12
Okulabula n'okwiryamu amaani
1 Omu bwire nibwo bumwei obwo, abantu banyamwingi baali nibakumbaine amwei n'okwemanganaku nibakwemanganaku. OYesu n'atandikira ku kubaza n'abeegesebwa baamwe, n'abakoba, “Mwerinde ekitumbisya ky'aBafalisaayo, nibwo bugobya bwabwe. 2 Olwakubba buli ekiswekerwe kyaliswekulwa n'ekibbisiibwe kyalimanyibwa. 3 Ebyemwabaziire omu kiiruma byaliwurwa misana ndoraine, n'ekyemwaweweteire eisimbi kyalilangiirwa oku nkanga za nyumba.
4 “Banywani bange kambakobere, abo abaita omubiri ni batakola kintu kindi kyona timubatiinanga. 5 Kambalange gwe mulina okutiina. Oyo alina obusobozi okubanaga e kuzumu, nabba namaare okwita omubiri, nigwo mutiinenge. Nkubakoba mumutiinenge. 6 Mumaite entaaye eitaanu nizigula obusente obudooli omuno, baitu ndoowo gonze omwei oku zo oKanca gweyaali niyeebereire. 7 Baitute nywe n'eisoke eriri oku mitwe gyanywe alimaite omuwendo. N'olw'ekyo mutatiina, muli ba muwendo okusinga entaaye ezingi.
8 “Kambakobere, buli muntu eyaakwatuuranga awali abantu nti mwegesebwa wange, n'oMwana wa Muntu alimwatuura omu maiso ga bamalaika ba Kanca nti, ‘Oyo mwegesebwa wange.’ 9 Eyaakunyeegaaniranga omu maiso ga bantu, yeena alyegaanirwa omu maiso ga bamalaika ba Kanca. 10 Buli muntu eyaakubazanga okubbi oku Mwana wa Muntu alisaasirwa, baitu eyaakuzumanga OMwoyo Akwera talisaasirwa.
11 “Nibaakubaleetanga omu makumbaaniro, omu maiso ga bacwi ba misango oba aga bakama, mutalyebuulya byakubaza nimukwejunaaniira, 12 oMwoyo Akwera yaakubakoberanga ebyemulina okubaza omu bwire obwo.”
Olufumo lwa muguuda omudoma
13 Omwei oku bantu abanyamwingi abaalowo n'akoba, “Mwegesya koba omuganda wange tubagane ebya bugwetwa bwaiswe.”
14 OYesu n'airamu, “Musaiza we naani yankomerye okubalamula oba okubasaarawo oku byanywe?” 15 N'airate n'abakoba, “Nkubalabula mwekendekeke obutabba na mwolonko, obwomi bwa muntu tibubbaawo ku lwa bwingi bwa itungo lyamwe.”
16 N'abakobera olufumo luni “Waalowo omusaiza omuguuda eyayeerye ebirume ebingi. 17 Niyeebuulya omu mwoyo gwamwe ati, ‘Nkole ki? Tindina wantu wa kubiikira birume byange.’
18 “N'aira n'akoba, ‘Nkwiza kukola nti; nkwiza okukubbawo ebideero byange, leke nyombooke ebikusingawo obukooto. Omwo nimwo nyabiikira ebirume n'ebintu byange byona. 19 Ale nkobe omwoyo gwange, “Olina ebyabuguuda bingi ebibiikiibwe olwa myaka egingi. Wuumula; olye, onywe, era osagaaruke.” ’
20 “Baitu oKanca n'amukoba, ‘Mudoma we! Ekyaleero obwire obwomi bwamu nibwakwiyibwaku naani yatwala bye weekoleire?’
21 “Nimwo kiribba kityo oku muntu eyeebiikira ebyabuguuda baitu nali museege egiri Kanca.”
Mwesige oKanca
22 OYesu nikwo okukoba abeegesebwa baamwe nti, “N'olw'ekyo nkubakoba emyoyo gyanywe gitalyaraara nimukwebuulya olwa bwomi bwanywe, kiki kyemwalya era olwa mibiri gyanywe kiki kyemwazwala. 23 Obwomi tibumanyisya mere yonkai, n'omubiri tigumanyisya bizwalibwa byonkai. 24 Mubone enamuŋoona: Tizisiga era tizikesa, tizirina ibiikiro gonze ekideero baitu oKanca aziriisya. Nywete ka muli ba muwendo gwingi okukira ebinyonyi! 25 Naani oku nywe, omwoyo gwamwe nigwaraara, asobola okwongera oku bwomi bwamwe gonze esaawa egimwei? 26 Nimwabba mutasobola kukola kintu ekidooli omuno kini, emyoyo gyanywe lwaki gyaraara olwa bindi?
27 “Mubone amalanga nka nigakula: Tigakola mulimu gonze okutata olugoye, baitu nkubakoba n'oSolomoonia omu kitiinisya kyamwe tiyazwaire nk'erimwei oku go. 28 OKanca niyaabba nimwo azwalikisya atyo ekisiko ekya mu ndumiro, ekibbaawo ekiro kyaleero, enceege ni kinagibwa omu muuro, nywete abanyakwikiriza okudooli talibazwalikisya okukirawo? 29 Emitima gyanywe timugitanga ku byakulya oba byakunywa, gitaaraara olw'ekyo. 30 Olwakubba n'abantu abatamaite Kanca bata emitima gyabwe oku bintu nk'ebyo, baitu nywe oitewaanywe amaite nimusemeire okubba nabyo. 31 Nywe muswage obukama bwamwe, n'ebindi byemwendya alibibongeraku.
