42
I iseme i rashajenge
1 O mursh anas man win ap i bari glanstuni platsa ap i nordetikri rig. Kote his i kheer tardo, kai iseme dren hi. Kau kheer his wergel ko kheer un leskri platsa, hoi pal o Debleskro kheer tardo his. 2 Kau kheer ap koi nordetikri rig his 50 (paash-sheel) metarja lengsto un 25 (biish-te-pantch) metarja buchlo. Leskri glanstuni rig his ap i nordetikri rig. 3 Kau kheer his tardo mank koi tikni glanstuni platsa, hoi his deesh metarja buchlo, un koi drom, hoi djas trul i bari glanstuni platsa. Kau kheer his jaake kerdo, te his iseme telstunes, mashkralstunes un pralstunes. 4 Un glan i iseme djas i drom, kolestar djan le dren an i iseme. Ko drom his pantch metarja buchlo un 50 (paash-sheel) metarja lengsto. Un i wudja his ap i nordetikri rig. 5 Un kol iseme, hoi pralstunes his, his tikneder har kolla koi tel. Un kol mashkralstune iseme his tikneder har kolla, hoi telstunes his. Jon his kerdo har i bari treppa, 6 hoi djas triin stufe pre. Doleske wan i iseme fun tel bis pral tikneder. Len his kek pesse kashta tardo tel pende, te hidjrenn le len, har an i glanstune platse his. 7 Un win his i massuri wergel kol iseme, koja his 25 (biish-te-pantch) metarja lengsto. Ap lakri wawar rig his koi bari glanstuni platsa. 8 O lengstepen fun kal iseme, hoi pash koi bari glanstuni platsa tchiddo hi, his 25 (biish-te-pantch) metarja. Kol iseme, hoi wergel o Debleskro kherestar tardo hi, his 50 (paash-sheel) metarja lengsto. 9 Ap koi rig, kai o kham pre djal, djas i drom an kol telstune iseme kolenge, kai wenn fun koi bari glanstuni platsa.
10 Ap koi buchli rig fun koi massuri, hoi djas trul i glanstuni platsa, kote, kai o kham pralstunes tardo hi, his ninna i kheer, kai iseme dren hi. Kal iseme his wergela ko kheer un koi platsa koi glan, hoi pal o Debleskro kheer tardo hi. 11 Kolla his jaake har kol iseme ap i nordetikri rig. Lengro lengstepen, lengro buchlepen, lengre wudjengre dromma un lengre wudja his emligo un jaake kerdo har kol wawar. Ninna o drom glan i iseme his jaake har ko drom glan kolende ap i nordetikri rig. 12 Lengre wudja sikran ap koi rig, kai o kham pralstunes tardo hi. Un ap i rig, kai o kham pre djal, nai wan le ap i drom, hoi djal an i iseme dren. Kau drom djas mank i iseme un i massuri.
13 O mursh penas ap mande: Kal isema, kolla ap i nordetikri rig, un kolla ap koi rig, kai o kham pralstunes tardo hi, hoi pash koi platsa tchiddo hi, hoi pal o Debleskro kheer hi, kolla hi kolenge, kai budrenn o Debleske. I rashaja, kai glan o baro Debleste pengri budi krenn, nai chan kote pengro kotar kolestar, hoi o Debleske anlo was, un hoi kokres i rashaja nai chan. An kal iseme tchiwenn le kowa, hoi o Debleske anlo was: ko djob, un ko mass kol viechendar, hoi i doshake maredo wan un doleske, te well lauter pale mishto. Kal iseme hi koleske, hoi o Debleske hi. 14 Te kran i rashaja pengri budi an o Debleskro kheer, un djan pale win dran o Debleskro kheer, hunte riwenn le pengre rashajengre koola win an kal iseme, un hunte riwenn wawar koola an. Palle nai djan le ap i glanstuni platsa mank i wawar menshende. I rashajengre koola hunte wenn gar an-tapedo wawar menshendar.
15 Un har ko mursh pal dikas, har baro o Debleskro kheer dren hi, anas lo man win dran ko wudar, hoi kote hi, kai o kham pre djal, un job dikas pal, har baro koi massuri hi, hoi trul halauter trujel hi. 16-19 Hake star rigja ginas lo peskro kashteha tele, glanstunes koi rig, kai o kham pre djal, palle i nordetikri rig, palle koi rig, kai o kham pralstunes tardo hi, un palle koi rig, kai o kham tele djal. Haki rig his 250 (dui-sheel-te-paash) metarja lengsto. 20 Jaake dikas lo pal, har baro koi tselo kotar them his, trul koleste i massuri djas. Koja his 250 (dui-sheel-te-paash) metarja ap haki rig. Haki rig his emligo lengsto. Koi massuri his koi, te well ko kotar them, hoi o Debleske hi, gar khetne o wawar themeha.