6
OMukama wa Sabbiiti
1 Ekiro kya Sabbiiti kimwei, oYesu yaali nakwakala omu musiri gwa ŋaano, abeegesebwa baamwe ni batandika okunokola engaano, okuginyunka omu ngalo n'okugirya. 2 ABafalisaayo abamwei ni babuulya nti, “Lwaki mukukola ekitaikirizibwa oku Sabbiiti?”
3 OYesu n'abairamu ati; “Timusomangaku oDawudi kyeyakoore ye enzala niyamulumire amwei n'abo beyaali nabo? 4 Nka ni yaingiire omu nyumba ya Kanca, n'alya emigaati egiwonge, n'aweerya n'abo beyaali nabo?” Nigyo migaati egitaikirizibwanga kuliibwa muntu wondi, okwiyaku abakabona bonkai. 5 Nikwo okubakoba nti; “OMwana wa Muntu niye Mukama wa Sabbiiti.”
OYesu okutamba omusaiza owa mukono ogukabire
6 Oku Sabbiiti egindi oYesu n'aingira omwikumbaaniro n'ayegesya. Omwikumbaaniro mwalumu omusaiza owa mukono ogulyo ogwakabire. 7 Abeegesya ba mateeka n'aBafalisaayo baali bakutoolya ensonga kwebamujunaanira, ni bamutaaku amaiso okubona oba yatambira oku Sabbiiti. 8 OYesu n'amanya bye baali bakulowooza, n'akoba omusaiza owa mukono ogwakabire nti, “Imuka oyemeere omu maiso ga bantu.” Omusaiza n'aimuka n'ayemeera awo.
9 OYesu n'abakoba, “Kambabuulye, ekiikirizibwa okukolebwa oku Sabbiiti nikyo kiri ayi oku bini: Kukola kusai oba kukola kubbi, kurulumula bwomi oba kubuzikya?”
10 Awo boona n'abeeruguurya amaiso, era n'akoba omusaiza, “Golola omukono gwamu.” N'agugolola ni gutambirwa kyarumwei. 11 Awo ni beesoma, ni beebuulya bonkai na bonkai kyebakoora oYesu.
OYesu akukoma abakwenda eikumi n'ababiri
12 Omu biro ebyo oYesu n'ayaba oku lusozi okusaba, n'akeisya obwire nakusaba oKanca. 13 Nibwakeire, n'ayeta abeegesebwa baamwe, n'akomyamu ikumi nababiri beyayalikire abakwenda; era nibo bani: 14 OSimooni (gweyasangirwe nayalikire Peeteroa), omuganda wa Simooni eyayetebwanga Andereya, oYakobo, oYokaana, oFiripo, oBatulumaayo, 15 oMatayo, oTomasi, oYakobo omutaani wa Alufaayo, oSimoonib eyayetebwanga omulwaniiri wa Iyanga, 16 oYuda omutaani wa Yakobo, n'oYuda Isikaliyoti eyamuliraine.
OYesu okutamba abalwaire
17 OYesu n'asirimuka n'abantu boona n'ayemeera awaseeteekeeri weyaajiirye abeegesebwa baamwe abandi baingi n'abantu abandi abalugire omu Buyudaaya n'omu kibuga e Yerusaalemu n'oku lukeito lwa nyanja e Tiiro n'e Sidoni, 18 abaizire okumuwuliirya n'okutambwa endwaire zaabwe. Abo abagadibwanga abadaimooni baatambirwe, 19 n'abantu boona boona ni bagezaaku okumukwataku, olwakubba amaani gamulugangamu ni gabatamba.
Aba mukisa n'abakubona enaku.
20 OYesu n'aroleera abeegesebwa baamwe n'abakoba,
“Mwesiimire nywe abaseege,
kubba obukama bwa Kanca bwanywe.
21 Mwesiimire nywe abakulumwa enzala ati,
kubba muliikutisibwa.
Mwesiimire nywe abakukunga ati,
kubba mwaliseka.
22 Mwesiimire nywe abantu nibaakubanobanga,
ni babasoroora, n'okubagaya,
ni babeeta ababbi olwa Mwana wa Muntu.
23 “Musemereerwe ekiro ekyo era muguduke olwa kusemereerwa, kubba empeera yaanywe gikooto omwiguru, nkweta n'abaitebaabwe nimwo bakoore abalangi.
24 “Baitu ziribaaja nywe abaguuda,
kubba okusemereerwa kwanywe mumaare okukutunga.
25 Ziribaaja nywe abakwikuta ati,
kubba mulirumwa enzala.