32 “N'olw'ekyo nywe ekisibo ekidooli mutatiina olwakubba oitewaanywe asiimire okubaweerya obukama. 33 Mutunde byemuli nabyo mugabire abaseege, mwabba mwebiikiire obuguuda omwiguru obutaliwaawo, omu nsawu ezitakairika gonze okusumuka. Ndoowo mwibbi aikayo, n'ebiyenje tibirirya. 34 Obuguuda egyebukali n'omutima gwamu nigyo gubba.
Okweteekaniza
35 “Muzwale mweteekanize okuweereza, etaala zaanywe ziikale nizikwaka. 36 Mwisane abasaiza abakulindiirya omukama waabwe nakwira okuluga oku bugenyi bwa kuswera. Naika akonkona, boona ni balabukaku okumukinguurawo. 37 Abaweereza abo babba beesiimire omukama waabwe naira n'asanga nibakubonia. Kambakobere ekiikire; omukama waabwe omwenyenere ataaku etaawo, n'abaikalisya n'aiza n'abagabula. 38 Abaweereza abo babba beesiimire omukama naira, gonze mu kisusumuko kyakabiri oba kyakasatu, n'abasanga nibeeteekaniize. 39 Mweteje kini, omukama wa nyumba niyaakumaite esaawa omwibbi gyeyaiziraku, tiyaakulekere nyumba yaamwe kwendebwa mwibbi aingire. 40 Nywena mwikale nimweteekaniize olwakubba oMwana wa Muntu aliizira omu saawa gyemutakumusuubiriiramu.”
Omwiru omwesigwa n'atali mwesigwa
41 OPeetero n'abuulya, “Mukama olufumo luni okulusubiira niiswe kanda buli omwei?”
42 OMukama n'airamu, “Ati omuweereza omwesigwa era omugezi, omukama waabwe gwalekera omulimu gwa kukuura abairu baamwe, okubaweeryanga emere omu bwire obusemeire, niye ali ayi? 43 Omuweereza oyo, oMukama waamwe naire gwasanga nakukola atyo, abba yeesiimire. 44 Kambakobere amazima: OMukama waamwe amuweerya okuroleera ebya buguuda bwamwe byona byona. 45 Baitu omuweereza nakoba omu mutima gwamwe, ‘OMukama wange alwirewo okwira,’ n'atandika okukubba abairu n'abazyana, n'alya n'anywa n'atamiira, 46 omukama waamwe airiira oku kiro kyatakumusuubiriiraku era oku saawa gyatakumanya. Omukama amubonereza muno nka nakola abataikiriza.”
47 “Omuweereza oyo amanya omukama waamwe kyakwendya akole baitu nateeteekaniza, gonze okukola nkomukama waamwe kyakwendya, akubbwa muno. 48 Baitu omuweereza atamaite omukama waamwe kyakwendya akole, gonze nakola ekiroomere okumukubbisya takubbwa muno. Aweereibwe ebingi alitongebwa bingi n'eyabiikisiibwe ebingi alibuulibwa bingi okusinga oku byeyabiikisiibwe.”
Obukwenda bwa Yesu bubaganiamu abantu
49 “Naizire kukoleerya muuro ku nsi, akiri nigubbutuka! 50 Alowo okubatizibwa kwenkwaba okwakalamu, okuntuntwirye okwikya nikwaliikiira! 51 Mukulowooza naizire kuleeta mirembe oku nsi? Bbe, kambakobere, naizire kubagania mu bantu. 52 Okuliga ati abantu abataanu omu nyumba egimwei bakwiza kwebaganiamu, leke bawakanisyengane, abasatu bawakanisye ababiri n'ababiri bawakanisye abasatu. 53 Bakwiza okwebaganiamu; oitewamwana awakanisye omwana, omwana awakanisye oitewaamwe, omawamwala awakanisye omuwaara n'omuwaara awakanisye omawaamwe. Onyibyala akwiza okuwakanisya omweiryana n'omweiryana awakanisye onyibyala.”
Okusoboora ebiro
54 N'akoba abantu boona boona, “Nimubona ekicu nikiimukire e buwuluka, mulabuka okukoba nti, ‘Enjura yatoonya.’ era n'etoonya. 55 ONganda nawunga, mukoba, ‘Eisana lyayaka.’ era ni ryaka. 56 Bagobya nywe! Mumaite okuroleera eiguru n'ensi ni musoboora ebyabbaawo, kikite ekibagaana okusoboora oku biro bini?
Muyimbye n'omunyanzugu waamu
57 “Lwaki nywe abenyenere muteesaarawo ekiikire? 58 Nobba okwaba e wa mucwi wa misango n'omuntu akuwaabiire, akuwaabiire mwesengeerye mwiremu okuyimbya naye nimucaali omu muwanda, notokola otyo akwica ewa mucwi wa misango n'akukwatisya osirikale, osirikale n'akuta omu nkomo. 59 Kambakobere, omu nkomo tolirugamu otakasaswire erupiiya ekusembayo.”