Luka
1
Enyanjula
1 Abantu baingi bagezereku okuwandiika oku bintu oKanca byeyabazire obwakarai era byaikiriirye omwiswe. 2 Babiwandiikire nk'abakaiso nibaabitukobeire. Abakaiso abo baali n'oYesu okuluga oku kwekeera era baabbaire bakutambulya ekigambo kya Kanca. 3 Njeena olwakubba mmaare okweteja ebigambo bini okuluga oku kwekeera, nkiboine nikisemeire okubikuwandiikira nimbisorongere kusai, owa kitiinisya Tewofiro, 4 leke weeteje nti bye wayegeseibwe bituufu.
Okubyalibwa kwa Yokaana oMubatiza kukulangibwa
5 Omu biro oKerode niyaali nga niye mukama wa Buyudaaya, waalowo okabona eyayetebwanga Zaakaliya. OZaakaliya yaali wa mu kitongole kya bwakabona ekya Abbiya,a n'omukali wa Zaakaliya eyayetebwanga Elizaabeeti yaali mwizukulu wa Alooni.b 6 Bani bakali babiri baali baikiririire omu maiso ga Kanca, nibakukwatanga amateeka n'ebiragiro byamwe byona byona, 7 baitu tibaalina baana olwakubba Elizaabeeti yaali ngumba yete bakali babiri nibakairikire.
8 Ekiro kimwei, olubu lwakukola omwiramyo nilwali olwa kitongole kya Abbiya, oZaakaliya niyaali nakukola nk'okabona omu maiso ga Kanca, 9 ni bamukomya n'akalulu, nk'enkola ya bwakabona niyaali, okwingira omu kifo ekyeru omwiramyo lya Mukama, okucuukiirya obubbaani. 10 Ekiseera ekya kucuukiirya obubbaani nikyaikire abantu boona boona baali nzai nibakusaba.
11 Omalayika wa Mukama n'abonekera oZaakaliya. Omalaika oni yaali nayemerereire oku gulyo gwa kicuukiiryo kya bubbaani. 12 OZaakaliya niyamuboine, ni yeerinduka n'atiina. 13 Omalaika n'amukoba ati, “Zaakaliya, otatiina olwakubba oKanca awuliire okusaba kwamu. Omukali waamu Elizaabeeti alikubyara omwana wa bwojo. Omwana oyo olimwalika eibara Yokaana. 14 Alikuleetera okusemereerwa n'okusagaaruka era n'abantu abandi baingi balisemereerwa olwa kubyalibwa kwamwe, 15 olwakubba alibba mukulu omu maiso ga Mukama. Atalinywa ku mwenge gwa Zabbibbu gonze ekitamiirya ekindi kyona kyona. Okuligira kimwei oku kubyalibwa kwamwe alibba naizwire oMwoyo Akwera. 16 Aliirya abantu ba Isirairi baingi egiri Mukama oKanca waabwe. 17 Nali omu mwoyo n'amaani, nk'Eriyac byeyaali nabyo, niye alyekeera oku Mukama okwiza, leke amuteekanirize abantu okumulindiirya. Aliirya emitima gya baite ba baana egiri abaana baabwe n'okucaamula abantu abacaacuki leke balowoozenge nk'abalina amagezi.”
18 OZaakaliya n'abuulya omalaika, “Nje nkairikire n'omukali wange akairikire, ati namanyira ku kiki nti ebyo bituufu?”
19 Omalaika n'airamu, “Ninje Gabulyeri. Nnyemeera omu maiso ga Kanca era ati ntumiibwe okubaza naawe, okukusubiira Amawuro Agasai gani. 20 Olwa kubba toikiriize bigambo byenkobere, ebyaliikiira omu biro byabyo ebituufu, ati okwaba kubba kibbubbu, notokubaza okwica ekiro ebigambo bini nibiribbaawo.”
21 Omu bwire obwo abantu baali nibacalindiirya oZaakaliyad, nibakwebuulya lwaki akeerereirwe omwiramyo. 22 OZaakaliya niyawulukire yaali atakusobola kubasubiira kyaboine baitu abantu ni beeteja nti abbaire n'okubonekerwa. Nasumiryangambe abantu natakusobola kubaza.
