24
O Debleskri choli well pral i tseli phub
1 I diwes wella, kai lell o baro Dewel o djipen i phubjatar krik.
Un i phub well i mulo them.
Un kowa, hoi ap late tardo hi, witsrell lo trujel.
Un i menshe wenn kate te kote tradedo:
2 i rashaja un i wawar menshe,
o rai un o budepaskro,
i rajetsa un i budepaskretsa,
o bikepaskro un o ginepaskro,
kowa, kai peske lowe patsell un kowa, kai lowe win patsell,
koles, kai sijaan hi un kowa, pash koleste jekes sijaan hi.
3 I tseli phub well nango un tchi atchell pral ap late.
Awa, wi-randedo un win tchoredo well li.
Kowa rakras o baro Dewel.
4 Hako senlepen ap i phub well truk un merell tele.
I phub nashrell peskri soor un merell tele,
un i an-dikle menshen hi buder kek soor.
5 I menshe ap i phub mukan o Debleskro drom,
un rikran pen gar ap leskre laba,
un djiwan gar jaake, har lo lentsa win kras, un hoi hako tsireske tchatcho hi.
Jaake kran le i phub pale-tchiddo.
6 Doleske chal i bibacht i tseli phub pre.
Un kolla, kai koi djiwenn, lenn pengri phagi.
Bud un budeder merenn.
Un gar bud atchenn djido.
7 I drakengro ruk merell,
un newi mool dell gar.
Kolenge, kai i bachtelo dji his, hi kanna ropaske.
8 I bashepangre denn buder gar ap i pauke.
O gipen un o khelepen well buder gar shunlo.
Kek bashrell buder ap i dorjengre bashepangre.
9 Kek giwell buder pash o pipen,
un shutlo hi i mool kolenge, kai pijenn.
10 Tele phagedo un khetne stakedo hi o foro,
hako kheer hi tele pandlo, te nai well kek dren.
11 Ap i dromma denn le gole pal mool, kolatar kek buder koi hi.
Kek sapen well shunlo,
kek khelepen dell buder.
12 An o foro hi kokres paash dine khera.
Un leskre bare wudja hi an kotja dino.
13 I menshentsa an i themma djal jaake
har an ko tsiro win dikell, kai wan i drake i djeteskre rukendar un i moljakre rukendar tele dino.
Un kokres i wast pherdo atchenn ap i ruka.
14 Kolla, kai atchenn djido, giwenn i bachtjatar.
Kolla, kai djiwenn ap i wawar rig o Mashkralstuno Baro Panjestar sharenn o baro Debleskro railepen:
15 Hadenn o baro Debles,
tumer kai djiwenn kote, kai o kham pre djal!
Un an i panjengre themma denn win gole:
“Har railo hi o baro Dewel, kai o Israeleskro Dewel hi!”
16 Dran themma, kai dur mendar krik hi, shunah o gipen:
“Sharedo well o Dewel, kai o tchatchepaskro hi.”
Me penom mange: Mange hi ropaske! Mange hi ropaske!
Har djungelo djal mange?
Phukepangre phukrenn,
awa, phukepangre phukrenn,
un mukenn gar tele pengro phukepah.
17 Pral tumende, kai ap i phub djiwenn, well bari traash.
Tumer perenn an grube, un taprenn tumen an netse.
18 Kowa, kai nashell nai peske glan i trashakri gole,
perell an i gruba.
Un kowa, kai tserdell pes pral dran i gruba,
well an i netsa tapedo.
O bolepen krell pes pre un dell baro brishin
un o telstunepen, hoi i phub hidjrell, trissella.
19 Un i phub phagell khetne,
phagell an kotja
un perell khetne.
20 I phub perell jek rigjatar ap i wawar har i mato,
un perell khetne har i plachteno kheer.
O tchilatcho koowa ap i phub hi jaake pharo, te perell li un stell gar buder pre.
21 Un ap ko diwes dell o baro Dewel i bolepangre lurden lengri phagi,
un ninna i bare rajen ap i phub.
22 Jon lauter wenn khetne lino un an i gruba witsedo,
un an o stilepen dren pandlo,
un pal bud diwessa well palle pral lende i phagi win rakedo.
23 Un o tchona well lolo i ladjatar,
un o kham ladjell pes un khatrell pes.
O baro Dewel, ko rai pral o bolepen un i phub, well o baro rai ap i berga Zion an o foro Jerusalem.
Un i phureder dikenn leskro railepen.