7
OYesu okutamba omwiru wa musirikale oMurooma
1 OYesu niyamaare okubaza bini egiri abantu, n'aingira omu Kaperenawumu. 2 Waaliyo omukulu wa kikumi omu iye lya Rooma eyaalina omwiru waamwe gweyayendyanga omuno. Omwiru oyo yaali n'alwaire n'ali ampi okufa. 3 Omukulu oyo yawuliire oku Yesu era n'atuma abamwei oku bakaire b'aBayudaayaa gyali okumusaba aize atambe omwiru waamwe. 4 Nibaizire e wa Yesu, ni bamwesengeerya bati, “Bairaba omukulu oni omujune, 5 kubba ayendya muno eiyanga lyaiswe era yatwombokeire eikumbaaniro.” 6 OYesu n'ayaba nabo.
Naliampi okwika eka, omukulu n'atuma abataayi baamwe okumukoba: “Mukama, oteegadya, kubba tinsemereire kukucaalisya mu maka gange. 7 Era nikyo ntaasemereire na kwiza kukwitirana. Baitu baza kigambo kyonkai, omwiru wange yawona. 8 Njeena ndi muntu alina abakama bange, era ndina abasirikale bentwala. Ninkoba oni nti: ‘Yaba’, ayabambe; n'owondi nti: ‘Iza’, aizambe, n'omwiru wange nti: ‘kola kini’, akikola.”
9 OYesu niyawuliire bini n'awuniikiira muno, n'ayindukira abantu beyaali nabo, n'abakoba ati, “Nkubakoba nti, timbonanga kwikiriza nka kuni gonze omu Isirairi.” 10 Abakwenda nibaikire omu maka gaamwe, ni baaja omwiru n'atambibwe.
OYesu okuyimboola omwana wa namwandu
11 Niwaayakairewo akaire kadooli, oYesu n'ayaba omu kibuga kya Nayini, era abeegesebwa baamwe n'abantu baingi ni baaba naye. 12 Niyaigereire eirembo lya kibuga, ni wazwayo abaali beetiikire omulambo gwa mutaani wa namwandu, oni niye yaali omwana waamwe yenkai. Onamwandu yaali n'abantu baingi aba mu kibuga. 13 OMukama oYesu niyaboine omukali, n'amusaasira, n'amukoba, “Tokunga” 14 OYesu n'ayaba n'akwata oku kaara, abaali nibeetiikire omulambo ni beemeera. N'akoba ati: “Musigazi nkukukoba, imuka!” 15 Omusigazi eyaali n'afiire n'aimuka n'aikala n'abaza, oYesu n'amukwatisya omawaamwe. 16 Abantu boona ni batiina ni bawaisya oKanca nibakukoba nti, “Omulangi omukulu abonekeire omwiswe, oKanca aizire okujuna abantu baamwe.” 17 Amawuro ga Yesu gani ni gamanyibwa omu Buyudaaya yona n'ebitundu ebyerereirewo.
OYokaana oMubatiza akutuma abeegesebwa e wa Yesu.
18 Abeegesebwa ba Yokaana oMubatiza ni bamusubiira ebintu bini byona. Ye nikwo okwetaku babiri, 19 n'abatuma e wa Mukama oYesu okumuubuulya nti, “Niye we akwiza, kanda tulinde owondi?”
20 Nibaikire e wa Yesu, ni bamukoba, “OYokaana oMubatiza atutumire okukubuulya nti, ‘Niye we akwiza, kanda tulinde owondi?’ ”
21 Omu bwire obwo oYesu n'atamba abantu baingi abaalina endwaire n'emizumu, n'alibbula abaigali ba maiso baingi. 22 Nikwo okukoba abakwenda ati, “Mwireyo mukobere oYokaana bye muboine n'ebye muwuliire: ababbaire abaigali b'amaiso bakubonia, ababbaire abalema bakutambula kusai, n'abagenge batambiibwe, ababbaire abakiigara matwi bakuwura, n'abafu bakuyimbooka, n'Amawuro Agasai gakukoberwa abaseege. 23 Wa mukisa oyo atalizwa mu kwikiriza okulwange.”
24 Abakwenda ba Yokaana nibaayabire, oYesu n'asubiira abantu ebikufa oku Yokaana: “Nimwayabire omwirungu mwayabire kubona ki? Ekibingo ekikutengeeta n'ompungo? 25 Baitu, mwayabire kubona ki? Omuntu azwaire engoye ezikuseryaserya? Bbe, abazwala batyo babba mu mbuga z'abakama. 26 Baitu mwayabire kubona ki? Mulangi? Mazima, kambakobere: Oyo akusinga omulangi. 27 Oni niye oYokaana eyawandiikiibweku nti:
“ ‘Bona, ndituma omukwenda wange akwebembere,
niye alikusaayiriirya enzira.’