Ziribaaja abakuseka ati,
kubba mulyenatira era mukunge.
26 Ziribaaja abantu boona nibaabazangaku okusai,
kubba nimwo abaitebaabwe baayakairye abalangi ababubeyegi.
Okwendya abatukola okubbi
27 “Baitu nkubakoba nywe abakumpuliirya: Mwendyenge ababakola okubbi! Mukolenge kusai ababanoba. 28 Musabirenge omukisa ababaceena, musabirenge ababakola okubbi. 29 Omuntu nakupaayanga okwitama erimwei omuyinduuranga n'erindi. Omuntu nakutwalangaku ekooti yaamu, tomwimanga kanzu. 30 Buli eyaakukusabanga muweeryenge, n'eyaakutwalanga ekyamu, tomusabanga kukikwiriirya. 31 Ekyemwendya abantu okubakooranga, nywena nikyo mubakoorenge.
32 “Nimwakwendyanga abo ababendya bonkai, mugaso ki? Kubba n'ababbi boona bendya ababendya! 33 Era nimwakukolanga okusai abo ababakola okusai bonkai, mugaso ki? Kubba n'ababbi nimwo bakola. 34 Era nimwakutiizanga abantu abaabairiiryanga muligasirwa mutyai? ‘N'ababbi’ batiiza ‘ababbi,’ nibakusuubira okusasulwa omu bwizuli. 35 Baitu nywe mwendyenge abanyanzugu baanywe, mubakolenge kusai, era mubatiizenge nimutakubasuubira kubairiirya kantu koona. Obwo empeera yaanywe eribba gikooto, era mulibba baana ba Kanca, kubba akwatirwa ekisa abateebalya n'ababbi. 36 Mubbenge ba kisa nk'oitewaanywe nali wa kisa.
Obutasaara abandi musango
37 “Timusalanga musango, nywena mutalisaarwa. Timusaliiryanga nywena tibalibasaliirya. Musaasirenge nywena mulisaasirwa. 38 Mugabenge, nywena muligabirwa. Olulengo olwizuli, olwikatiirwe, olutengeteibwe, era olukubwoga nilwo lwalibateerwa omu bidagado byanywe. Olulengo lwe mulikolesya okupimiramu, nywena nilwo lulibapimirwamu.”
39 OYesu n'abasubiira olufumo olundi ati: “Omwigali wa maiso asobola okwebembera omwigali wa maiso omwirawaamwe? Bakali babiri tibagwa omu kiina? 40 Omweegesebwa tasinga mwegesya waamwe, baitu buli omwei namala okwegesebwa okusai, abba nk'oyo eyamwegeserye. 41 Lwaki oroleera akasubi akali omu riiso rya mutaayi waamu n'otafa ku kisaale ekiri omu riiso ryamu. 42 Era osobola otyai okukoba omutaayi waamu nti, ‘Mutaayi wange, leka nnyiye akasubi oku riiso ryamu,’ we omwenyenere nolemerwe okweiyamu ekisaale omu riiso ryamu? Mugobya we, banza oiye ekisaale omu riiso ryamu, obone kusai leke otoolemu akasubi omu riiso rya mutaayi waamu.
Omusaale n'ebyana byagwo
43 “Ndoowo musaale gusai ogwera ebyana ebibbi, era ndoowo musaale ogubbi ogwera ebyana ebisai. 44 Buli musaale bagumanyira ku byana byagwo. Ebyana bya mutiini tibabinokola ku mweramaino n'ezabbibbu tibazinokola ku mugwi. 45 Omuntu omusai aiya ebintu ebisai ebibiikiibwe omu mutima gwamwe, n'omubbi aiya ebintu ebibbi ebibiikiibwe omu mutima gwamwe. Kubba ebiizula omu mutima omunwa nibyo gubaza.
Omwomboki omugezi n'omusiru
46 “Lwaki munyeta, ‘Mukama, Mukama,’ ni mutakola byembakoba? 47 Nabalanga oyo aiza e wange, n'awura ebigambo byange era n'abikola, kyaisana. 48 Aisana omusaiza akwomboka enyumba, eyasakire olwina olulai n'ayomboka omusingi oku lwazi. Ekinyeeri nikyaizire, ni kikubba enyumba baitu netatengeeta, kubba yayombokeibwe kusai. 49 Baitu oyo awura ebigambo byange n'atabita mu nkola aisana omusaiza eyayombokere enyumba okwitakali eginambula musingi. Ekinyeeri nikyagikubbire enyumba n'egwa, n'okugwa kwayo kwali kwa maani.”