8
Abakali abaatambulanga n'oYesu.
1 Kini nikyaweire, oYesu n'atambula omu bibuga n'ebyalo nakuba Amawuro Agasai aga bukama bwa Kanca. Abeegesebwa eikumi nababiri baali naye, 2 n'abakali abamwei abaatambiibweku emizumu n'endwaire, nk'oMalyamu Magudaleena gwe yapekereku emizumu omusanju; 3 OYowaana omukali wa Kuuza, eyakuuranga embuga ya Kerode; oSusaana, amwei n'abandi baingi abaajunanga oYesu n'abeegesebwa baamwe n'ebintu byabwe.
Olufumo lwa musigi wa nsigo
4 Awo abantu banyamwingi okuzwa omu bibuga ni beekumbaanirya oYesu we yaali, n'abasubiira olufumo luni: 5 “Omusigi yayabire okusiga obusigo bwamwe. Niyaali akubumiisa, obumwei ni bugwa oku ntando wa muwanda; abantu ni babusambatiira, n'ebinyonyi ni bibulya, 6 obundi ni bugwa okwitakali lya ku lwazi, nibwameere, ni buwotoka, ni bufa olwa kubulwa amaizi. 7 Obundi ni bugwa omu mawa, ni gakula nabwo ni gabuliiriira. 8 Baitu obundi ni bugwa okwitakali erisai. Ni bukula, ni bwera emirundi kikumi okusinga obusigo obwasigiibwe.”
Niyamaare okubaza kini, n'aimula eiraka n'akoba, “Buli alina amatwi agawura, awure!”
9 Abeegesebwa baamwe nikwo okumubuulya amakulu ga lufumo luni. 10 OYesu n'abairamu, “Nywe muweereibwe amagezi aga kweteja ebyama bya bukama bwa Kanca, baitu egiri abandi mbazira mu nfumo, ebyawandiikiibwe leke biikiire nti,
“ ‘nibaabona, tibaalingaasire;
nibaawura, tibeeteje.’ ”
OYesu okusoboora amakulu ga lufumo
11 “Amakulu ga lufumo luni nigo gani: Obusigo nikyo kigambo kya Kanca. 12 Obwo obwagwire oku ntando wa muwanda nibo abantu abawura ekigambo, baitu oSetaani n'aiza n'akiiya omu mitima gyabwe baleke okwikiriza n'okujunwa. 13 Obwo obwagwire okwitakali eliri oku lwazi, nibo bantu abawura ekigambo ni bakiikiriza n'okusemeerwa, baitu tikimamaala mu mitima gyabwe. Baikiriza akaire kadooli, baitu okwoyeerwa nikwiza bagwa. 14 Obwo obwagwire omu mawa nibo abo abawura ekigambo, era omu kutambula kwabwe, ebizibu, obuguuda n'ebisai bya nsi ni bibamigiirya ni bibalemesya okwera. 15 Baitu obwo obwagwire okwitakali erisai nibo abantu aba mutima ogusai, abawura ekigambo kya Kanca ni bakikuuma, era ni bakola ebikolwa ebisai omu kugumiikiriza.”
Olufumo olwa taala etabbiinikirwa
16 “Ndoowo akoleerya etaala n'agijuumukaku ekigega oba n'agita omu ntabbu, baitu agita oku kikondo kyayo, leke emolekere boona abali omu nyumba. 17 Era mazima ndoowo kintu ekibbisiibwe ekitaliswekulwa. Era ndoowo kintu kitamanyiibwe ekitalimanyibwa. 18 Ale muwuliiryenge kusai, leke mwetejenge ebintu byemuwura, kubba buli alina alyongerwaku, n'oyo atalina n'ekyo kyakulowooza nti alinakyo kirimwiyibwaku.”
Abaganda ba Yesu n'onyina
19 Onyina wa Yesu n'abagande ni baiza nibakumutoolya, baitu ni batasobola kumwikaku olwa bantu abanyamwingi. 20 OYesu ni bamukoba, “Omaawo n'abagandaabo beemereire enzai bakwendya okukubona.” 21 Baitu oYesu n'abairamu ati, “Omawange n'abaganda bange nibo abo boona boona abawura ebigambo bya Kanca ni babikola.”
OYesu akugwagwanya ompungo
22 Ekiro kimwei oYesu n'akoba abeegesebwa baamwe nti “twabe enseeri.” Ni batemba eryato ni baaba. 23 Nibaali bakugimba, oYesu n'awunguka. Ompungo owa maani n'aimuka oku nyanjaa, eryato ni ritandika okwizula amaizi, ni basuumirwa munno!
24 Abeegesebwa ni baaba ni bamususumula, ni bakukoba “Mukama, Mukama, tukulika!”
OYesu niyasusumukire n'ayamira ompungo n'okucambaituka kwa maizi, ompungo n'alekeraawo enyanja n'egwagwana. 25 N'abuulya abeegesebwa baamwe, “Okwikiriza kwanywe kuli gwa ayi?”
Omu kutiina n'okwewuunya ni babuulyangana bonkai na bonkai nti, “Oni muntu ki? Alagira ompungo n'amaizi ni bimuwura!”