28 Kambakobere; omu bantu abaabyaliibwe abakali, ndoowo n'omwei asinga oYokaana. Baitu omudooli omu bukama bwa Kanca amusinga.”
29 (Abantu boona, gonze abasoroolya ba musolo, nibaawuliire ebigambo bya Yesu ni baikiriza nti enteekateeka ya Kanca ya mazima, kubba baabatiziibwe oYokaana. 30 Baitu aBafalisaayo n'abeeteja ba mateeka ni beiya oku nteekateeka ya Kanca, olwakubba baagaine okubatizibwa oYokaana.)
31 Obwo, abantu ba biro bini mbaisanisye ki? Baisana ki? 32 Baisana abaana abaikaliire omu katale nibakugongoizokerangana bati:
“ ‘Tubafuuwiire endere,
ni mutabina;
tukubbire ekiboobo,
ni mutakunga.’
33 OYokaana oMubatiza yaizire n'atakulya mere ya buliizo gonze okunywa eviini, ni mukoba muti: ‘Aluku omwoyo ogubbi!’ 34 OMwana wa Muntu niyaizire nakulya amwei n'okunywa, ni mukoba muti: ‘Omuntu oni wa mwolonko era mutamiire, munywani w'abasoroolya ba musolo amwei n'ababbi!’ 35 Baitu amagezi agasai gamanyirwa ku byana byago.”
OYesu okusukwaku amafuta e wa Simooni
36 Omwei oku Bafalisaayo yayetere oYesu okulya naye. OYesu n'aingira omu nyumba ya Mufalisaayo oyo n'aikaara okulya. 37 Omukali omusiisi eyaabbanga omu kibuga ekyo niyawuliire nti oYesu akuliira omu maka ga Mufalisaayo, n'aleeta akacupa ak'alubasita ak'amafuta agacuunyi, 38 n'ayemeera marambi wa Yesu ampi n'amagulu n'akukunga, n'atotya amagulu gaamwe n'amaliga, obwo n'agasusula n'eisoke lyamwe, n'okuganywegera era n'agasukaku amafuta agacuunyi.
39 Kini oMufalisaayo eyaali amwetere niyakiboine, n'akoba omu mutima gwamwe nti, “Banga oni abbaire omulangi yaakwetejere omuntu akumukwataku nali omusiisi.”
40 OYesu nikwo okumukoba ati; “Simooni ndina kyenkukukoba.” Yeena n'amwiramu: “Mwegesya kinkobere.”
41 OYesu n'amukoba ati, “Alowo abantu babiri, abaali bakutongwa omuwoli wa mpiiya. Omwei yaali akutongwa edinaali ebikumi bitaanu, n'owondi edinaali amakumi ataano. 42 Nibaalemerwe okusasula, bakali babiri n'abasaasira. Ale naani oku babiri eyaakusinga okumwendya?”
43 OSimooni n'amwiramu ati, “Nkulowooza oyo eyasaasiirwe ezingi.” OYesu n'amukoba ati, “Olamwire kusai.”
44 OYesu nikwo okuyindukira omukali n'akoba oSimooni, “Omukali oni okumubona? Naingiire omu nyumba yaamu, tiwampaire maizi ga kunaaba magulu, baitu omukali oni, atoterye amagulu gange n'amaliga gaamwe, n'okugasusulisya eisoke lyamwe. 45 We tiwangwire mu kisubba, baitu omukali oni, okuzwa lwe naingiire omwamu, acaali kulekayo kunywegera magulu gange. 46 We tonsukireku mafuta ku mutwe, baitu ye asiigire amagulu gange amafuta agacuunyi. 47 N'olw'ekyo, kankukobere, ebibbi byamwe ebingi bisaasiirwe n'okwendya kwamwe kwingi. Baitu oyo asaasiirwe ebidooli, okwendya kwamwe kudooli.”
48 OYesu n'akoba omukali ati: “Ebibbi byamu bisaasiirwe.”
49 Abagenyi abaali baikaliire naye nibatandika okubaza bati: “Naani oni asaasira ebibbi?”
50 OYesu n'akoba omukali, “Okwikiriza kwamu kukujunire; yaba mirembe.”