2
Okubyalibwa kwa Yesu
1 Omu biro ebyo, oKaisaalia Agusitob, omukama wa bukama bwa Rooma, yalagiire okubala abantu ba mu bukama obwo bwona bwona. 2 Kuni nikwo okubala abantu okwekereire okubbaawo omu bukama bwa Rooma. Era omu biro ebyo oKuliniyo niye yaali akukuura eitwale lya Siriya. 3 Buli muntu yaireyo omu kibuga kya waabwe yewandiikisye olwa kubalibwa. 4 N'oYusufu yaligire e Nazaleesi, omu Galiraaya n'ayaba e Beserekemu, ekibuga kya mukama oDaudi omu Buyudaaya, olwakubba yaali wa mu nyumba ya Dawudi. 5 Yayabire n'oMalyamu, omukali gweyaali naragaanisirye okubandula. Baitu oMalyamu yaali nakulize. 6 Nibaali bacaali eyo, oMalyamu nayindukwa. 7 N'abyala omuzigaijo waamwe wa bwojo, n'amuziringa omu bugoye, n'amuta omu kigungiroc olwakubba omu kiraaro kya bagenyi timwalumu kifo.
Abaliisya ba ntaama n'abamalaika
8 Ekiro ekyo obwire, ampi n'e Beserekemu waaliyo abaliisya ba ntaama abaalindanga ekisibo kyaabwe omu mbu. 9 Omalaikad wa Mukama yabonekere gyebali, n'okuseryaserya kwa kitiinisya kya Mukama ni kubeeruguurya, ni batiina muno. 10 Omalaika n'abakoba, “Mutatiina olwakubba mbaleeteire Amawuro Agasai agakwiza okuleeta okusemereerwa egiri abantu boona boona! 11 Ekiro kyaleero oMujuni oMukama oKurisitoe abyaliibwe omu Beserekemu ekibuga kya Dawudi 12 Kini nikyo mwamwetejeryaku: mukwiza okubona omwana aziringiibwe omu bugoye bwa bankeremba nibamutaire omu kigungiro.” 13 Amangu ago abamalaika abandi baingi baaligire omwiguru ni beeyimbya n'omalaika oyo ni bawaisya oKanca ni bakukoba bati,
14 “Ekitiinisya kibbe omwiguru egiri oKanca, n'emirembe gibbe oku nsi omu bantu basiima.”
15 Abamalaika nibaamaare okwirayo omwiguru, abaliisya ba ntaama ni bakoba, “Twabe e Beserekemu tubone ekigambo kini oKanca kyatuswekuliire.”
16 Ni balabukaku okwaba, ni baaja oYusufu, oMalyamu n'omwana onkeremba nibamubbasisirye omu kigungiro. 17 Nibaaboine omwana, ni basubiira abantu ebigambo omalaika byeyamubazireku. 18 Abaabiwuliire ni babyewuunya. 19 OMalyamu n'aizukiranga ebigambo ebyo era n'abirowoozangaku. 20 Abaliisya ba ntaama ni bairayo nibakuwaisya oKanca n'okumuwa ekitiinisya, olwa bigambo omalaika byeyabakobeire n'ebyebaboine. Ebyebaboine, byalimbe nk'omalaika niyabibakobeire.
OYesu akuweebwayo omwiramyo
21 Ekiro kyamunaani okuliga oku kubyalibwa kwamwe, omwana baamusaliliiref, ni bamwalika eibara Yesu. Eibara lini niryo omalaika lye yamuwaire nacaali na kugwa munda ya mawaamwe. 22 Ebiro bya kweyeryag kwabwe nibiweireku, oYusufu n'oMalyamu baayabire e Yerusaalemu okuweeryayo ebyakweyerya nk'eiteeka lya Musa nilyalagiranga abaakabyala. Baatwalaine omwana okumuwayo omwiramyo egiri oMukama, 23 olwakubba eiteeka lya Mukama lyali likoba, “Buli muzigaijo omwojo yaakuwongebwangayoh egiri Mukama.” 24 Nibaweeryayo ebyakuweeryayo ebiragirwa omwiteeka lya Mukama: enkaiba ibiri oba enjiibwa ibiri.