OYesu okutamba omusaiza eyaaluku omuzumu
26 Ni basala enyanja okuliga e Galiraaya, ni baika omu nsi y'aBagerasene. 27 OYesu niyazwire omu bwato, omusaiza owa mu kibuga eyaluku emizumu n'aiza n'amwitirana. Omusaiza oni yaali namaare ebiro bingi nga tazwala gonze okubba omu nyumba, yaabbanga mu mbi. 28 Niyaboine oYesu n'abbolokoma, n'amugwa omu maiso n'abazira aiguru n'akoba, “Yesu Mwana wa Kanca Akira byona, okuntakisya ki? Nkwesengereirye otombonyaabonya!” 29 Kini yakibazire kubba oYesu yaali nalagiire omuzumu okuluga oku musaiza. Gwamukwatanga emirundi gingi, era gonze nibaabbanga nibamubwere enjegere, amagulu n'emikono, ni bamulinda, yazitiicanga ni gumusindiikiirya omwirungu.
30 OYesu n'amubuulya, “Eibara lyamu niiwe naani?” N'airamu ati, “Ninje Iye,” kubba yaalumu emizumu gingi. 31 Emizumu ni gimwesengeerya obutagipekera kuzumu. 32 Eigana lya mberege erikooto ryali nirikuliira oku lusozi. Ni gisaba oYesu agiikirize giyingire omu mberege, n'aikiriza. 33 Emizumu ni gimuzwaku, ni gingira omu mberege, eigana lyona ni rijumbutuka okuzwa oku lusozi, ni rigwa omu maizi ni lilika. 34 Abaliisya ba mberege nibaakiboine ni bairuka ni bararangya amakuru omu kibuga n'ebyalo, 35 Abantu ni baiza okubona ekibbairewo. Nibaikire awaali oYesu, baayajirye omusaiza eyaiyibweku emizumu naikaliire oku magulu gaamwe, nazwaire era nakweteja kusai; era ni batiina muno. 36 Abo abakiboine ni bakobera abairabaabwe omusaiza eyaaluku emizumu engeri gye yatambiibwe. 37 Obwo aBagerasene boona boona nikwo okusaba oYesu abazwere ayabe, kubba baatiinire muno. N'aira omu bwato, n'airayo enseeri.
38 Omusaiza eyatambirweku emizumu ni yeesengeerya oYesu ayabe naye, baitu oYesu n'amulaga n'akukoba, 39 “Irayo e waanywe omanyisye ebikulu oKanca byakukoleire.” Omusaiza n'ayaba omu kibuga kyona nakusubiira ebintu ebikulu oYesu byamukoleire.
OYesu okutamba omukali owa kajwisyo
40 OYesu niyaireyo enseeri, abantu baingi ni bamutangiira, olwakubba baali bamulindiriirye. 41 Omusaiza eyayetebwanga Yayiro, omwei oku bakulu ba ikumbaaniro n'aiza n'akubba amajwi awaali oYesu, nakumwesengeerya ayabe omu maka gaamwe, 42 kubba omwara owa myaka eikumi nebiri, gwe yaalina yenkai, yaali nali ampi okufa.
OYesu niyaali nakwaba n'oYayiro, abantu baingi ni bamukumbaaniraku omu kamigo. 43 Omu bo mwalumu omukalib eyaali nalwaire okujwa omusaayi okumala emyaka ikumi nebiri, baitu nga ndoowo yasoboire okumutamba. 44 Naigereera oYesu nakuzwa e nyuma, n'akwata oku mugo gwa kanzu yaamwe, okujwa omusaayi ni kukangirawo.
45 OYesu n'abuulya ati, “Naani ankwaiteku?”
Boona boona nibeegaine, oPeetero n'akoba, “Mukama abantu baingi abakukumigiirya.”
46 Baitu oYesu n'airamu, “Alowo omuntu ankwaiteku, kubba mpuliirenge amaani agatamba nigakundugamu.”
47 Omukali niyaboine tiyasobole kwebbisa n'azwayo natintibbaire n'afukamira oku magulu ga Yesu n'amukoba ekyamumukwatisiryeku era ka natambiirwewo. 48 OYesu n'amukoba, “Mwana wange okwikiriza kwamu kukutambire, yaba mirembe.”
Okutambwa kwa mwara wa Yayiro
49 OYesu niyaali nacabaza n'omukali, omuntu eyazwire e wa Yayiro, omukulu wa ikumbaaniro, n'aika, n'akoba, “Omwara waamu afiire, otagadya mwegesya.”
50 OYesu niyakiwuliire, n'akoba oYayiro, “Otatiina; ikirizambe, omwana akwiza kutambwa.”
51 OYesu niyaikire e wa Yayiro, n'ataikiriza muntu yeena yeena kwingira naye mu nyumba, okwiyaku oPeetero, oYokaana n'oYakobo, n'oitewamwana n'omawaamwe. 52 Omu nyumba mwalumu abantu abaali bakukunga n'okukubba ebiboobo, n'abakoba, “Mutakunga, omwana tafiire awungukirembe.”
53 Abantu ni bamusekeera kubba baali nibamaite nti afiire. 54 Baitu oYesu n'amukwata oku mukono n'amweta, “Mwala we, imuka!” 55 N'airamu obwomi, amangu ago n'ayemeera. OYesu n'abakoba bamuweerye ebyakulya. 56 Ababyaire baamwe ni bawuniikiira muno, baitu oYesu n'abalagira obutakoberaku muntu yeena yeena ekibbairewo.