119
O railepen an o Debleskre laba
1 Har bachtelo hi kolla, kai jaake djiwenna, te hunte tchingrell o Dewel gar lentsa,
kolla, kai ap o baro Debleskro drom djana.
2 Har bachtelo hi kolla, kai jaake djiwenn, har job lenge sikras,
un pengro tselo djijestar ap leste shunenn.
3 Kolla krenn kek tchilatchepen
un djan ap o Debleskre dromma.
4 Tu, baro Dewel, penal menge, hoi te kras mer, te rikras mer kowa hako tsiro.
5 An miro tselo djipen kamoms te krap, hoi mandar kameh.
6 Te dau jak ap tire laba,
krau tchi te hunte ladjap man.
7 Me parkrau man pash tute o tselo djijestar,
te sikreh tu mange tire tchatchepaskre laba.
8 Me kamau te krap, hoi mandar kameh.
Ma muk man kokres!
9 Har nai djal i terno mursh peskro drom jaake, te atchell peskro djipen djudjo?
Kowa nai krell lo, te rikrell lo pes ap tiro lab.
10 Miro tselo djijeha rodau tut.
Ma muk man te mukap tire laba.
11 Me rikrau tiro lab an miro dji, te anap kek doosh ap mande.
12 Sharedo wess tu, mo baro Dewel!
Tu sikral mange, hoi mandar kameh.
13 Me penau i wawarenge, har tu o tchatchepen wi-rakral.
14 Me hom jaake bachtelo pral tiro drom, kai tu mange sikral, har te djiwap.
Kowa hi mange shukeder har i baro brawlepen.
15 Me rakrau kolestar, hoi tu menge penal, te kras kowa,
un dau jak, te atchap ap tiro drom.
16 Mange hi shukar, te krap, hoi tu mandar kameh,
un bistrau tire laba gar.
17 Ab latches ap mande, tiro budepaskro,
te djiwap un rikrap tiro lab.
18 Kre mange i jaka pre,
te nai dikap har shukar hi te djap tiro drom.
19 Me hom gar khere ap kai phub.
Muk man te haiwap tire laba!
20 Miro dji chatchrell,
te dikap har tu rakreh o tchatchepen win.
21 Tu tchingreh pral kolende, kai phurdenn pen pre.
Praassedo hi kolla, kai mukan tire laba.
22 Muk kek ladj ap mande te well!
Muk len gar pral mande te sal!
Me djau miro drom jaake har tu mange sikral.
23 I raja hi khetne beshdo,
un rakrenna, har te krenn le mange tchilatchepen.
Me hom tiro budepaskro un bistrau gar, hoi tu mandar kameh.
24 Tire laba, hoi sikrenn mange, har te djiwap, krenn man bachtelo.
Jon hi mange har i latcho maal, ap koleste me shunau.
25 An i tchik hom witsedo.
De man pale newi soor jaake har tu mange penal!
26 Me penom tuke lauter dran miro djipen,
un tu shunal man.
Sike mande, hoi mandar kameh!
27 Muk man te haiwap, hoi tire laba mange kamenn te penell.
Jaake te rakrap pral ko baro sorelo koowa, hoi tu kral.
28 Miro dji rowell jaake
te hi man buder kek soor.
De man pale newi soor, jaake har penal.
29 Rike man pale i chocheno dromestar!
An tiro latchepen sike man, har te djap ap tiro drom.
30 Me kamau tiro drom an o tchatchepen te djal,
un jaake djiwell har tire tchatchepaskre laba menge penenn.
31 Me rikrau man soreles ap tire laba, hoi mange sikrenn, har te djiwap.
Baro Dewel, ma muk i wawaren pral mande te sal!
32 Miro dji hi dur pre,
te krap lauter jaake har tu mandar kameh.
33 Sike tu man, baro Dewel, har te krap kowa lauter jaake, har tu mandar kameh,
te djiwap miro tselo djipen jaake, har tu kameh.
34 Muk man lauter haiwell,
te dap jak ap tiro drom,
un shunap ap tute o tselo djijestar.
35 Ab mange ap i rig, te rikrap tire laba!
Shukar hi le mange.
36 Kre te dikap ap tire laba, hoi mange sikrenn, har te djiwap,
un dikap gar ap o brawlepen!
