5
Okwetebwa kwa beegesebwa abeekereire
1 Ekiro kimwei oYesu niyaali ayemereire ogwa ku nyanja ya Genesaaleetia, abantu ni bamweruguurya omu kamigo, okuwuliirya ekigambo kya Kanca. 2 OYesu n'abona obwato bubiri abategi bwebaali nibalekere oku kirimbi nibayabire okusaayiirya obutimba bwabwe. 3 N'atemba omu kaato akamwei, akaali aka Simooni. N'akoba oSimooni, akagimbe akongereyoku e buluba. OYesu n'aikala n'atandika okwegesya abantu naikaliire omu kaato.
4 Niyamaare okubaza n'akoba oSimooni, “Akaato kaigeeryeyo omu maizi agalai onage obutimba leke okwatisye encwi.”
5 OSimooni n'akoba, “Mukama wange, twagadire obwire bwona bwona, ni tutakwatisya ncwi yeena yeena, baitu olwa kigambo kyamu kanage obutimba.”
6 Nibaakoore nk'oYesu niyabakobere ni bakwatisya encwi zingi n'obutimba ni butandika okwonoka. 7 Ni basumirya abataayi baabwe abaali omu bwato obundi leke baize babajune. Abataayi baabwe ni baiza ni baizulya obwato bukali bubiri era obwato buni ni bwendya okutandika okulika.
8 OSimooni Peetero niyaboine kini n'abundaala ampi n'amagulu ga Yesu, n'akoba, “Mukama wange ndi muntu aizwire ebibbi, tinsemeire we okubba ampi nanje, igeerayo.” 9 OPeetero yabazire kini, ye n'abeyaali nabo ni bakwewuunya encwi ezingi zebaali ni bakwatisirye. 10 OYakobo n'oYokaana abataani ba Zebedaayo era abataayi ba Simooni boona ni beewuunya. OYesu n'akoba oSimooni, “Otatiina, okuluga ati waakuleetanga bantu gyendi omu kifo kya kutega encwi.” 11 Ni bakokota obwato bwabwe ni babwirya oku kirimbi, ni baleka awo buli kintu kyebaali nakyo, ni baaba n'oYesu.
Omusaiza eyaalina ebigenge
12 OYesu niyaali omu kimwei oku bibuga, omusaiza eyaalina ebigenge n'aiza. Omusaiza ni yaboine oYesu, n'akubba amajwi nabundaire, ni yeesengeerya oYesu ng'akukoba ati, “Mukama niwaabba n'osiimire oyinza okunsemeza.”
13 OYesu n'agolola omukono gwamwe n'akwata oku musaiza n'akoba, “Nsiimire, semezebwa!” Amangu ago ebigenge ni bimuwonaku.
14 OYesu n'alagira omusaiza ati, “Otosubiira muntu yeena yeena, okwiyaku yaba weerange egiri kabona era olwa kusaayiribwa oweeryeyo ebyakuweeryayo oMusa byeyalagiire, leke abantu bamanye nka niwasaayiriibwe.”
15 Gonze oYesu yalagiire omusaiza obutasubiira muntu yeena yeena, baitu amawuro gaamwe ni geeyongera okuraranga woona woona, abantu baingi ni baizanga okumuwuliirya n'okusemezebwa endwaire zaabwe, 16 baitu obundi oYesu yabeesoroorangaku n'ayaba omu bifo ambula bantu n'asaba.
OYesu okutamba ondema
17 Ekiro kimwei oYesu yaali nakwegesya, aBafalisaayob n'abeegesya b'amateeka ga kiyudaaya, abaali nibalugire omu byalo byona byona ebya Galiraaya, e Buyudaaya n'e Yerusaalemu boona ni baiza ni baikaara awo. OMukama yaali nawaire oYesu amaani aga kutamba abantu abalwaire. 18 Waalowo abasaiza abaizire nibeetikire ondema oku kaara. Ni bagezaku okumwingirya omu nyumba leke bamute omu maiso ga Yesu. 19 Nibaalemereirwe okumwingirya olwa bantu abanyamwingi, ni batemba oku lukanga lwa nyumba, ni boowaku ekitundu ni bamwakalya omu kiwulu kyebaakubbire. Ni bamubiikirya akati omu bantu oYesu weyaali, nagalaamiriire oku kaara.
