Luka 3

O Yokaana oMubatiza akuteekateeka omuwanda

¹ Awo omu mwaka gwaikumi netaanu ogwa kufuga kwa Kaisaali oTiberiyo, oPontiyo Piraato niyaali akufuga oBuyudaaya, oKerode nakufuga oGaliraaya, omuganda waamwe oFiripo nakufuga Ituliya n'oTurakoniti, n'oLusaniya nakufuga Abireene; ² omu biro Ana n'oKayaafa webaabbeereire abakabona abakusinga obukulu, ekigambo kya Kanca ni kiizira oYokaana omutaani wa Zaakaliya, omwirungu. ³ Natambula omu bitundu byona ebyerereire oYoludaani, n'akoba okubatizibwa okwa kwenenya n'okusaasirwa ebibbi. ⁴ Ka nikyawandiikiibwe omu kitabo kya Isaaya omulangi, “Alowo akwamiira omwirungu, ‘Muteeketeeke omuwanda gwa Mukama n'obuwanda mubugolole. ⁵ Buli kiinamo mukiigaare, ensozi n'obusozi mubiseeteekeerye. Enzira ezeegodere zigololwe, eziwabiina n'ebiguunguuli zisairibwe. ⁶ Abantu boona boona balibona okucungurwa kwa Kanca.’”

⁷ OYokaana n'akoba abantu abaizire gyali okubatizibwa, “Nywe abaana ba walugundu! Naani eyabalabwire okwiruka ekiniga ekikwiza? ⁸ Mwerenge ebyana ebiranga okwenenya. Era mulekere awo okwewaisya nti ‘Tulina aize waiswe oIbbulaimu.’ Kambakobere, oKanca ayinza okukoora oIbbulaimu abaana okuliga omu mabbaale gani. ⁹ Ati empasa eri ku kitina kya musaale era buli musaale oguteera byana bisai gulitemebwa ni gunagibwa omu muuro.”

¹⁰ Abantu ni bamubuulya, “Ati tukole ki?”

¹¹ OYokaana n'airamu, “Omuntu alina engoye eibiri aweeryeku atalina lugoye, era alina emere akole atyo.”

¹² Abasoroolya ba musolo boona ni baiza okubabatiza, ni babuulya bati, “Mwegesya tukole ki?”

¹³ N'abairamu ati, “Timusoroolyanga kikiikiraine.”

¹⁴ N'abasirikale abamwei ni bamubuulya, “Iswete tukole ki?” N'abairamu, “Timunyaganga mpiiya za bantu, timubawangiiryanga misango gyebatairye; omusaala gwanywe gubamalenge.”

¹⁵ Abantu baalindiiryanga n'esuubi era nibakulowooza nti oYokaana yaakubba oKurisito. ¹⁶ OYokaana n'abairamu boona boona, “Nje nkubabatiza n'amaizi, baitu akunkirisya amaani aliiza era tinsemeire na kusindabula bukobba bwa nkaito zaamwe. Ye alibabatiza n'oMwoyo Akwera n'omuuro. ¹⁷ Akwaite olugali omu ngalo akusiiwuula eŋaano n'okugikumbaanirya omu kideero, baitu omusuusi aligwoca n'omuuro ogutalikira.” ¹⁸ OYokaana yabalambire n'ebigambo bingi n'abakobera Amawuro Agasai.

¹⁹ Baitu oYokaana niyanenyeze oKerode, olwa kubandula oKerodiya omuka mugande n'olwa bibbi byeyaali nakoore, ²⁰ oKerode n'ayimbya ekibbi kini oku bindi byeyaali nakoore: N'abbwa oYokaana omu nkomyo.

Okubatizibwa kwa Yesu

²¹ Abantu boona nibaali bakubatizibwa, n'oYesu yeena n'abatizibwa. Niyaali nacasaba, eiguru ni rikingulwa. ²² N'oMwoyo Akwera eyaali omu kisani kya nkaiba, n'amugwaku. Eiraka ni rizwa omwiguru ni rikoba; “Oli Mwana wange, ogwenyendya era ogwensemereerwa.”

Obubyale bwa Yesu

²³ OYesu yatandikire obuweereza bwamwe ng'akwikya emyaka k'asaatu. Abantu nga bakumweta omutaani wa Yusufu. OYusufu omutaani wa Eli, ²⁴ omutaani wa matati, omutaani wa leevi, omutaani wa meliki, omutaani wa Yanayi owa Yusufu, ²⁵ owa Matatiya omutaani owa Amosi, omutaani wa Nakumu. Omutaani wa Esili, omutaani wa Nagayi,

²⁶ omutaani wa Maasi, omutaani wa Mattatiya, omutaani wa Semeyini, oSemeyini omutaani wa Yoseki, omutaani wa Yoda, ²⁷ omutaani wa Yowanaani, omutaani wa Resa, oResa omutaani wa Zerubbaberi omutaani wa Selatyeli omutaani wa Neri, ²⁸ oNeri omutaani wa Meleki. Meleki omutaani wa Addi, omutaani wa Kosamu omutaani wa Elimadamu, Elimadamu omutaani wa Eri,

²⁹ omutaani wa Yesuwa, oYesuwa omutaani wa Eriyezaali mutaani wa Yorimu omutaani wa Matati, Matati omutaani wa Leevi, ³⁰ omutaani wa Simiyoni omutaani wa Yuda; oYuda omutaani wa Yusufu omutaani wa Yonamu omutaani wa Eriyakimu, ³¹ omutaani wa Meleya, omutaani wa Mena, omutaani wa Matasa, omutaani wa Nasani, omutaani wa Dawudi, ³² omutaani wa Yese. Omutaani wa Obbedi, omutaani wa Bbowazi omutaani wa Salumooni, oSalumooni omutaani wa Nakusoni,

³³ omutaani wa Aminadaabbu, omutaani wa Ramu, oRamu omutaani wa Kezirooni omutaani wa Pereezi, oPereezi omutaani wa Yuda; ³⁴ Omutaani wa Yakobo omutaani wa Isaaka, omutaani wa Ibbulaimu, omutaani wa Teera omutaani wa Nakoli, ³⁵ omutaani wa Serugi, omutaani wa Lewu; omutaani wa Peregi, omutaani wa Ebberi omutaani wa Sera,

³⁶ omutaani wa Kayinaani, omutaani wa Alupakusaadi, omutaani wa Seemu, omutaani wa Nuwa, omutaani wa Lameki, ³⁷ omutaani wa Mesuseera omutaani wa Enoki, omutaani wa Yaledi, omutaani wa Makalaleeri, omutaani wa Kayinaani, ³⁸ omutaani wa Enosi, omutaani wa Seezi, omutaani wa Adamu, omutaani wa Kanca.