24
Okuyimbooka kwa Yesu
1 Omu kibbambya wa kiro ekyaiririire eSabbiiti, abakali nibatwala ebyabuwoowo byebaateekaniize, oku mbi. 2 Baayajirye eibbaale erikinga embi niligalanzuliibwe okuluga oku mulyango gwa mbi. 3 Nibaingiire, tibaayajiryemu mulambo gwa Mukama waiswe oYesu. 4 Nibaali bawuniikiriire, amangu ago abasaiza babiri abazwaire engoye ezikuseryaserya ni babeemeera oku rubaju. 5 Olwa kutuntura okwingi, abacaala ni bainamya emitwe, abasaiza ni babakoba, “Lwaki mukutooleerya omuntu omwomi omu bafu? 6 Ani talowo; ayimbookere! Mwizukire bye yabakobere nacaali naanywe e Galiraaya: 7 Yabakobere ati, ‘OMwana wa Muntu ateekwa okuweebwayo omu mikono gy'abantu abalina ebibbi okumwita nibakumubamba oku musaalaba era ayimbooke ekiro ekyakasatu.’ ” 8 Ale abakali ni baizukira ebigambo byamwe.
9 Abakali nibaireyo okuzwa oku mbi, ni basubiira abeegesebwa eikumi nomwei, n'abandi boona. 10 Abakali bani baali oMalyamu Magudaleena, oYowaana, n'oMalyamu omawa Yakobo, n'abandi abaali nabo. Bani nibo baasubiriire abakwenda. 11 Baitu abakwenda tibaikiriize bigambo bya bakali, kubba byali nk'ebya bumburamu. 12 OPeetero, nikwo okwimukiramu, n'airuka n'ayaba oku mbi. Niyasungereiryemu, n'abona engoye za liiri mwebaamuzingire niziri awo oku ntando zeereere. Niyamaare n'airayo e waamwe, nakwewuunya ebintu ebibbairewo.
OYesu akubonekera ababiri abaali bakwaba Emawusi
13 Ekiro ekyo, abantu babiri okwabo abaakobeirwe abakali badi, baali bakwaba omu kyalo ekyetebwa Emawusi, ekilomita nk'eikumi nemwei okuzwa e Yerusaalemu, 14 ni babaza oku bintu ebyabbairewo. 15 Nibaali bakubaza oYesu omwenyenere n'abeyimbyaku n'atambula nabo; 16 Baitu amaiso gaabwe ni gaswekebwaku ni batamweteja.
17 OYesu n'ababuulya, “Bikiki bye mukubaza nimukutambula?” Ni beemeera nibaizwire obujune. 18 Omwei oku bo, ayetebwa oKulyopa nikwo okubuulya, “Niiwe mugenyi wenkai omu Yerusaalemu atamaite bigambo ebibbairewo ebiro bini?”
19 N'ababuulya ati, “Bigambo ki?” Ni bamwiramu,
“Ebibbairewo oku Yesu owa Nazaaleesi.” “Yaali mulangi wa maani omu bigambo n'omubikolwa omu maiso ga Kanca n'abantu. 20 Abakabona abakulu n'abakama baamuwaireyo okusaarwa ogwa kufa, era ni bamubamba oku musaalaba; 21 iswe twali nitumaite nti niye akwiza okubba omucunguli wa Isirairi; baitu ati ebiro bisatu ebyakaire ebyo nibimaare okubbawo. 22 N'abamwei oku bakali ba mwiswe abaikiriza batuwuniikiriirye nibaakeire omu kibbambya okwaba oku mbi 23 ni bataajaayo mulambo gwamwe. Abakali abo baizire ni batukobera nti baabonekeirwe abamalaika, abaabakobere nti mwomi. 24 Abataayi baiswe baayabire oku mbi ni bayaja nk'abakali kyebaakobere nimwo kiri, baitu Ye tibaamuboine.”
