8
I sikepen o Deblestar
1 Un o baro Dewel penas ap mande: “Le tuke tchomone, kai nai tchineh laba pre, un tchin an i latcho tchinepen jaake, te nai drawerell hakeno kol laba ‘Sik-randedo un sik-tchoredo’.”
2 Un me lom mange dui murshen, kai mursha o labestar hi, un sikrom lende kol laba, hoi tchinom. Kolla his o rashai Urija un o Secharja, koleskro dad o Jeberechja his.
3 Un me djom pash miri romjate dren. Joi his i Debleskri rakepaskretsa. Un joi was wawartchandes un anas i mursh tchawes ap i phub. Un o baro Dewel penas ap mande: “De les o lab ‘Sik-randedo un sik-tchoredo’! 4 Glan te nai dell o ternepen gole ‘tata’ un ‘mama’, mukell o baro rai pral Assur o tselo brawlepen dran Damaskus un o tselo kutch koowa dran Samaria krik hidjrell.”
5 Un o baro Dewel rakras pale ap mande un penas:
6 An i jaka kal menshendar
hi o tikno pani Siloah tchi moldo,
hoi nashell lokes an Jerusalem.
Un kol dui raja, o Rezin un o Pekach, wenn lenge jaake sorelo glan,
te trissenn le i darjatar.
7 Doleske mukell o Dewel o baro rajes dran Assur pral lende te well.
Leskre bud sorele lurde wenna har o baro sorelo pani o panjestar Eufrat,
hoi djal diwjes pral peskre rigja un tchakrell i phub koi trujel.
8 Un jon wenna an o them Juda dren, har pani hoi dren phagell,
un hoi bis pash i meen pre djal.
O Dewel hi pash mende! Leskre mussja hi pral mende jaake dur har o them buchlo hi.
9 Shunenn, tumer menshe an dur themma!
Ninna te tchiwenn tumen khetne, te djan ap o Juda,
ninna te denn i kurepaskri gole,
tumer wenn khetne stakedo!
10 Rakrenn khetne har te djan glan,
un djinenn, kolestar well tchi.
Rakrenn jaake bud har kamenn,
Tchi well win.
O Dewel hi mentsa.
11 O baro Dewel rakras ap mande, har leskro wast soreles ap mande his un man sikras, te dap man jak, te djap gar ap o drom, kai kol wawar menshe an Juda djana. Un job penas:
12 Tu un kolla, kai ap tute shunenn,
ma krenn har kal menshe, kai patsenn, kai lauter phukepaskro koowa hi.
Un ma darenn kolestar, hoi jon darenn!
Mukenn tumen koi darjatar gar te taprell!
13 O baro Debles, ko rajes pral o bolepen un i phub mukenn kokres tumaro Dewel te well!
Un kolestar darenn un trashenn!
14 Pash leste nai khatrenn tumen.
Kol wawarenge an Israel un Juda hi lo har i bar, pral koleste jon perenn,
awa, har i baro sorelo bar, pral koleste jon pen choirenn.
Un i menshenge an Jerusalem hi lo har khatede pandle dorja, an kolende jon perenn un pen taprenn.
15 Un bud lendar dukrenn pen,
perenn un phagenn pen i herja,
taprenn pen an i dori, un wenn pandlo.
16 Tumer, kai shunenn ap mande, pandenn kau liil, kai tchinlo hi, hoi o Dewel mande sikras, un denn jak ap kol laba! 17 Me kamau ap o baro Debleste te dikell. Miro dji djal leske palla, ninna te khatras lo peskre jaka o Jakobeskre menshendar.
18 Me un kol tchawen, kai o baro Dewel man das, ham har i sikepen, hoi sikrell, hoi kamell o baro Dewel te krell an Israel, job, ko rai pral o bolepen un i phub, kai hi khere ap i berga Zion.
19 Nai well, te penenn i menshe tumenge: “Putchenn kolen, kai i mulentsa rakrenn, un putchenn i drawepangren, kolla, kai rakrenn lokes glan pende.”
Ap kolende penenn: “Hunte putchenn gar i menshe pengro debles? Putchenn le i mulen i djidenge?”
20 Rikrenn tumen ap o Debleskro drom, un ap kowa, hoi job tumende sikrell! Te penenn i menshe tumenge wawar koowa, palle well lenge kek momeli ap lengro drom. 21 Un jon djan an o them trujel, phares dino un bari bokah. Un palle, te hi len bari bok, taprell len i choli, un jon praassenn pengro themeskro rajes un pengro debles. Un jon dikenn pre an o bolepen 22 un tel pende ap i phub, un hatsenn tchi har daar un tamlepen, awa bari daar un kali rat, kai hi le dren tradedo.
23 Djinenn, kek tamlepen atchell pral kolende, kai an i daar djiwenn.a An o phuro tsiro anas o Dewel praassepen pral i themma Sebulon un Naftali. An ko tsiro, hoi wella, anell lo railepen ap kau them, hoi pash o baro pani tchiddo hi, ninna ap o them wergel o panjestar Jordan, kai djiwenn kanna i wawar menshe.