10
OYesu akutuma ensanju n'ababiri
1 Bini nibyaweire, oMukama n'akoma abeegesebwa abandi nsanju nababiri n'abatuma babiri babiri bamwebembere okwaba omu bibuga n'ebifo gyeyaali nali ampi okwaba. 2 N'abakoba, “Ebyakukesa bingi, baitu abakesi badooli. N'olw'ekyo musabe oMukama wa kukesa atume abakesi omu musiri gwamwe. 3 Nkubatuma mwabe nk'abaana ba ntaama omu misege. 4 Mutatwalana mpiiya, gonze nsawo gonze enkaito, era mutalamuca muntu yeena yeena omu muwanda.”
5 “Nimwaingiranga omu nyumba mwekeerenge kubakoba, ‘Emirembe gibbe omu nyumba gini.’ 6 Nimwakubbangamu omuntu ayendya emirembe, emirembe gyanywe gyakusigalanga naye; baitu nataabbengemu emirembe gyabairiiranga. 7 Muraarenge omu nyumba egyo nimukulya era nimukunywa byebaakubaweeryanga kubba omukoli asemeire okutunga empeera yaamwe.”
8 “Nimwaingiranga omu kibuga nibabatangiriira, mulyenge kyona kyona kyebakubaweeryanga. 9 Mutambenge abalwaire abalumu era mubakobenge, ‘Obukama bwa Kanca bwigereire gyemuli.’ 10 Baitu nimwakwingiranga omu kibuga ni batabatangiriira, mwabenge omu nguudo zaakyo, mukobe muti, 11 ‘N'ocuucu owa kibuga kyanywe ali oku magulu gaiswe, tukubamukubbaiguurya. Baitu kini mukyeteje, obukama bwa Kanca bwigereire.’ 12 Kambakobere, ekiro ekya kusaaraku emisango oSodomaa alisaasirwa okusinga ekibuga ekyo.”
13 “Zikwajirye we, Koraziini! Zikwajirye we, Bbesusaida! Kubba ebyamaano ebyakoleirwe omu we nibyakuli bikoleirwe omu Tiiro n'oSidonib, abantu baamwo baakuli beenenyeze irai, nibazwaire ebikutiyac n'okwikala omwikoke. 14 Baitu ekiro kya kusaarwa omusango oTiiro n'oSidoni byalisaasirwa okukira nywe. 15 We Kaperenawumu olideedebwa okwika omu bicu? Bbe olyanulibwa n'oteebwa e kuzumu! ”
16 Ale n'akoba abeegesebwa, “Eyaakwikirizanga obukwenda bwanywe naikiriize ninje; n'oyo eyaakubugaananga nagaine ninje; n'eyaakugaananga nje nagaine oyo eyantumire.”
17 Ensanju nababiri ni baira nibasemereirwe, ni bakoba, “Mukama, nitukolesya eibara lyamu n'emizumu gituwura.”
18 OYesu n'abairamu, “Naboine oSetaani nakugwa nk'okuserya kwa nkuba, okuluga omwiguru. 19 Mbawaire obusobozi okwemanga oku njoka n'enkwaya, n'okwendayenda amaani goona goona aga munyanzugu; ndoowo kintu kyalibasuumira. 20 Baitu mutasemereerwa olwakubba emizumu gikubawura, musemereerwe olwakubba amabara gaanywe gawandiikiibwe omwiguru.”
21 Omu bwire obwo oYesu naizula okusemereerwa okwa Mwoyo Akwera n'akoba, “Nkukuwaisya Taata, oMukama owaiguru n'ensi, kubba obbisire abagezi n'abeeteja, ebintu bini n'obiranga abaana abato. Taata nikwo kwali okusiima kwamu.”
22 “Ebintu byona byona byampeereibwe oItewange. Ndoowo amanyiire kimwei Mwana okwiyaku oItewaamwe, era ndoowo amanyiire kimwei oitewaamwe okwiyaku oMwana n'abo oMwana beyasiimire okubeeranga.”
23 Nibaali bonkai n'ayindukira abeegesebwa baamwe n'akoba ati, “Mulina omukisa okubona bini byemuboine. 24 Mazima nkubakoba nti abalangi n'abakama baayenderye okubona bini bye mukubona baitu ni batabibona n'okuwuura byemukuwura baitu ni batabiwura.”
Olufumo lwa Musamaliya eyakoore okusai.
25 Ekiro kimwei omweeteja wa mateeka ga kiyudaaya yayemereire okugezesya oYesu. N'amubuulya, “Mwegesya, nkole ki okugwetad obwomi obutawaawo?”
26 OYesu n'amwiramu, “Omu mateeka kyawandiikiibwe kityai? Okyeteja otyai?”
27 Omweeteja wa mateeka n'airamu, “Yendyanga oMukama, oKancae waamu n'omutima gwamu gwona gwona, n'omwoyo gwamu gwona gwona, n'amaani gaamu goona goona n'amagezi gaamu goona goona. Era yendyanga omutaayiwo nka niweeyendya.”
28 OYesu n'amwiramu, “Oiremu kusai, weena kolanga otyo olibba mwomi.”
29 Olwakutaka okusinga, omweeteja wa mateeka n'abuulya oYesu, “Omutaayi wange niye naani?”
30 OYesu n'amwiramu, “Omusaiza yaali akusirimuka akuzwa e Yerusaalemu nakwaba omu kabuga aka Yeriko n'agwa omu banyagi. Baamukubbire, ni bamwambula ni bamuleka nakabire. 31 Waalowo okabonaf eyaali akwakala omu muwanda ogwo. Niyaboine omusaiza, yamukengeiterembe. 32 N'oMuleevig niyaikirewo n'abona omusaiza n'amukengeita. 33 Baitu omusaiza oMusamaliyah, eyaali akutambula omu muwanda ogwo niyaikirewo n'amubona, n'amusaasira. 34 Niyaigereire we yaali n'atoonyerya amafutai n'eviini oku biwuta byamwe, n'abibbwa. Niyamaare n'amuta oku ndogoyi waamwe n'amutwala omu kiraaro ky'abagenyi n'amurwaza. 35 Enceege n'aweerya omukama wa kiraaro empiiyaj. N'amukoba ati, ‘Omuntu oni murwaze, empiiya ezaabba zaakairemu ndizikwiriiryawo ninyiire.’
36 “Okulowooza muntu ki oku bani abasatu eyaali omutaayi wa musaiza eyagwire omu banyagi?”
37 Omweeteja wa mateeka n'airamu ati, “Oyo eyamukwatiirwe ekisa.”
OYesu n'amukoba, “Yaba okolenge otyo.”
OYesu akucaara oMaliza n'oMalyamu
38 OYesu n'abeegesebwa baamwe nibaali bakwaba e Yerusaalemu, omukali eyayetebwanga Maliza n'amutangiriira omu nyumba yaamwe. 39 Baitu oMaliza yaalina omugande eyayetebwanga Malyamu, eyaali naikaliire ampi n'amagulu ga Mukama nakuwuliirya byeyaali nakubaza. 40 Baitu oMaliza yaali nakutalibanizibwa emirumu egingi gyeyaali nakukola. N'aiza egiri oYesu n'amubuulya, “Mukama tokufaayo omuganda wange nandekereirye emirumu? Mukobe anjuneku.” 41 OMukama n'amwiramu, “Maliza, Maliza, otuntwire era n'okutalibanizibwa ebintu bingi, 42 Baitu ekikwendebwa kiri kimwei. OMalyamu akomerye ekikusinga obusai, era ndoowo alikimutoolaku.”