O Pauleskro liil ap i
Filiparja
1
Ap i patslende an o foro Filipi
1 Mer,
o Paulo un o Timoteo,
tchinah kau liil.
Mer budrah o Jesus Kristeske,
un tchinah kau liil ap lauterende,
kolen o Dewel win gole das an o foro Filipi,
te patsenn le ap o Jesus Kristeste.
Kau liil hi ninna i pralstunenge,
kai denn garda ap i patslende,
ninna kolenge,
kai krenn o Debleskri budi mashkral i patslende.
2 Mu well tumen latchepen un bacht an o dji!
Kowa dell tumen o Dewel,
maro dad an o bolepen,
un maro rai,
o Jesus Kristo.
O Paulo mangell o Debles i patslenge
3 Hako tsiro,
kai wenn tumer mange an o shero,
parkrau man tumenge pash miro Debleste.
4 Un hako tsiro,
kai mangau o Debles tumenge lauterenge,
hom bachtelo pral tumende.
5 Tumer budran mantsa khetne,
har mer sikram i menshende o Jesuseskro drom.
Kowa kran tumer,
har patslo wan,
un mukan gar tele bis kau diwes.
6 Doleske djinau:
O Dewel kras i latchi budi an tumende.
Un job krell ninna,
te atchenn pash leste,
te wenn latches glan leste tardo ap ko diwes,
kai well o Jesus Kristo pale.
7 Me nai sharau tumen jaake.
Tumer han an miro dji un rikrenn mantsa khetne,
ninna kanna,
kai hom an o stilepen,
un penau o latcho lab o Jesus Kristestar glan i tchatchepangre un sikrau lende leskro drom jaake,
te djinenn le o tchatchepen.
8 O Dewel djinella:
Miro dji hi pash tumende.
O Jesus Kristo das man i baro kamlepen tumenge.
9 Un me mangau o Deblestar,
te well tumaro kamlepen bareder un bareder,
te haiwenn,
hoi o Dewel kamella,
un te djinenn,
hoi te krenna.
10 Jaake nai dikenn,
hoi mishto un tchatcho hi.
Un ap ko diwes,
kai well o Jesus Kristo pale,
han tumer an o tchatchepen glan leste tardo,
un kek doosh hi ap tumende.
11 Un ko bud latcho un tchatcho koowa,
hoi tumer kran,
krell o Debles bares.
Kowa kran tumer an i soor,
hoi o Jesus Kristo das tumen.
Bud menshe shunenn o Jesusestar doleske, kai o Paulo stildo hi
12 Shunenn,
mire phrala,
me kamau te djinenn tumer kowa:
Dran lauter,
hoi ap mande was,
shunan bud menshe o latcho lab o Jesus Kristestar.
13 I tsele lurde,
kai denn garda ap o themeskro rajeskro kheer,
ninna kol wawar,
kai kate hi,
kolla lauter djinenn kanna,
kai hom me o Jesus Kristeske an o stilepen.
14 Ninna bud patsle wan sorleder an o patsepen ap o rajeste,
o Jesuseste,
kanna,
kai me stildo hom.
Kolen hi buder kek traash,
te sikrenn le i menshende o Jesuseskro drom.
15-17 Mashkral lende hi ninna sawe,
kai silwerenn ap mande.
Kolla rakrenn o Jesus Kristestar,
te sikrenn le mande,
kai jon kowa feteder haiwenna har me.
Jon krenn kowa dran i tchilatcho dji un kamenn,
te well mange budeder ropaske.
Wawar sikrenn i menshende o Jesuseskro drom dran i latcho dji.
Jon kamenn man o djijestar un djinenna,
me hom kate stildo,
te sikrap o Jesuseskro drom i tchatchepangren jaake,
te djinenn le o tchatchepen.
18 Hoi te penap?
Mange hi bud moldo,
te well o Jesuseskro drom i menshende siklo,
jaake te jaake.
Jek rakrell lestar dran i tchilatcho dji,
un i wawar dran i latcho dji.
Miro djipen hi o Jesuseske
19 Awa,
me hom bachtelo.
Tumer mangenn o Debles mange.
Un ap miri rig hi o Debleskro Ducho,
kai o Jesus Kristo man das.
Doleske djinau,
te djal lauter mishto mange.
20 Me patsau te rikrell man o Dewel an o wast,
un kamau o tselo djijestar te krap tchi,
kai hunte ladjap man glan leste.
Kamau gar,
te trashap i menshendar.
Jaake har rakrom hako tsiro o Jesus Kristestar,
un trashom lendar gar,
jaake kamau les ninna kanna an o stilepen te krell,
ninna te hunte merap,
te dikenn i menshe ap miro djipen un ap miro merepen,
har baro un railo o Jesus Kristo hi.
21 Miro djipen hi o Jesus Kristeske.
Un te merau me,
hi kowa mange feteder.
22 Me te atchau djido,
nai sikrau budeder menshende o Jesuseskro drom.
Doleske djinau gar,
hoi budeder moldo hi.
23 Awa,
me djinau gar,
hoi feteder hi.
Ap jek rig kamaus te merap un te wap pash o Jesus Kristeste.
Kowa wals mange feteder.
24 Ap i wawar rig wals tumenge feteder,
te atchap djido.
25-26 Doleske hi miro dji sorelo,
un me djinau,
te atchap djido,
un wau pale pash tumende.
Te hom pale pash tumende,
wenn tumer soreles un bachteles an o patsepen,
un parkrenn tumen pash o Jesus Kristeste,
un sharenn les bud un budeder.
An maro djipen o Jesuseha wenn ninna duka ap mende
27 Kanna,
krenn lauter,
te djan jaake ap o Jesuseskro drom,
har kowa tumende siklo was!
Krenn kowa ninna,
te hom gar pash tumende!
Te dikau tumen gar,
kamaus te shunap,
te rikrenn tumer lauter khetne an o patsepen,
un te krenn i tseli sorjah lauter,
te well o patsepen ap o Jesus Kristeste sorelo pash tumende.
28 Ma darenn kolendar,
kai kamenn gar o Jesus Kristes,
un kai chan pen ap tumende!
Te han sorelo an o patsepen tardo,
sikrell kowa lende,
te djan jon nashedo,
un te lenn tumer o djipen an o bolepen,
hoi wella o Deblestar.
29 O Dewel hi tumenge latcho,
un das tumen o patsepen ap o Jesus Kristeste,
un gar o patsepen kokres.
Na-a,
dran o patsepen ap leste,
hunte lenn tumer ninna duka ap tumende.
30 Kol duka,
hoi ap tumende wenna,
his man ninna,
har homs pash tumende.
Un ninna kanna ap kau tsiro shunenn tumer mandar,
kai hunte lap duka ap mande.