4
Okugezesebwa kwa Yesu.
1 OYesu, yazwire oku Yoludaani naizwire oMwoyo Akwera, era oMwoyo n'amutwala omwirungu. 2 Gyeyayoyeereibwe oSetaani okumala ebiro amakumi anai. Ebiro ebyo byona tiyaliire kantu, era oku nkango yaabyo enzala n'emuluma.
3 OSetaani n'amukoba, “Niwaabba Mwana wa Kanca, lagira amabbaale gani gafooke emere.”
4 Baitu oYesu n'airamu, “Ebyawandiikiibwe bikoba, ‘Omuntu tabbanga mwomi na mere yonkai.’”a
5 OSetaani n'amutwala oku lusozi aiguru, omu kaire akadooli n'amulanga amanga ga nsi goona. 6 N'amukoba, “Nkwiza okukuweerya obusobozi bwona n'ekitiinisya kyabyo kyona, kubba, byampeereibwe, era nsobola okubiweerya buli gwenkwendya. 7 Kale niwandamya, byona byona byabba byamu.”
8 OYesu n'amwiramu, “Kyawandiikiibwe kiti, ‘Ramyanga oMukama oKanca waamu, era nigwo oweerezenge yenkai.’”b
9 OSetaani n'atwala oYesu aiguru oku lukanga lwa iramyo n'amukoba, “Niwaabba Mwana wa Kanca, guluka ogwe ansi. 10 Kubba kyawandiikiibwe nti,
“‘Alilagira abamalaika
okukukuumira kimwei,c
11 bakukwatiire
oleke kugwa kwibbaale kuwutaara.’d ”
12 OYesu n'amukoba, “Togezesyanga Mukama oKanca waamu.”
13 OSetaani niyamaare okumugezesya omu buli ngeri n'amuleka, okwikya lwalitunga omukisa ogundi.
OYesu nibaamugaine e Nazaleesi.
14 Nibyaweire oYesu n'aira e Galiraaya naizwire amaani ga Mwoyo Akwera, era amawuro ga kwira kwamwe ni gaika omu kitundu kyona. 15 OYesu yayegeserye omu makumbaaniro goona, era buli omwei n'amuwaisya.
16 OYesu n'aiza e Nazaleesi, gyeyakuliire, era ekiro kya Sabbiiti n'ayaba omwikumbaaniro, ka niyaali amanyiriire. N'ayemeera okusoma. 17 Ni bamuwa ekitabo kya Isaaya omulangi, niyakiswekwire, n'aika we kikoba:
18 “Nduku oMwoyo wa Kanca,
kubba yansensereku amafuta
okukobera abaseege Amawuro Agasai.
Yantumire okutaisya ababbwe,
okulibbula abaigali ba maiso,
n'okuweerya emirembe abakumigwa.
19 Okulangiira omwaka gwa Kanca ogwa kusaasira.”
20 Niyamaare okusoma, n'aswekaku ekitabo, n'akiweerya omuweereza, n'aikaara. Boona boona abaali omwikumbaaniro ni bamuwanga amaiso. 21 N'atandika okubasoboora ati, “Ekiro kya leero ekyawandiikiibwe kini kiikiire nka ni mwawuliire.”
22 Boona boona baasiimire era ni bawuniikiira olwa bigambo byamwe era ni beebulya, “Oni tiniye mwana wa Yusufu?”
23 OYesu n'abakoba, “Mazima mwalincwera olugero luni nti, ‘Musawu weerulumule wenkai! Koora ani omu kibuga kyamu ebyetwawuliire nokukola e Kaperenawumu.’”
24 Kambakobere: Omulangi tabba na kitiinisya mu nsi yaamwe. 25 Ekya mazima, omu biro by'Eriya waalowo abanamwandu baingi omu Isirairi, eiguru nilyebbwere emyaka esatu n'ekitundu enjura netekutoonya era ni wagwa enzala gingi omu nsi. 26 Baitu Eriya tiyatumiibwe wandi woona woona, okwiyaku e wa namwandu e Zerufasi omu kitundu kya Sidonie. 27 Era omu Isirairi mwalumu abagenge baingi omu biro bya mulangi Erisa, baitu ndoowo yatambiibwe, okwiyaku oNaamani yenkai oMusuuli.
28 Abantu boona boona omwikumbaaniro nibaawulire ni bagongera muno. 29 Ni baimuka ni bamusindiikiirya okumwiya omu kibuga ni bamutwala okumwegegwe gwa kasozi ekibuga kwe kyayombokerwe, nga bakwendya okumunaga ansi. 30 Baitu n'abaakalamu ni yeeyabira.
OYesu okupeka omuzumu.
31 Obwo n'ayaba e Kaperenawumu, ekibuga omu Galiraaya, era oku Sabbiiti n'atandika okwegesya abantu. 32 Abantu ni beewuunya okwegesya kwamwe, kubba yaali akubazisya busobozi.
33 Omwikumbaaniro mwalimu omusaiza eyaaluku omuzumu, n'akokooma muno, 34 “We! Okututakisya ki? OYesu oMunazaleesi oizire okutuzikya? Nkumaite—oli Mweru wa Kanca!”
35 OYesu n'alagira omuzumu nti, “Sirika, muzweku.” Obwo omuzumu, ni gukubbirawo omusaiza ansi omu maiso gaabwe, ni gumuzwaku atawutaire.
36 Abantu boona boona ni bawuniikiriire ni bakobangana, “Kuni kwegesya kwa mulingo ki! Okwa busobozi n'amaani okulagira emizumu okuzwawo!” 37 Amawuro gaamwe ni gaizula omu bitundu byona ebyerereire ekitundu ekyo.
OYesu okutamba abaingi:
38 OYesu niyazwire omwikumbaaniro yayabire mu maka ga Simooni. Ati onyibyala wa Simooni yaali mulwaire wa musuja, oYesu n'asabibwa okumujuna. 39 N'ainamira oku mulwaire n'ayamira omusuja, ni gwaba. Omukali n'aimukirawo n'atandika okuweereza abantu.
40 Eisana niryali likugwa, ni baleetera oYesu abantu abandwaire eza buli ngeri, n'abatamba boona boona nakubataaku emikono. 41 Mazima, emizumu gyazwire oku bantu, nibakukokooma bati, “Oli Mwana wa Kanca!” Baitu n'agisirikya obutairayo kubaza, kubba gyetejerye nti niye Kurisito.
OYesu okukoba omu makumbaaniro
42 Obwire nibwakeire, oYesu n'azwa omu kibuga nayaba omu kifo ekyenagireku. Abantu ni batandika okumuswaga, era nibaamuboine, ni bamugaana okwaba. 43 Baitu Ye nikwo okubakoba, “Nteekwa okukoba Amawuro Agasai aga bukama bwa Kanca nomu bibuga ebindi, kubba ekyo oKanca nikyo yantumire okukola.” 44 OYesu ni yeeyongera okukoba Amawuro Agasai omu makumbaaniro ga Buyudaaya.