43
O baro Dewel well pale an peskro kheer
1 Un o mursh anas man pale pash ko baro wudar, hoi ap koi rig hi, kai o kham pre djal. 2 Un kote dikom, har was o railepen o Israeleskro Deblestar fun kotar, kai o kham pre djal. Khetne ko railepen was i gole, har i gole, hoi bare panja denn. Un dran o railepen was i momeli ap o tselo them. 3 Un kowa, hoi me dikom an kai visiona his har kowa, hoi dikom, har homs pash o lengsto pani Kebar, un ninna har kowa, hoi dikom, har was o Dewel an o foro Jerusalem, te dell lo o foro paash. Un me mukom man ap i phub te perell glan leste. 4 Un o baro Debleskro railepen was an o baro wudar, hoi kote hi, kai o kham pre djal, un djas an o kheer dren. 5 Un o ducho hadas man pre un anas man ap koi tikni glanstuni platsa. Un dikom o baro Debleskro railepen, kolestar o kheer pherdo his. 6 Un ko mursh his tardo pash mande. Un dran o kheer win shunom jekes, kai mantsa rakras. 7 Job penas ap mande: Tu, mensho, kate hi koi platsa, kai miri beshepaskri tardo hi un ko banko, ap koleste mire pire tchiwau. Kate djiwau hako tsireske mashkral i Israelitarjen. Un i Israelitarja anenn buder gar ladj ap mande, jon gar un lengre bare raja witar gar. Kowa kran le, har mangan le wawar deblen an, un har paskran le pengre bare rajen gar dur miro kherestar. 8 Jon kran pengre bare khera langs miro kheer, lengre wudja langs mire wudja, jaake te his jek massuri halauter mank mande un lende. Un jaake anan le ladj ap mande pengro djungelo koweha, hoi le kran. Doleske marom len an miri choli. 9 Kanna mangenn le buder gar wawar deblen an. Un pengre mule bare rajen rikrenn le dur mandar. Un me djiwau mashkral lende hako tsireske.
10 Tu, mensho, pen i Israelenge, har miro kheer win dikell. Te dikenn le har baro un shukar kowa hi, ladjenn le pen i doshake, hoi le ap pende lan. 11 Te khaitenn len kowa tchatchepah, hoi le kran, palle sike len, har o kheer wi-dikell un kerdo hi, leskre dromma un wudja un halauter, hoi koi pashel hi. Pen lenge, hoi jon hunte krenn, un hoi lendar kamau, te mangenn le man kate an kau kheer an. Un tchin kowa glan lengre jaka an i liil, te haiwenn le halauter, hoi un har le tchomone hunte krenn, te rikrenn le pen ap kowa, un krenn jaake!
12 Glan halauter hunte well dre-rikedo, te hi koi tseli platsa pral ap i berga, kai miro kheer tardo hi, kokres mange koi. Ninna halauter, hoi koi trujel hi, hi mange.
O Debleskri chatchepaskri
13 Jaake baro hi kai chatchepaskri: Leskri piri hi jek paash metari baro un jek paash metari buchlo. Un trul leste hi i tikni massuri, hoi hi 25 (biish-te-pantch) centimetarja baro. Kai chatchepaskri hi kerdo an triin kotja: 14 Fun i phub bis pash o telstuno kotar hi jek metari. Kau kotar hi jek paash metari buchleder har ko kotar, hoi well koi pral. Kowa hi dui metarja baro, un jek paash metari buchleder har ko kotar koi pral. 15 Ko triinto kotar hi o bob, kai well o mass chatchedo. O bob hi ninna dui metarja baro. Ap leskre star ekke djan star shingaa pre. 16 O bobes hi star rigja un hi 6 (shob) metarja lengsto un 6 (shob) metarja buchlo. 17 O mashkralstuno kotar, les hi ninna star rigja, un hi 7 (efta) metarja lengsto un 7 (efta) metarja buchlo. Trul i chatchepaskri djal i tikni massuri trujel, hoi hi 25 (biish-te-pantch) centimetarja baro. Lakri piri hi jek paash metari baro. Un ap koi rig, kai o kham pre djal, djan stufe pre.
18 Un job penas ap mande: Tu mensho, kawa penell o baro Dewel, maro rai: Kawa hi, hoi hunte kress ap kau diwes, kai hi kai chatchepaskri kerdo, ap kolate vieche chatchedo wenn o baro Debleske, un viechengro rat ap late witsedo well. 19 Kokres i rashaja dran o kheer Levi, kolengro phuro dad o Zadok hi, nai wenn glan mande, te budrenn le mange. Kawa penell o baro Dewel, maro rai.
Kal rashajenge dess tu i terno gurum, te marenn le les, te well i doosh i menshendar krik lino. 20 Un tu less leskro rat, un makess tchomone ap kol star shinga, un pral ap kol star ekke, un ap koi tikni massuri, hoi trujel djal. Jaake leh koi tseli doosh un o pale-tchiddo koowa krik, hoi ap i chatchepaskri hi. 21 Un tu less ko terno gurum, hoi i doshake maredo was, te well lo chatchedo ap i platsa, hoi koleske koi hi, win glan i massuri, hoi hi trul o Debleskro kheer.
22 Un ap o duito diwes aness tu i sasti mursh busni, te well li maredo i doshake. Tu kress lah jaake, har kowa kerdo was o gurumeha ninna, te well ko rateha i doosh un o pale-tchiddo koowa krik lino fun i chatchepaskri. 23 Pal kowa less i terno sasto gurum, un i sasto mursh bakro, te wenn le maredo o baro Debleske. 24 Un tu aness len glan leste. Un i rashaja witsrenn loon ap kol kotja mass un chatchrenn len o baro Debleske. 25 Efta diwessa maress tu hako diwes jek mursh busni, te well i doosh krik lino. Un ninna i terno gurum un i mursh bakro, hoi hake dui sasto hi, wenn maredo un chatchedo o baro Debleske. 26 Efta diwessa well kowa jaake kerdo, te well i doosh un o pale-tchiddo koowa krik lino fun i chatchepaskri, te nai well li o Debleske koi. 27 Un pal kal efta diwessa, ap ko ochtato diwes, un fun kotar dureder, chatchrenn i rashaja ko mass kol viechendar, hoi anenn tumer o baro Debleske, kolla, kai wenn leske tseles chatchedo, un ko thulepen kolendar, kai chan tumer khetne glan leste. Te krenn kowa jaake, dikau latches ap tumende, penell o baro Dewel, maro rai.