37 Kre, te dikap gar ap kowa, hoi tchi moldo hi,
un de man pale newi soor ap tiro drom!
38 Me hom tiro budepaskro.
Rike mange tiro lab, ko lab, hoi tu lauterenge dal,
kai mukenn tut pengro rai te well.
39 Le mandar koi ladj krik, kolatar darau.
Jaake har tu o tchatchepen an o wast leh, hi mishto.
40 Pen mange, hoi te krap tuke!
Tu hal an o tchatchepen tardo.
De man pale newi soor an miro djipen!
41 Baro Dewel, ab mange latches,
un ab mange ap i rig jaake har tu penal,
42 te well man i lab, hoi penau koleske, kai praassell man.
Me lau tut pash tiro lab.
43 Kre te penap hako tsiro o tchatchepen!
Me dikau ap tute, har tu o tchatchepen an o wast leh.
44 Me kamau tiro drom te djal kanna un hako tsiro.
45 Hoi tu mange penal, krau me.
Doleske djau bachteles miro drom.
46 Glan i bare rajende rakrau kolestar, hoi tu menge penal, hoi te kras mer,
un ladjau man gar.
47 Kamau tire laba o djijestar,
un hom bachtelo te rikrap man ap lende.
48 Me hadau tire laba pre,
un kamau len o djijestar,
un mukau len an miro shero trujel te djal.
49 Ma biste tiro lab, hoi dal tu man, tiro budepaskres!
Dikau ap tiro lab, te well jaake har tu les penal.
50 Har mange o djipen phares his, dal tu man newi soor.
Tiro lab mukas man pre djiwell.
51 Ninna te sanenn pre-phurde menshe pral mande, mukom gar tiro drom.
52 Baro Dewel, te well mange an o shero, har lal tu an o phuro tsiro o tchatchepen an o wast,
palle krell kowa miro dji pale sorelo.
53 I choli taprell man, te dikau,
har i tchilatche mukan tiro drom.
54 Kate ap kai phub, kai me gar khere hom,
giwau gilja pral tire laba.
55 Rati weh tu mange an o shero, baro Dewel,
te djap ap tiro drom.
56 Mange hi shukar te krap kowa, hoi tu menge penal.
57 Me penom mange: O baro Dewel hi o pralstuno an miro djipen.
Pal leskre laba kamau te djiwell.
58 Miro tselo djijeha rodau me tiro kamlepen.
Ab mange latches jaake har tu les penal.
59 Me dau jak, har me miro djipen djiwap,
un djau tiro drom jaake har tu les menge sikral.
60 Me tradom man, un krau sik, hoi tu mandar kameh.
61 I tchilatche tchiwan dorja win trul mande, te perap dren.
Me bistrau tiro drom gar.
62 Mashkral an i rat stau me pre,
te sharap tut, kai lal tu o tchatchepen an o wast.
63 Me rikrau man pash kolende, kai djiwenn tuha
un krenn, hoi tu peneh.
64 Baro Dewel, latcho hal i menshenge ap i tseli phub.
Sike mande, hoi tu mandar kameh!
65 Tu hals latches ap mande, tiro budepaskro, jaake har tu kowa penal.
66 Sike mande te haiwap un djinap, hoi te krap!
Tire laba hi mishto.
Kowa patsau.
67 Har djom tiro dromestar tele,
dal tu man i phagi.
Kanna rikrau tiro lab.
68 Tu hal latcho un kamlo.
Sike mande, hoi tu mandar kameh!
69 Kol pre-phurde anan chochepen pre ap mande.
Miro tselo djijestar krau me kowa, hoi tu menge penal.
70 Kolla menshe pandan pengre djia, te haiwenn le gar tiro lab.
Me hom bachtelo, te djap tiro drom.
71 His mishto mange, te dal man i phagi,
te shunap ap tute un krau hoi tu mandar kameh.
72 Tiro drom kamau me budeder har bud serja kotja sonakai un rup.
73 Tire wasta kran man un rikran man.
Kre, te haiwap tire laba!
74 Kolla, kai djiwenn tuha, wenn bachtelo,
te dikenn le, har patsau ap tiro lab.
75 Baro Dewel, me djinau, tu te deh i phagi, djah tu pal o tchatchepen.
Tuke his tchatcho har dal man i phagi.
