12
O Hesekijel well i sikepen kolenge, kai hunte djan an o pandepen
1 Un o baro Dewel penas ap mande: 2 Tu, mensho, djiweh mank sawe menshende, kai mukenn pen tchi te penell. Kolen hi jaka, te dikenn le, un kamenn tchi te dikell. Un len hi kanda, te shunenn le, un kamenn gar te shunell. Jon mukenn pen tchi te penell. 3 Tu mensho, le tire koola khetne, har te wals jek, kai hunte djal an o pandepen. Un kre tut pral o diwes ap o drom, te nai dikenn kowa halauter. Glan lengre jaka djas tu kote win, kai khere hals, un djas ap i wawar platsa. Jaake te nai wals, te djal lenge i jaka pre – kolenge, kai mukenn pen tchi te penell. 4 Ap o diwes hidje ko koowa hoi tuha leh win dran o kheer, te hunte dikenn le les. Un rati dja win glan lengre jaka, jaake har jek win djal, kai djal an o pandepen. 5 Glan lengre jaka phage barra dran i massuri win, un hidje tiro koowa koi win. 6 Glan lengre jaka le halauter ap tiri phik! Un har tamlo was, dja win! Un tchip i diklo trul tire jaka, jaake te dikess gar o them, hoi mukeh. Kamau, te wess i sikepen i Israelenge, hoi sikrell lende, har dau len trad.
7 Un me krom jaake, har mange penlo was. Miro koowa hidjrom pral o diwes jaake win, har jek, hoi hunte mukell peskro them. Un har rati was, phagom barra win dran i massuri mire wastentsa. Un har tamlo was hidjrom halauter koi win, lom les ap miri phik, un djom mange glan lengre jaka.
8 Un sik o wawar diwes penas o baro Dewel ap mande: 9 Tu, mensho, shunal, hoi penan i Israelitarja. Kal menshe, kai mukenn pen tchi te penell, putchan tutar: “Hoi kreh tu koi?” 10 Pen lenge: O baro Dewel, miro rai, rakras mantsa. Kowa hoi lo mange penas, te penap tumenge dureder, hi i pralstunenge an o foro Jerusalem un i tsele Israelenge, kai kote djiwenn. 11 Ap kowa, hoi krom, nai dikenn le, har lenge djal. Me hom lenge i sikepen: Jon hunte djan penge un wenn pandles krik anlo. 12 Un o rai pral lende lell peskro koowa ap i phik un djal win an o tamlepen. Un jon phagenn barra win dran i massuri, te hidjrell lo peskro koowa kote win. Trul peskre jaka pandell lo i diklo, te dikell lo gar o them.
13 Me, o baro Dewel, witsrau miri netsa pral leste win, te well lo tapedo an mire dorja. Un pandles well lo an o them anlo, kai i Babilonarja djiwenn. Ko them nai dikell lo gar. Un kote merell lo. 14 Un i tsele menshe, kai trul leste trujel hi, kolla, kai pash leste rikrenn, un leskre lurde, kolen tradau me ap hake rigja. Un o charo lell len palla.
15 Palle, te tradom len an wawar themma un mank wawar menshende, dikenn un haiwenn le, te hom me o baro Dewel. 16 O charo, i bok un i pharo nasslepen marenn bud lendar. Gar bud lendar mukau djido. Kolla nai penenn kol menshenge, pash lende jon djiwenn, hawo djungelo koowa i Israelitarja kran. Jaake dikenn un haiwenn kolla ninna, te hom me o baro Dewel.
17 Un o baro Dewel penas ap mande: 18 Tu, mensho, cha tiro maro trisslepah! Un an daar un trisslepen pijess tiro pani. 19 Un pen ap i Israelitarja, kai hi pash tute an kau them: Kawa penell o baro Dewel, maro rai, pral kolende, kai djiwenn an o foro Jerusalem an o them Israel: Bud tchilatcho koowa krenn le: Jek rikrell o wawares tele. Doleske well ko diwes, kai chan le pengro maro darjah, un pijenn pengro pani trisslepah i trashatar. Lengro them well i muklo them, kai tchi atchell. 20 An kol forja djiwell buder kek. Un o hachetikro them well i mulo them. Palle dikenn un haiwenn tumer, te hom me o baro Dewel.
Kowa, hoi o Dewel glan-wi penas, well tchatcho
21 Un o baro Dewel penas ap mande: 22 Tu mensho, pen mange, hawo rakepen hi kowa, hoi tumer rakrenn an o them Israel? Tumer penenn: O tsiro djal trujel un tchi well kolestar, hoi o Debleskre rakepangre penan. 23 Doleske pen ap lende: Kawa penell o baro Dewel, maro rai: Me sikrau lende, te hi kowa gar tchatcho. Un krau, te well ko rakepen gar buder rakedo an o them Israel. Pen lenge: O tsiro well sik, kai well lauter tchatcho hoi glan-wi penlo was. 24 Palle dikell kek mank i Israelitarja tchomone glan-wi, hoi tchi-moldo hi. Witar kek penell laba glan-wi, hoi i menshe kamenn te shunell, un hoi wenn gar o Deblestar. 25 Me, o baro Dewel, penau ap tumende! Kowa, hoi me rakrau, well ninna, un well an i tikno tsiro. Tumenge, kai mukenn tumen tchi te penell, penau me: Jaake rah har tumer djiwenn, krau, te well tchatcho, hoi penom. Kawa penau me, o baro Dewel, tumaro rai.
26 Un pale penas o baro Dewel ap mande: 27 Tu, mensho, shun, hoi penell o kheer Israel pral tute: “Ko dikepen, hoi kowa dikell, kowa well gar sik. Un kowa, hoi lo glan-wi penell, hi i tsireske, hoi gomme dur krik hi.” 28 Doleske pen lenge: Kawa penell o baro Dewel, miro rai: Kowa, hoi penom, well sik. Ko lab hoi me rakrom, well tchatcho. Kowa penau me, o baro Dewel, tumaro rai.