44
O tchatcho Israel
1 Kanna shun tu, Israel, miro budepaskro,
tumer mire wi-rodede menshe, kolengro phuro dad o Jakob his.
2 Kowa hi, hoi me, o baro Dewel, tuke penau:
Me krom tut un dom tut o djipen har gomme gar boldo hals;
me hom ap tiri rig.
Ma dare, miro budepaskro Jakob,
tu Israela, koles me mange win rodom!
3 Me tchorau pani ap o them, koles trush hi,
un lengste panja nashenn an o truk them.
Miro ducho tchorau ap kolende, kai tutar wenna,
un miro latchepen ap tire tchawende.
4 Un jon wenn baro har o senlepen pash o pani,
un har i ruka pash i panjengre rigja.
5 Jek pal o wawar penell: O baro Dewel hi miro rai.
Bud kamenn tire menshe te well.
Jon tchinenn ap pengro wast: ‘Me hom o baro Debleske’,
un kharenn pen ‘Debleskre menshe’.
O djido Dewel un i mule chochene debla
6 O baro Dewel, ko rai pral o Israel, kai ginas les win dran i tchilatche wasta, –
job, kai hi o rai pral o bolepen un i phub, penell: Me hom o glanstuno un me hom o palstuno,
un dell kek wawar debles har man kokres.
7 Un koon hi har me?
Kowa mu dell gole un penell les un sikrell les mande!
Koon mukas an o phuro tsiro glan-wi te penell, hoi wella?
Mu penenn le menge, hoi wella!
8 Ma darenn, mire menshe! Ma trashenn!
Mukom me kowa tumen gar te shunell
un penom les tumenge gar glan i rah tsiro?
Un tumer shunan un dikan les.
Dell i wawar debles har man kokres?
Dell i wawar sorelo debles, koles gar prindjrau?
9 Kolla, kai deblengre figure kran, hi tchi moldo,
un kol shukar figure hi ninna tchitcheske.
Un kolla, kai mangenn len an, dikenn un haiwenn tchi, hoi lengro dewel krals.
10 Koon krals i debles un tchinals i figura, hoi tchi moldo hi?
11 Dik, halauter, kai les an-mangenn, hunte ladjenn pen.
Un kolla, kai ko debles pengre wastentsa kran, hi menshe un tchi wawar
Mu wenn le halauter khetne glan o tchatcho Debleste!
Palle taprell len i daar,
un an i ladj hi le koi tardo halauter.
12 Ko budepaskro, kai budrell o sasteha, tchiwell o saster an i jag
un krell i tchuri dran leste,
un peskri soreli mussjah dell lo koi pre.
Palle lell lo bok un nai budrell gar dureder,
un job lell trush un leskri soor djal peske.
13 Un ko budepaskro, kai o kashteha budrell,
lell i kotar kasht,
dikell pal, har baro kowa hi,
un tchinell glan, hoi lo i tchurjeha palle win tchinell.
Un job krell dran ko kasht i figura,
te well li tardo an i kheer.
Koi figura dikell win har i mensho,
awa, har i shukar mensho.
14 Job tchiwas ruka an i phub,
un o brishin mukas len bares te well.
Un job djal koi, te dell lo i zedertikro ruk trujel,
oder rodell wawar ruka win, hoi wan baro un sorelo an o weesh.
15 Ko kasht lell i mensho chatchepaske,
un job lell les un krell i jag, te well leske tato,
un pekell maro koi pre.
Un ninna lell lo kau kasht un krell i dewel lestar,
glan koleste witsrell lo pes ap i phub tele un mangell les an.
16 Jek kotar kasht chatchrell lo an i jag,
un ap koleste pekell lo mass.
Un chal ko mass un well tchalo.
Un job tatsrell pes un penell: “Hawi shukar jag! Mange was tato.”
17 Un ko wawar kasht lell lo un krell peske lestar i dewel,
te mangell lo les an,
un tchiwrell pes glan leste tele un sharell les un penell:
“Le man dran o merepen win, tu hal miro dewel!”
18 Kolla, kai mangenn i figuren an, haiwenn tchi,
kek goswepen hi an lende,
lengre jaka hi pandlo,
te nai dikenn le tchi.
Un lengro dji haiwell tchi.
19 Sawo mensho haiwell gar, hoi lo krell.
Tchi djal an leskro shero,
un kek goswepen hi an leste,
jaake te penals lo peske: “O paash kolestar chatchrom an i jag,
un ap koi jag pekom maro un mass, un chom les.
Un ko wawar paash kolestar, krap i dewel, glan koleste me man tele ap i phub witsrap?
Glan i kotar kasht?”
20 Kowa hi jaake, har te mangals lo i jagakri tchik an.
Leskro dinelo dji anas les an o chochepen.
Kote hatsell lo kek drom win, te penals lo peske:
“Rikrau me man gar ap o chochepen?”
O Israel hi o Debleskro budepaskro
21 Ma biste kowa, Jakob!
Tu, Israel, hal miro budepaskro.
Me krom tut,
tu hal miro budepaskro.
Israel, me bistrau tut gar.
22 Ko tchilatcho koowa, hoi tu kral,
lom tutar krik, te hi lo gar buder.
Jaake har i nebla, har i wolka krik phurdedo well,
jaake phurdom koi doosh krik, hoi ap tute his.
Ab pale pash mande,
me plaissrom tuke, te wess miro.
23 Tu bolepen, gib kolestar, hoi o baro Dewel kras!
Tu telstunepen i phubjatar, de gole i bachtjatar!
Tumer berge, giwenn!
Tu weesh tire tsele rukentsa, gib!
O baro Dewel las o Jakobes dran o merepen win,
un o Israel sharell les.
24 Kawa penell o baro Dewel, kowa, kai ginas tut win dran i bibacht,
un kowa, kai tut kras har gomme gar boldo hals:
Me, o baro Dewel hom kowa, kai lauter kras,
Me kokres krom o bolepen buchlo pral i phub,
Un har me i phub soreles pre tchiwom, his kek kote pash mande.
25 Me krau, te wenn kol laba gar tchatcho, hoi i durkepangre penan,
un mukau kol drawepangre har dinele win te dikell.
Me sikrau, har hi tchi-moldo ko goswepen kolendar, kai patsenn, te hi le gosewo.
Me tchakrau pre, te hi lengro goswepen tchatchepah dinlepen.
26 Me krau, te wenn kol laba tchatcho, hoi miro budepaskro rakras.
Un kowa, hoi mire bitchepangre glan-wi penan, mukau jaake te djal, har le les penan.
Me hom kowa, kai ap o foro Jerusalem penell:
“Mu djiwenn menshe an tute!”
Un pral i forja an o them Juda penau: “Jon wenn pale pre tardo.”
Lauter hoi khetne phagedo hi, tchiwau me pale pre tardo!
27 Me hom kowa, kai ap o baro pani penell: “Ab truk!”
Un kol lengste panja, hoi nashenn an o baro pani, krau me truk!
O baro rai, o Kirus, hi wi-rodedo o Deblestar
28 Me hom kowa, hoi ap o Kirus penell: “Tu dess garda ap mire menshende har i bakrengro ap peskre bakre.”
Un job krell lauter, hoi kamau, te krell lo.
Pral o foro Jerusalem penell lo:
“Tchiwenn les pale pre!”
Un pral o Debleskro baro kheer penell lo: “Tchiwenn leskre barra pale pre!”