu oSetaani gweyaali nabbwere okumala emyaka eikumi n'omunaanai, tasemeire kusindabulwa omu kubbwebwa kuni, oku kiro kya Sabbiiti?”
17 Awo ni yabazire bini abanyanzugu baamwe ni bakwatibwa ensoni, baitu abantu abandi boona boona nibasemereerwa olwa bikwewuunyisya bye yakoore.
Olufumo lwa kasigo ka kaladaali n'ekitumbisya
18 OYesu n'aira n'abuulya, “Obukama bwa Kanca mbwisanisyeki? Mbulengalenganisye ki? 19 Bwisana nk'akasigo ka Kaladaali, omusaiza ke yatwaire n'akasimba omu musiri gwamwe. Ni kamera ni kakula ni kafooka omusaale, n'ebinyonyi ebya mwibanga ni byomboka ebinyumba oku mataagi gaagwo.”
20 N'airamu n'abuulya, “Obukama bwa Kanca mbulengalenganisye ki? 21 Bwisana ekitumbisya omukali kye yataire omu ndeengo za ŋaano isatu ni kagitumbisya yoona yoona.”
Omulyango ogufundi
22 OYesu n'atambula nakwegesya omu bibuga n'ebyalo niyaali nakwaba e Yerusaalemu. 23 Omuntu omwei n'amubuulya, “Mukama, abantu abadooli nibo balijunwa?”
N'abakoba, 24 “Mwekambe okwingira omu mulyango ogufundi, olwakubba, nkubakobera, abantu baingi abaligezaaku okwingira baitu tibalisobola. 25 Omukama wa nyumba naliimuka n'akingawo mulyemeera enzai nimukukonkona era nimukwesengeerya muti, ‘Mukama tukinguurewo.’ ”
“Baitu yeena alibairamu, ‘Timbamaite, gonze gyemukuzwa?’ ”
26 “Muliiramu ni mukoba, ‘Twaliiranga ni tunywera amwei naawe, era wayegesyanga omu nguudo zaiswe.’ ”
27 “Baitu alibairamu, ‘Timbamaite gonze gye mukuzwa. Munzwere nywe abakoli ba bibbi!’ ”
28 “Walibbaawo okukunga n'okunena amaino, nimwalibona oIbbulaimu n'oIsaaka n'oYakobo n'abalangi boona omu bukama bwa Kanca, baitu nywe nimunagiibwe enzai. 29 Abantu balizwa oku mbaju zoona eza nsi, ni baikala omu bifo byabwe oku bugenyi omu bukama bwa Kanca. 30 Mazima walowo aba nyuma abalibba aba kubanza, n'aba kubanza abalibba aba nyuma.”
OYesu akukungiraku oYerusalemu
31 Omu bwire obwo aBafalisaayo abamwei ni baiza e wa Yesu ni bamukoba, “Zwa ani oyabe awandi; olwakubba oKerode akwendya okukwita.”
32 N'abairamu, “Mwabe mukobe obbwa oyo nti nkwiza okupeka emizumu n'okutamba abantu ekyaleero n'emambya n'ekiro kyakasatu naikiirya ekigendeerwa kyange. 33 Baitu ndina okwaba omu maiso ekiro ekyaleero n'emambya n'ekiro ekikwiriira—olwakubba ndoowo mulangi asobola okufeera enzai wa Yerusaalemu!
34 “We Yerusaalemu, Yerusaalemu, we aita abalangi, n'okubba amabbaale abo abatumiibwe gyoli, emirundi gingai gye nyenderye okukumbaania abaana baamu amwei, nk'onkoko nakumbaania obwana bwamwe omu bipapa, baitu notoikiriza! 35 Mubone enyumba yaanywe ebalekeirwe kifurukwa. Era nkubakoba timuliirayo kumbona okwica nimukobere ‘Wa mukisa oyo aiza omwibara lya Kanca.’”