25 OYesu nikwo okubakoba, “Ka muli badoma, era abalwawo okwikiriza abalangi byebaabakobere! 26 OKurisito tiyaali wakubanza okubonaabona leke aingire omu kitiinisya kyamwe?” 27 N'atandikira omu bitabo bya Musa n'ebya balangi nakunyonyola ebyamubazirweku.
28 Nibaigereire oku kyalo kyebaayabangamu, oYesu n'atambula nk'akweyongerayo, 29 baitu bo ni bamwesengeerya bati, “Raara naiswe, eisana liri ampi okugwa” N'aikiriza n'ayaba nabo eka.
30 Nibaali bakulya, n'akwata omugaati, niyeebalya oKanca, n'agwendamu, n'abaweerya, 31 obwo amaiso gaabwe ni gaiguka, ni bamulingaasira, n'airate n'ababulaku. 32 Bo nikwo okubaza, “Weza! nikyo twakwatiirwe enkaraituma niyaali akutusoboora omu byawandikiibwe, omu nzira?”
33 Omu kaire ako, ni baimuka, ni bairayo e Yerusaalemu. Nibayaja abeegesebwa eikumi nomwei n'abantu abandi nibakumbaine 34 nibakukoba bati, “Kya mazima oMukama waiswe ayimbookere era abonekeire oSimooni.” 35 Obwo ababiri ni babakobera ebyabbairewo omu muwanda, n'engeri gyebaamwetejerye niyayenderemu omugaati.
OYesu akubonekera abeegesebwa baamwe
36 Nibaali bacaabaza okwebyo, oYesu omwenyenere n'abeemeera akati n'abakoba ati, “Emirembe gibbe naanywe.”
37 Beerindukire ni batiina muno: nibakulowooza nti, baboine muzumu. 38 Ye n'abakoba, “Lwaki mutiinire, era lwaki mutakwikiriza omu mitima gyanywe? 39 Mubone emikono gyange n'amagulu gange. Ninje omwenyenere! Munkwateku mubone; omuzumu tigubba na mubiri gonze amagumba, nka nje byendi nabyo.”
40 Niyamaare okubakobera bini n'abalanga emikono gyamwe n'amagulu gaamwe. 41 Bo olwa kusemereerwa okwingi n'okwewuunya ni bataikiriza. Ye nababuulya, “Ani mulinawo ekyakulya kyona?” 42 Ni bamuweerya ekitundu kya ncwi ekitalike 43 era nakirya nibamulolereire.
OYesu akulaga abakwenda baamwe
44 N'abakoba, “Kini nikyo n'abakobere nincaali naanywe: Buli kintu ekyampandiikiibweku omu mateeka ga Musa, abalangi n'omu Zabbuli kiteekwa okwikiira.”
45 Obwo n'aswekula amagezi gaabwe leke beeteje ebyawandiikiibwe. 46 N'abakoba ati, “Kini nimwo kyawandiikiibwe kiti, oKurisito ateekwa okubonaabona, okufa n'okuyimbooka ekiro kyakasatu, 47 era okwenenya n'okusaasirwa ebibbi kulilangiriirwa omu manga goona omwibara lyange, nokutandikira omu Yerusaalemu. 48 Nywe muli bajuurwa ba bigambo bini. 49 Nkwaba okubasindikira oMwoyo Akwera oitewange gweyaragaanisirye; baitu mubbe omu kibuga okwikya oMwoyo oyo naliiza okuzwa omwiguru n'abaizulya amaani.”
Okutwalibwa kwa Yesu omwiguru
50 OYesu ni yeebembera abeegesebwa baamwe n'abatwala omu makiizi ga Bbesaniya, n'agolola emikono n'abaweerya omukisa. 51 Niyaali acabaweerya omukisa, n'abazwaku, n'atwalibwa omwiguru. 52 Obwo ni bamuramya era ni bairayo e Yerusaalemu omu kusemereerwa okwingi. 53 Baitu ebiro byona ni baabanga omwiramyo, ni bakuwaisya oKanca.