13
O Debleskre chochene rakepangre lenn pengri phagi
1 O baro Dewel penas ap mande: 2 Tu, mensho, de kolen an Israel trad, kai denn glan, te hi le mire rakepangre, un rakrenn dran pende win, un penenn ‘Kau lab well o Deblestar’. Pen lenge: Shunenn, hoi o baro Dewel penell tumenge! 3 Kawa penell o baro Dewel, maro rai: Bibacht well ap kol tchilatche rakepangre, kai penenn glan-wi, hoi dran lengro dji wella, un kolen kek dikepen dikan, hoi mandar was!
4 Tumer Israelitarja, kolla, kai penenn, te hi le tumaro Debleskre rakepangre, hi har diwje djukle, kai rodenn chapen mank i barra o tele-phagedo forestar. 5 Jon tchiwan pen gar pre an koi cheb, kai i barra win phagedo wan, un kran kek massuri trul o kheer Israel, te atchans le soreles tardo an o kurepen ap ko diwes, kai o baro Dewel o tchatchepen win krell pral lende. 6 Lengro dikepen hi tchi-moldo. Un lengro durkepen hi chochepen. Ninna te bitchras len gar o baro Dewel, penenn le ‘Jaake penas o baro Dewel’, un lurenn pre, te well kowa, hoi jon glan-wi penan. 7 Me penau lenge: Tumaro dikepen hi tchi-moldo. Un tumaro durkepen hi chochepen. Har nai penenn tumer: “Kawa penell o baro Dewel”, kai me tchi rakrom?
8 Doleske penell o baro Dewel, maro rai: Tumer rakrenn, hoi gar tchatcho hi, un penenn glan-wi, hoi chochepen hi, doleske wau me pral tumende, penell o baro Dewel, maro rai.
9 Miro wast well pral kol rakepangre, kai penenn glan-wi, hoi gar tchatcho hi, un kai durkrenn chochepen, te dap len i phagi. An o tsillo, kai mire menshe khetne wenn, nai wenn jon gar dren. Un an o liil, kai i laba i menshendar dran Israel dren tchinlo hi, wenn lengre laba gar dren tchinlo. Un an o them Israel wenn le gar palpale. Palle dikenn un haiwenn tumer, te hom me o baro Dewel, tumaro rai.
10 Jon anenn mire menshen o tchatcho dromestar tele, un penenn: “Lauter hi mishto.” Un tchatchepah, tchi hi mishto. Mire menshe kran pen i massuri dran barra, hoi rikrenn gar. Un i rakepangre wan, un makan lat parnes. 11 Pen kolenge, kai makenn parnepen koi pral: “Kai massuri perell khetne!” I sorelo brishin well, un brishineskre barra perenn, un i sorelo ducho phurdell. 12 Koi perell koi massuri khetne. Palle putchenn le tumendar: Kai hi ko shukar parnepen, hoi makan ap koi massuri?
13 Kawa penell o baro Dewel, maro rai: An miri tati choli mukau me i sorelo ducho win te phagell, un i sorelo brishin te well, un brishineskre barra te perell, te well i massuri paash dino. 14 Jaake phagau koi massuri tele, hoi tumer parnes makan. Me mukau lat trujel te witsrell, te wenn lakre telstune barra diklo. Te perell li khetne, perenn i barra ap tumende, un tumer merenn. Un tumer dikenn un haiwenn, te hom me o baro Dewel.
15 Te was miri tseli choli ap koi massuria un ap kolende, kai kran lat parno, penau ap tumende: Koi massuri hi buder gar koi, witar gar kolla, kai lat parnes makan. 16 Kolla hi i rakepangre an o them Israel, kai dan glan, te wals len i lab o Deblestar un penan i menshenge an Jerusalem glan-wi “lauter hi mishto”, ninna te hi tchi mishto. Kowa penau me, o baro Dewel, tumaro rai.
17 Tu mensho, pen ap i djuwjende tire menshendar, kai denn glan, te hi le Debleskre rakepangre! De len trad, 18 un pen lenge: Kawa penell o baro Dewel, maro rai: Bibacht well ap tumende! Tumer siwenn durkepangre dikle, hoi wenn pandlo trul i mussja un trul i sherja hakenestar, i ternendar un i phurendar, te well tumen soor pral lende. Kamenn tumer wawar menshen an o merepen te anell, un tumer kokres djido atchenn? 19 Tumaro durkepah anenn tumer ladj ap mande glan mire menshende, te lenn i wast pherdo djob un i kotar maro. Mire menshenge penenn tumer chochene laba. Un jon kamenn te shunell ap chochepen. Tumaro chochepah anenn tumer sawe menshen an o merepen, kai hunte merans gar, un krenn, te atchenn sawe djido, kai hunte merans.
20 Doleske penell o baro Dewel, maro rai: Me krau tumare durkepangre dikle paash, kolentsa taprenn tumer menshen har te wans le tchirkle. Kal dikle tserdau tumare mussjendar tele. Un lau kol menshen win, kolen tumer tapran, har te wans le tchirkle. 21 Un kol dikle, hoi tchiwan trul tumare sherja, tserdau krik. Un lau mire menshen dran tumaro wast win, te nai taprenn len buder gar. Palle dikenn un haiwenn tumer, te hom me o baro Dewel.
22 Tumare chochene labentsa dukran i djia kolendar, kai an o tchatchepen djiwenn, un kolenge kamom kek daar te krell. Un tumer kran i wasta kolendar sorelo, kai tchilatcho koowa krenn. Jaake kran tumer, te djan le gar tele lengro tchilatcho dromestar, te atchenn le djido. 23 Doleske krau, te penenn nai buder gar chochepen glan-wi, witar gar nai durkrenna! Na-a, me kamau mire menshen dran tumare wasta win te lell. Un tumer dikenn un haiwenn palle, te hom me o baro Dewel!