Obulangi bwa Simyoni
25 Ebiro ebyo omu Yerusaalemu mwalumu omusaiza eyayetebwanga oSimyoni. Omusaiza oyo yaali naikiririire era yekendekekanga omu maiso ga Kanca. OSimyoni yaikaire nalindiriirye okwiza kwa mukomye wa Kanca, eyaali nakwiza okucungura eiyanga lya Isirairi. Yaaluku oMwoyo wa Kanca 26 n'oMwoyo oni yaali nakobeireku oSimyoni nti ye oSimyoni talifa atakaboine Kurisito wa Mukama. 27 Ekiro oMalyamu n'oYusufu kwe baayabiire okuweeryayo omwana egiri Mukama nka bweyaali empisa ya mateeka, oMwoyo yaali natwaire oSimyoni omwiramyo. 28 OSimyoni n'aginga omwana, n'awaisya oKanca n'akoba ati,
29 “Ati Mukama wange leka omwiru waamu afeere omu mirembe, nka niwaragaanisirye;
30 kubanga amaiso gange gaboine omujuni
31 ogwewateekaniriize abantu boona.
32 Niye lumole olwamoleka oKanca amanga goona goona gamweteje, era akwiza kubba kitiinisya kya bantu baIsirairi.”
33 OYusufu n'oMalyamu beewuunyize ebigambo oSimyoni byeyabazire oku mwana. 34 OSimyoni n'abasabira omukisa era n'akoba omawamwana ati, “Omwana oni atumiibwe Kanca era akwiza kuleetera baingi omu Isirairi okugwa n'okwimuka, baitu egiri abandi akwiza kubba akabonero akalizumiirwa. 35 Olw'ekyo ebigambo ebiri omunda omu mitima gya bantu bikwiza kumanyi:bwa. We omawamwana enaku gyalikwizula omu mwoyo gwamu.”
Obulangi bwa Ana
36 Omwiramyo mwalumu omulangi omukali ogwebaayetanga Ana. Ana yaali mwara wa Fanweri eyaali omu lubu olwa Asa. 37 Yaali namwandu, oibawaamwe yafiire niyaakamala okubba naye emyaka musanju namubandwire. OYesu okubyalibwa Ana nakairikire, naicirye emyaka kinaanai nenai. Ebiro byona yaabbanga mwiramyo nakuramya oKanca emisana nobwire, nasabanga era nasiibanga. 38 OSimyoni niyaali akubaza n'oYusufu, Ana yeena n'aiza n'atandika okuwaisya oKanca. Yabazire oku mwana egiri bantu boona abalindiiryanga n'esuubi okubona oKanca nakucungura oYerusaalemu. 39 Nibaamaliliirye emirwa egiragirwa omu mateeka ga Mukama, oYusufu n'oMalyamu baireyo e waabwe e Nazaleesi omu Galiraaya. 40 Omwana niyeeyongera okukula n'okubba n'amaani. OKanca n'amwizulya amagezi era n'amutaaku n'ekisa kyamwe.
OYesu akubaza n'abeegesya ba diini
41 Buli mwaka oYusufu n'oMalyamu baayabanga e Yerusaalemu oku bugenyi bwa Kwakalibwaku.i 42 N'omwaka ogwo, oYesu naikirye emyaka ikumi nebiri egya bukulu, baayabire oku bugenyi obwo nka nibaakolanga. 43 Obugenyi nibuweire baatandikire okutambula okwira e Nazaleesi, baitu oYesu yamaite gasigala e Yerusaalemu, oYusufu n'oMalyamu nibateetejerye. 44 Baali bakulowooza nti akutambuura amwei n'abairabaabwe. Eigolo igolo nataabonekere, ni batandika okumutooleerya omu ba nganda zaabwe n'abanywi ba mukago. 45 Niyababuureyo ni bairayo e Yerusaalemu okumutoolya. 46 Niwaakaire ebiro bisatu baamwajirye omwiramyo naikaire amwei n'abeegesya ba diinij, nakubawuliirya era nakubabuulya ebibuulyo. 47 Boona boona abaali bamuwuliriirye beewuunyize amagezi gaamwe n'engeri gyeyairangamu ebibuulyo. 48 OYusufu n'oMalyamu ni bawuniikiira. OMalyamu n'amukoba ati, “Mwana wange, kiki ekikukoleserye kini? Nje n'oiteewo tubbaire tukukutoolya, nitutuntwire.”
49 OYesu n'amwiramu “Nimukuntoorya ki? Timumaite nindina okubba omu nyumba ya itewange?” 50 Baitu bo ni bateeteja kyeyaali nakukoba.