11
Okwegesya kwa Yesu oku kusaba
1 Ekiro kimwei oYesu yaali antu nakusaba. Niyamaare okusaba, omwei oku beegesebwaa baamwe n'amukoba, “Mukama, twegesye okusaba nk'oYokaanab niyayegeserye abeegesebwa baamwe.”
2 OYesu n'akoba ati, “Nimwabbanga mukusaba, mukobenge muti,
‘Itewaiswe,
eibara lyamu libbenge lyeru.
Obukama bwamu bwize.
3 Tuweerye emere yaiswe eya buli kiro.
4 Tusaasire ebibbi byaiswe
nkaiswe nitusaasira abatukola okubbi.
Ototutwala mu kwoyeerwac.’”
5 Ni yeeyongera okubeegesya oku kusaba n'abakoba ati: “Omwei oku nywe nabba n'omunywani waamwe, n'ayaba gyali omwitumbi okumuwola akamere, n'amukoba ati, 6 ‘Omunywani wange aizire, alugire alai, baitu tindina kyakumuwa.’
7 “Odi gyayabire ayinza okumwiramu ati, ‘Otongadya. Nje n'abaana bange twekingire irai era tubbasirye ndoowo kyetwakuweerya.’ 8 Kambakobere gonze odi abbasirye tiyaimuke kumuweerya mere lwa mukago, baitu akwiza kwimuka olwa butaisyaku bwodi akusaba.”
9 “Njeena kye nkubakoba musabenge, mwakuweebwanga; mutoolyenge mwakubonanga; mukonkonenge; mwakukinguurwangawo. 10 Olwakubba, buli asaba aweebwa, buli atoolya abona, buli akonkona akinguurwawo.
11 “Itewamwana ki eyaakuweerya omwana waamwe onjoka namusabire oncwi? 12 Oba naani eyaakumuweerya onkwayad namusabire eiwuli? Ndoowo! 13 Nywe abakoli ba bibbi nimumaite okuweerya abaana baanywe ebintu ebisai, oitewaanywe owa mwiguru tiyaakukirawo okuweerya oMwoyo Akwerae egiri abo ababba nibamusabire!”
OYesu n'oBeelizebbabbu
14 Ekiro kimwei oYesu yaali nakupeka omuzumu ogukibbubbu oku musaiza. Omuzumu nigwayabire omusaiza eyaali okibbubbu n'abaza, abantu ni bawuniikiira. 15 Baitu abamwei okubo ni bakoba, “Akukolesya maani ga Beelizebbabbu omukulu wa mizumu okupeka emizumu.” 16 Abandi ni bamukema nibakumusaba akabonero okuluga omwiguru.
17 OYesu ni yeeteja ebirowoozo byabwe n'abakoba, “Obukama bwona nibwebaganiamu bwonkai na bwonkai busiisikala, n'enyumba niyeebaganiamu efa. 18 OSitaani niyaabba yeebagainiemu yenkai, obukama bwamwe bwayemeerawo butyai? Kini nkibazire kubba mukukoba mpeka emizumu ninkukolesya maani ga Beelizebbabbu. 19 Ale ninaabba mpeka emizumu ninkukolesya maani ga Beelizebbabbu, abeegesebwa baanywe bakolesya ga naani? Abo nibo baabba balamuli baanywe. 20 Baitu ninaabba mpeka emizumu ninkukolesya maani ga Kanca, obwo obukama bwa Kanca bwizire gyemuli.”
21 Omuntu ow'amaani alina ebyakulwanisya byamwe ebikumala, nalinda eka yaamwe, ebintu byamwe bibba mirembe. 22 Baitu akumukira amaani namwizira n'amuwangula, atwala ebyakulwanisya byeyaali nakwesiga n'ebintu byamunyagireku n'abigaba.
23 Oyo atabba ku lwange munyanzugu wange, n'oyo atakumbaanirya amwei nanje, ararangya.
24 “Omwoyo ogubbi niguluga omu muntu, gwaba awambula maizi nigukutoolya ekifo we gwawumuura. Nigutakibona gukoba, ‘Nairayo omu nyumba gyenaalumu.’ 25 Nigwira gusanga enyumba neyeyeibwe kusai, n'eteekaniziibwe. 26 Nigwaba gusyoma emizumu egindi musanju egikusinga obubbi, ni gyaba ni gibba omwo. N'obwomi bwa muntu oni obwa luzwanyuma, bubba bubbi okukira obwekereire.”
27 Awo oYesu niyaali akubaza bini, omukali eyaali omu bantu n'aimula eiraka n'akoba ati, “Enda eyakubyaire ya mukisa n'amabeere agakwonkyerye.”
