9
OYesu akutuma abakwenda eikumi nababiri.
1 OYesu niyayetere eikumi nababiri, n'abaweerya obusobozi n'amaani okupeka emizumu n'okutamba endwaire 2 N'abatuma okwaba okukoba oku bukama bwa Kanca n'okutamba abalwaire. 3 N'abakoba “Mutatwalana kintu kyona kyona omu lugendo luni, gonze omwigo, gonze ensawo, gonze emere, gonze empiiya, gonze ekizwalibwa ekyakabiri. 4 Buli nyumba gye mwakwingirangamu ni babacaamiira, mwikalenge omwo okwikya nimwaliriga omu kibuga ekyo. 5 Abantu nibataakubacaamiiranga, mwekubbaigulyengeku ocuucu wa ku magulu gaanywe ni mukuliga omu kibuga ekyo, abbe nk'omujuurwa oku bo.” 6 Ale ni baaba omu byalo byona byona, nibakukoba Amawuro Agasai n'okutamba abantu buli amwei.
7 OKerode owa isaza lya Galiraaya niyawuliire byona byona ebyalowo n'asoberwa kubba abamwei bakobanga nti oYokaana ayimbookere okuzwa omu bafu, 8 abandi nti Eriya abonekere, n'abandi nti omwei oku balangi aba irai yaali ayimbookere okuzwa omu bafu. 9 Baitu oKerode ni yeebuulya, “OYokaana namutemereku omutwe. Naanite oni gwe nkuwura akukola bini byona?” N'agezaaku okumubona.
OYesu akuliisya enkumi eitaanu
10 Abakwenda nibaire ni bakobera oYesu byona byona byebakoore. Awo n'abatwalana, ni beesoroora omu kibuga ekyetebwa Bbesusaida, 11 Baitu abantu baingi ni beeteja gyeyaali nakwaba ni bamusengeerya. N'abatangiira n'abaza nabo oku bukama bwa Kanca n'atamba n'abo abaayendyanga okutambwa.
12 Eisana niryali likugwa, eikumi nababiri ni baiza gyali ni bamukoba, “Koba abantu baabe omu byalo ebyerereirewo batoolye ebyakulya n'oburaaro, olwakubba ani we tuli weenagire.”
13 N'abairamu, “Mubaweerye ekyakulya.”
Ni bamwiramu, “Iswe tulina emigaati etaanu n'encwi ibiri zonkai—kanda nitwayaba ni tugula emere eyamala abantu bani boona boona.” 14 (Baali abasaiza nk'enkumi itaanu.)
OYesu n'akoba abeegesebwa, “Mubaikaarye abantu nk'ataanu ataanu.” 15 Ni bakola batyo, ni babaikaarya boona boona. 16 OYesu n'akwata emigaati etaanu n'encwi eibiri n'aroleera egiri eiguru, ni yeebalya n'abyendamu, n'abiweerya abeegesebwa baamwe babiweerye abantu. 17 Boona boona ni balya ni baikuta, abeegesebwa baamwe ni bakomakoma ebitundutundu ebyasaagirewo, ebigega ikumi nabibiri.
OPeetero akwatula oYesu nali Kurisito
18 Ekiro kimwei oYesu niyeesoroire okusaba nali n'abeegesebwa baamwe, n'ababuulya, “Abantu bannyeta naani?”
19 Ni bamwiramu nti, “Abamwei bakweta Yokaana oMubatiza, abandi Eriya n'abandi omwei oku balangi aba irai ayimbookere.”
20 N'ababuulya, “Baitute nywe munyeta naani?”
OPeetero n'amwiramu, “Niiwe Kurisito wa Kanca.”
21 OYesu n'abakunkuniza kini obutakisubiiraku muntu yeena yeena. 22 N'abakoba, “OMwana wa Muntu ateekwa okubonaabona omuno era agaanibwe abakaire, abakabona abakulu n'abeegesya b'amateeka, era ateekwa okwitibwa, baitu ekiro kyakasatu ayimbooke.”
23 N'aira n'abakoba boona boona ati, “Omuntu yeena yeena akwendya okunsengeerya, ateekwa okwerekeeseerya ni yeetiika buli kiro omusaalaba gwamwe n'ansengeerya. 24 Olwakubba buli muntu ayendya okutaatira obwomi bwamwe alibufeerwa, na buli omwei afeerwa obwomi bwamwe oku lwange alibutaatira. 25 Kirigasa ki omuntu okulya ensi yoona, baitu n'afiirwa obwomi bwamwe? 26 Buli omwei alinkwatirwa ensoni n'ebigambo byange, oyo n'oMwana wa Muntu alimukwatirwa ensoni naliiza omu kitiinisya kyamwe n'ekya itewaamwe n'ekya bamalaika abakwera. 27 Kambakobere amazima, abamwei oku nywe abeemereire ani timulifa mutakaboine bukama bwa Kanca.”