20 OYesu niyaboine okwikiriza kwabwe n'akoba ondema, “Musaiza we, ebibbi byamu bikusaasiirwe.”
21 Buli omwei oku Bafalisaayo n'abeegesya b'amateeka ga diini n'atandika okwebuulya omu mutima nti, “Omuntu oni okubaza ebya buwemu akweyeta naani? Notoireku oKanca, naanite owondi asaasira ebibbi?”
22 OYesu n'amanya byebaali bakwebuulya, n'ababuulya, “Lwaki mukwebuulya ebigambo bini omu mitima gyanywe? 23 Oku bibiri ekikusinga obwangu kiri ayi: Okukoba nti, ‘Ebibbi byamu bikusaasiirwe,’ Oba okukoba nti, ‘Imuka otambule?’ 24 Kini nakikola leke mumanye nti o'Mwana wa Muntu alina obusobozi oku nsi okusaasira ebibbi.” N'akoba ondema nti, “Imuka okwate akaara kaamu oyabe eka.” 25 Amangu ago, abantu boona boona ni bakubona, ondema n'aimuka, n'akwata bye yaali n'agalaamiriireku, n'ayaba eka nakuwaisya oKanca. 26 Buli muntu ni yeewuuunya era n'awaisya oKanca. Ni baizula okutiina ni bakoba, “Ekiro kyaleero tuboine ebintu ebikulu.”
Okwetebwa kwa Leevi
27 Kini nikyaweire, oYesu n'awuluka omu kibuga n'abona omusoroolya wa musolo eyayetebwanga Leevi, naikaliire weyasorooleeryanga omusoloc. OYesu n'akoba oLeevi, “Iza, obbe omwegesebwa wange.” 28 OLeevi n'aimuka, n'aleka ebintu byona byona byeyaali nabyo, n'ayaba abbe omwegesebwa wa Yesu
29 OLeevi, omu maka gaamwe, n'akoora oYesu obugenyi obw'amaani. Abasoroolya ba musolo banyamwingi n'abantu abandi ni baliira amwei n'oYesu n'oLeevi. 30 ABafalisaayo n'abeegesya b'amateeka aba mwabwe, ni bagongoizekera egiri abeegesebwa ba Yesu, ni bakoba, “Lwaki mukulya n'okunywa n'abasoroolya ba musolo era n'abakoli ba bibbi abandi?” 31 OYesu n'abairamu ati, “Atali mulwaire tataka murulumuli, omulwaire niye amutaka. 32 Tinaiziriire bantu abaikiririire, abalina ebibbi nibo naiziriire leke mbeete balige omu bibbi.”
OYesu bakumubuulya oku kusiiba
33 Ni bamukoba, “Abeegesebwa ba Yokaana basiiba era ni basaba. N'abeegesebwa b'aBafalisaayo boona nimwo bakola batyo. Abaamu nka batasiiba?”
34 OYesu n'abairamu, “Abagenyi abaayeteibwe oku bugenyi bwakuswera oyinza okubasiibisya omukama wa bugenyi n'acaali nabo? 35 Ekiseera kikwiza omukama wa bugenyi abaiyibweku, nalibaiyibwaku ale nimwo balisiiba.”
36 N'abasubiira olufumo luni, “Omuntu tayonola katundu oku lugoye oluyaaka leke akalibbikirisye ekiwulu ekiri oku lugoye olukaire. Nakola atyo olugoye oluyaaka abba alusiisire, n'akatundu akasaarwe oku lugoye oluyaaka, oku lugoye olukaire kwe kabaziriirwe tikananiraku. 37 Era ndoowo muntu asuka oiyeera wa viini mu nsawu za byanzo ezikaire. N'akikola oiyeera oni akaakula ebyanzo n'asukuka n'ensawu n'esiisikala. 38 Oiyeera wa viini ateekwa kusukibwa mu nsawo za byanzo eziyaaka. 39 Era ndoowo muntu amala okunywa ompolwe wa viini ayendya okunywa oiyeera, kubanga akoba ati, ‘Ompolwe niye akukira obusai.’”