28 Baitu oYesu n'amwiramu, “Abakukira okubba aba mukisa nibo abo abawura ekigambo kya Kanca ni bakiikiriza.”
Akabonero ka Yona
29 Abantu nibaakanyire oYesu n'akoba, “Omulembe guni gubbi. Gukusaba akabonero aka byamaano, baitu ndoowo kabonero kalibaweebwa okutoolaku aka Yona. 30 Olwakubba nk'oYona niyaali akabonero egiri abantu ba Nineeve, n'oMwana wa Muntu yeena nimwo yaabba atyo egiri omulembe guni. 31 OMukama omukali owa Sebba aliimuka ekiro kya kusala omusango n'alumiirya abantu aba mulembe guni, kubba yaligire oku mpero ya nsi n'aiza okuwuliirya ebigambo ebya magezi ebya Solomooni, ati akukira oSolomooni, alowo ani, baitu timukumuwuliirya. 32 Ekiro kya kusaaraku omusango n'abantu ba Nineeve baliimuka okulumiirya omulembe guni, olwakubba bo beenenyeze oYona niyababuuliire, era ati akukira oYona obukulu alowo ani, baitu timukumuwuliirya.”
Etaala ya mubiri
33 Ndoowo akoleerya taala n'agibbisa oba n'agijuumukaku ekigega. Baitu agita oku kikondo kyagyo leke emolekere abakwingira omu nyumba. 34 Eriiso lyamu nigyo taala ya mubiri gwamu. Amaiso gaamu nigabba agasai omubiri gwamu gwona gwizula ekyengeezi. Baitu amaiso gaamu nigabba agabbi omubiri gwamu gwona gwizula kiiruma. 35 Mwerinde ekyengeezi ekiri omu nywe kitabba kiiruma. 36 Omubiri gwamu nigwabba gwizwire ekyengeezi, nigutalumu katundu akalumu ekiiruma gubonenkanira kimwei nk'amolekerwe ekyengeezi kya taala.
OYesu akuzumiira abeebembezi ba diini
37 OYesu niyamaare okubaza, oMufalisaayo n'amweta oku kiibulo; oYesu n'aingira n'aikala okulya. 38 Baitu oMufalisaayo, niyaboine oYesu aliire atabandiize kunaaba ngalo, ni yeewuunya.
39 OMukama nikwo okumukoba, “Nywe aBafalisaayo munaabya ebyereza n'encuba ku ruguru baitu omu mitima gyanywe mwizwire omwolonko n'ebibbi. 40 Badoma nywe eyakoore oku ruguru tiniye yakoore n'omunda? 41 Muweeryenge n'omutima ogusai abaseege, obwo nimwo mwaikiira omu byona omu maiso ga Kanca.”
42 “Zibaajirye nywe aBafalisaayo, abaweerya n'ekitundu ekyaikumi ekya buli kantu n'obusiko obucuunyisya omukubi, baitu amazima n'okwendya oKanca ni mubinagiriza. Bini mwakubikoore baitu nimutanagiriza na bidi ebyekereire.
43 “Zibaagirye nywe aBafalisaayo, kubanga mwendya okwikaara omu bifo ebisinga obusai omu makumbaaniro n'okubalamuca omu butale.
44 “Zibaajirye nywe, olwakubba mukwisana ebituulo ebinambula mabbaale, abantu bye batambuuraku nibatakubimanya.”
45 Omwei oku beeteja ba mateeka n'amukoba, “Mwegesya, n'obaza otyo inswena obba otuzumire.”
46 OYesu n'amwiramu, “Naanywe abeeteja ba mateeka, zibaajirye kubba mutiika abantu emigugu gye batakusobola kwetiika, ni mutabajunaku gonze akadooli.”
47 “Zibaajirye, kubba mwombokera abalangi ebituulo, nga abaizebaanywe nibo baabaitire. 48 Obwo mubba mukulanga nti musiimire ebyo abaizebaanywe bye baakoore; baitire abalangi, nywe ni mubombokera ebituulo. 49 Olwa kini, oKanca, omu magezi gaamwe yakobere, ‘Ndibatumira abalangi n'abakwenda, abamwei oku bani balibaita n'abandi balibararaanja.’ 50 Ale leke omulembe guni gujunaanwe omusaayi gwa balangi ogusensekere oku nsi okuzwa niyatonderwe. 51 Okuluga oku musaayi gwa Abberi okwika oku musaayi gwa Zaakaliya, eyaitiirwe akati wa itambiro n'ekifo ekikwera. Nkubakoba omulembe guni gulijunaanibwa omusaayi ogwo gwona gwona.
52 “Zibaajirye nywe abeeteja b'amateeka, olwakubba mwatoirewo ekisindabula olwige olwa kumanya. Nywe abenyenere timwaingire, n'abaali bakwingira ni mubagaana.”