23 Ebiro byamwe ebyakuweereza nibyaweireku, oZaakaliya n'airayo e waamwe. 24 Bini nibimaare okubbaawo Elizaabeeti, omukali wa Zaakaliya n'atoola enda era ni yeesoroora okumala emyezi etaanu, 25 n'akoba ati, “OMukama anjunire okutoola enda. Leero andangire nindi nganzi gyali, antoireku ensoni omu maiso ga bantu.”
Okubyalibwa kwa Yesu kukulangibwa
26 Okwezi kwamukaaga, oKanca n'atuma omalaika oGabulyeri e Nazaleesie, ekibuga kya mu Galiraaya. 27 Yamutumire e wa mwala onteeka, oYusufu omwizukulu wa Dawudi gweyaragaanisirye okubandula. Omwala oni baamwetanga Malyamu. 28 Omalaika n'aiza e wa Malyamu, n'amukoba ati, “Nkulamucirye, we oKanca gwe yawaire omukisa! oMukama ali naawe.”
29 OMalyamu n'atuntura muno olwa kiramuco kya malaika, ni yeebuulya, “Ekiramuco kini kikumanyisya ki?” 30 Omalaika n'amukoba, “Malyamu ototuntura, oKanca akuwaire omukisa. 31 Okwiza okutoola enda, obyale omwana wa bwojo, omwalike eibara Yesu. 32 Omwana oni alibba mukulu era aliyetebwa Mwana wa Kanca Akira byona. OMukama oKanca alimuwa entebe ya aizewaamwe oDawudi. 33 Alifuga enyumba ya Yakobof emirembe n'emirembe, obukama bwamwe tibuliwaawo.”
34 OMalyamu n'akoba, “Ekyakutoola enda kyaikiira kityai? Nje timaite musaiza.”
35 Omalaika n'amukoba, “OMwoyo Akwera yakwizaku, amaani ga Kanca Akira byona gakwiza okubba naawe, omwana alibyalibwa nikyo balimwetera Akwera, oMwana wa Kanca, 36 n'Elizaabeeti omugandaawo, eyayetebwanga ongumba era ati nakairikire akwiza okubyala omwana wa bwojo. Kuni okwezi kwamukaaga natoire enda. 37 Omu maiso ga Kanca ekikiikiraine kyayi.”
38 OMalyamu n'airamu, “Nje ndi muzyana wa Mukama, ekyombazireku kiikiire.” Omalaika n'aliga oMalyamu we yaali n'ayaba.
OMalyamu akucaara Elizaabeeti
39 Omu biro ebyo oMalyamu ni yeeteekaniza, n'ayaba mangu omu kibuga ekya mu nsozi za Buyudaaya, 40 n'aika e wa Zaakaliya. Niyaingiire omu nyumba n'alamuca Elizaabeeti. 41 Elizaabeeti niyawuliire ekiramuco kya Malyamu, ekya munda ni kizeenya n'Elizaabeeti n'aizula oMwoyo Akwera. 42 Elizaabeeti n'abaza omwiraka erya aiguru n'akoba, “Oweereibwe omukisa okukira abakali abandi boona boona n'omwana gw'olibyala aweereibwe omukisa. 43 Baitu lwaki mpeereibwe ekitiinisya kini ekikooto, onyina Mukama wange okwiza okuncaara? 44 Ninkawuliirembe ekiramuco kyamu, ekya munda ni kizeenya olwa kusemereerwa. 45 Oli wa mukisa we noikiriize nti oMukama aliikiirya bye yakobere.”
Ekyembo kya Malyamu
46 OMalyamu yeena n'akoba ati,
“oMwoyo gwange gukuwaisya oMukama,
47 n'obwomi bwange bukusemereerwa oKanca oMujuni wange,
48 olwa kulowooza oku muzyana waamwe omuculeeri.
Okuzwa eleero abantu aba mirembe gyona gyona baakunyetanga wa mukisa;
49 Kubba oMukama Akira byona
ankoleire ebikulu n'eibara lyamwe lyeru.
50 Emirembe n'emirembe akwatirwa ekisa
boona boona abamutiina.