Okuyinduka kwa mboneka ya Yesu
28 Niwaayakairewo ebiro munaanai namaare okubaza bini, n'atwalana oPeetero, oYokaana n'oYakobo okusaba aiguru oku lusozi. 29 Niyaali nakusaba, obusyo bwamwe ni buyinduka n'engoye zaamwe ni ziseryaserya muno. 30 Amangu ago, abasaiza babiri, oMusa n'Eriya ni baboneka nibakubaza naye; 31 baabonekeire omu kitiinisya nibakubaza n'oYesu oku kufa kwamwe kwe yaali nakwaba okwikiirya omu Yerusaalemu. 32 OPeetero n'abaira baamwe baali bawungukire, baitu nibaasusumukire ni babona ekitiinisya kya Yesu n'abasaiza ababiri abaali beemereire naye. 33 Awo abasaiza nibaali bakuliga oYesu weyaali, oPeetero n'amukoba, “Mwegesya kisemeire iswe okubba ani. Leka twomboke ebitinde bisatu- ekimwei kyamu n'ekindi kya Musa, n'ekindi ky'Eriya.” (Tiyamaite bye yaali nakubaza.)
34 Niyaali acaabaza, ekicu ni kiiza ni kibakingiirya, kini ni kibatiinisya muno. 35 Eiraka ni lizwa omu kicu, nilikukoba, “Oni niye oMwana wange gwe nkomerye; mumuwuliirye.” 36 Eiraka nilimaare okubaza, ni babona oYesu nali yenkai. Abeegesebwa ni bakyekuumira bonkai, ni batakoberaku muntu yeena kyebaboine.
Okutambwa kwa mwojo eyaaluku omuzumu
37 Nibaazwire oku lusozi ekiro ekyaiririire, abantu abanyamwingi ni baitirana oYesu. 38 Omusaiza eyaali omu bantu abo n'abazira aiguru n'akoba, “Mwegesya nkwesengereirye, lola omutaani wange gwendina yenkai. 39 Omuzumu gukumugweranga, amangu ago n'akokooma muno, ni gumukubbirawo, n'afukeera. Gumuwutaaza era tigutera kumuzwaku. 40 Neesengereirye abeegesebwa baamu bapeke omuzumu guni baitu ni batasobola.”
41 OYesu n'airamu n'abakoba, “Bantu nywe aba mulembe ogutalina kwikiriza era ogwabbaamire, ndiikya di okubba naanywe n'okubagumiikiriza? Leeta ani omutaani waamu.”
42 Omwojo ne bweyaali akwiza, omuzumu ni gumunaga ansi n'akunkuma. Baitu oYesu n'alagira omuzumu okumuzwaku, n'amutamba n'amwiriirya oitewaamwe. 43 Boona boona ni bawuniikiira olwa maani ga Kanca.
Buli omwei niyaali akyewuunya olwa byona oYesu byeyakoore, n'akoba abeegesebwa baamwe ati, 44 “Muwuliirye nimwekendekekere kye nkwaba okubakoba: oMwana wa Muntu akwaba okuliiranwa, aweebweyo omu mikono gy'abantu.” 45 Baitu tibeetejerye kyeyaali akumanyisya; kyali kibabbisirweku baleke kukyeteja, ate ni batiina okukimubuulya.
Naani yaabba omukulu?
46 Awo abeegesebwa baamwe ni batandika okuwakana nibakukoba nti naani omu bo akukira okubba omukulu. 47 Olwa kumanya ebirowoozo byabwe, oYesu n'akwata omwana omuto n'amwemeerya e rubaju waamwe; 48 n'abakoba, “Buli omwei atangiira omwana omuto oni omwibara lyange abba atangiriire ninje, na buli omwei atangiira nje abba atangiriire oyo eyantumire. Olwakubba akusinga obuculeeri omu nywe niye akusinga obukulu.”
49 OYokaana n'amukoba “Mukama, twaboine omusaiza nakupeka emizumu omwibara lyamu, ni tugezaaku okumugaana, olwakubba tali amwei naiswe.”
50 OYesu n'akoba, “Mutamugaana, olwakubba buli atakutulwanisya abba ku lwaiswe.”
Okugaanibwa e Samaliya
51 Obwire bwamwe obwa kutemba omwiguru nibwali bwigereire oYesu n'amaliira okwaba e Yerusaalemu. 52 N'atuma abakwenda okumwebembera okwaba omu kyalo ekya Samaliya okuteekanizayo okucaala kwamwe; 53 Baitu abantu ba Samaliya tibaamutangiriire, olwakubba yaali nakwaba Yerusaalemu. 54 Abeegesebwa baamwe, oYakobo n'oYokaana, nibaaboine kini, ni babuulya oYesu, “Mukama okwendya twete omuro okuzwa omwiguru gubazikye?” 55 Baitu oYesu n'abayindukira n'abanenya, 56 ni baaba oku kyalo ekindi.
Omwegesebwa wa Yesu byeyeerekeeseerya
57 Nibaali bakutambula omu muwanda, omusaiza n'akoba oYesu nti, “Nkwiza kubba mwegesebwa waamu gye waakwabanga woona woona.” 58 OYesu n'amwiramu, “Ebbwa zirina ebiina mweziraara, n'ebinyonyi by'amwibbanga birina ebinyumba, baitu oMwana wa Muntu talina w'akuta mutwe gwamwe.”
59 N'akoba omusaiza owondi, “Nsengeerya.” Omusaiza n'amwiramu, “Mukama, banza ondeke nyabe nziike oitewange.”
60 OYesu n'amukoba “Leka abafu baziike abafu abaira baabwe, baitu we yaba okobe ebya bukama bwa Kanca.”
61 N'owondi n'akoba, “Mukama, naabba mwegesebwa waamu, baitu banza ondeke nyire eka ndage abantu bange.”
62 OYesu n'amwiramu, “Ndoowo akwata cuuka naira n'alola enyuma asemeire okuweereza omu bukama bwa Kanca.”