51 Akoore ebikulu n'omukono gwamwe ogwa maani,
ararangirye abeewaisya omu mitima gyabwe!
52 Anagire abakama ab'amaani okuluga oku ngoma,
n'aimula abaculeeri.
53 Aikutisirye abazala n'ebisai,
baitu abaguuda abapekere banyambula kantu.
54 Ajunire omwiru waamwe oIsirairi,
aizukiire ekisa kye yamuragaanisirye,
55 omu ndagaano gyeyakoore
n'oIbbulaimug n'abaizukulu ebiro byona.”
56 OMalyamu n'amalayo emyezi esatu n'airayo e waamwe.
Okubyalibwa kwa Yokaana oMubatiza
57 Ebiro by'Elizaabeeti okusandabuka nibyaikire, n'abyala omwana mwojo. 58 Abaganda baamwe n'abantu abandi abaamaite Elizaabeeti n'oZaakaliya ni bawura ekisa ekingi oMukama kyakwatiirwe Elizaabeeti, ni basemereerwa amwei naye.
59 Ekiro kyamunaanai ni baiza okusaliira omwana, ni bayendya okumwalika Zaakaliya, eibara lya itewaamwe. 60 Elizaabeeti n'akoba, “Bbe, ayalikibwe Yokaana.”
61 Ni bamukoba, “Omu kika kyamu ndooyo alina eibara eryo.”
62 Ni bakolesya emikono okubuulya oZaakaliya eibara lyakwendya bayalike omwana. 63 OZaakaliya n'asaba ekyakuwandiikaku, n'awandiika, “Omwana ayalikibwe Yokaana.” Kini kyewuunyisize buli omwei. 64 Amangu ago omunwa gwa Zaakaliya ni gwiguka, olulimi ni lutaisya, n'atandika okubaza nakuwaisya oKanca. 65 Abantu boona boona abaali beerereire oZaakaliya ni baizula okutiina n'okwewuunya. E Buyudaaya omu nsozi woona woona, abantu ni babaza oku bintu bini byona byona. 66 Buli muntu eyawuliire kini yeewuunyanga era nakwebuulya omwana kyakwaba okubba anti omukono gwa Mukama gwamuluku.
Obulangi bwa Zaakaliya
67 OZaakaliya, oitewamwana, n'aizula oMwoyo Akwera n'atandika okubaza oKanca byeyaali nataire oku mwoyo gwamwe n'akoba ati,
68 “OMukama oKanca wa Isirairi awaisibwe
olwakubba aizire egiri bantu baamwe era abacungwire.
69 Atuteereirewo omujuni owa maani
okuliga omu nyumba ya mwiru waamwe oDawudi,
70 (Nka niyaragaanisirye omu balangi baamwe abakwera abairai budi),
71 okutujuna okuluga omu banyanzugu baiswe
n'omu mikono gy'abo boona boona abaatunobere—
72 OKanca akoore kini okulanga abazeiza baiswe ekisa kyeyaragaanisirye
n'okwizukira endagaano ekwera gyeyakoore nabo,
73 n'alayiriira aizewaiswe oIbbulaimu
74 okutucungura okuzwa omu mukono gwa banyanzugu,
leke tumuweerezenge nitutakutiina,
75 nitukwera, era nitwikiriire ebiro bya bwomi bwaiswe byona byona.
76 We omwana wange, okwiza kwetebwa mulangi wa Kanca Akira byona,
olwakubba niiwe oliteekaniza abantu okutangiira oMukama.
77 Olimanyisya abantu baamwe nti balicungurwa
nibasaasiirwe ebibbi byabwe.
78 Olwa kisa kya Kanca ekinyamwingi,
nk'okibbambya nasala n'amoleka onsi n'oMukama akwiza okuluga omwiguru aize gyetuli,
79 amoleke abaikaara omu kiiruma n'omu kiituuru kya kufa,
aturunguure okwika omu muwanda gwa mirembe.”
80 Omwana n'akula era n'afooka w'amaani omu mwoyo n'aikalanga omwirungu okwica niyatandikire okubonekaku omu baingi, omu Isirairi.