76 Kre miro dji pale sorelo dran tiro latchepen,
jaake har tu penal ap mande, tiro budepaskro.
77 Kre tiro dji mange pre, te djiwap!
Me hom bachtelo, te djap tiro drom.
78 Kre, te hunte ladjenn pen kol pre-phurde, kai chochepen ap mande pre anan.
Miro djijeha rakrau pral kowa, hoi tu menge penal, te kras mer.
79 Ach, te rikrens kolla pash mande, kai djiwenn tuha
un prindjrenn tire laba, hoi menge sikrenn, har te djiwas.
80 Muk miro dji ap tiro drom te atchell,
te krap, hoi mandar kameh,
jaake te hunte ladjap man gar.
81 Miro dji nashell pal tute: Ab ap miri rig!
Me dikau ap tute, te rakress mantsa.
82 Me dikau mange i jaka win pal kowa, hoi tu mange penal.
Kaana weh tu, un khosseh mange i swa tele?
83 Me perom an mande khetne har i moljakro gono, hoi pash i jag tchiddo hi.
Ninna te hi man buder kek soor, bistrau me gar, hoi tu mandar kameh.
84 Har rah, baro Dewel, rikreh tut pale,
bis te deh kolen i phagi, kai man, tiro budepaskres, palla lenn.
85 Kol pre-phurde kran chebja, te perap dren,
kolla, kai djan gar ap tiro drom.
86 Tire tsele laba hi o tchatchepen.
Kol pre-phurde lenn man palla un anenn chochepen ap mande pre.
Ab ap miri rig!
87 His buder gar bud, palle marans le man an kau them.
Me mukom gar tire laba, hoi menge penenn, hoi te kras mer.
88 Tu hal jaake latcho, de man pale newi soor,
te rikrap tire laba, hoi sikrenn menge har te djiwas.
89 Baro Dewel, tiro lab atchella hako tsireske,
un hi soreles tardo an o bolepen.
90 Tiro tchatchepen atchell jaake rah har menshe koi hi.
Tu kral i phub un joi atchella tardo.
91 Jaake har tu kamal, hi li gomme kau diwes tardo.
Lauter ap i phub hunte krell, hoi tu kameh.
92 Te woms gar bachtelo te djap tiro drom,
palle meroms, jaake phares his miro djipen.
93 An kek tsiro kamau te bistrap hoi tu menge penal, te kras mer.
Dran tire laba rikreh tu man djido.
94 Me hom tiro un kamau te krap, hoi mange peneh.
Doleske ab ap miri rig!
95 I tchilatche lenn man an i jak, te denn le man mulo.
Me dau jak ap tire laba, hoi menge sikrenn, har te djiwas mer.
96 Me dikom te atchell tchi, witar gar kowa, hoi mishto hi.
Tiro lab kokres atchella tardo.
97 O djijestar kamau tiro drom te djal.
O tselo diwes hi tire laba an miro shero.
98 Tire laba hi hako tsiro miro brawlepen,
un krenn man gosweder har kolen, kai mange tchilatchepen kamenn.
99 Me rakrau miro djijeha pral tire laba, hoi menge sikrenn, har te djiwas.
Doleske haiwau budeder har mire sikepangre.
100 Me krau, hoi tu menge penal.
Doleske haiwau budeder har i phure.
101 Hako tchilatcho dromestar rikrom mire herja pale, te rikrap tiro lab.
102 Me krau pal tire tchatchepaskre laba.
Tu hals miro sikepaskro.
103 Tiro lab hi har i gudlo chapen mange,
awa, gudleder har gwina hi lo.
104 Tiro lab krell man gosewo.
Doleske nai dikau gar chochene dromma glan i jaka.
105 Tiro lab hi har i momeli, hoi sikrell, kai te djap,
awa, i momeli ap miro drom.
106 Me dom man sowel, un me kamau lat te rikrell:
Kamau te djap pal tire tchatchepaskre laba.
107 Miro dji hi phares dukedo, baro Dewel.
De man pale newi soor jaake har tu mange penal!
108 Baro Dewel, dik latches ap mire laba, kolentsa parkrau man pash tute.
Sike mande tire tchatchepaskre laba.
109 Miro djipen hi hako tsiro gar dur o merepastar.
Tiro drom bistrau me gar.
110 I tchilatche tchiwan dorja win, te taprenn le man.
Me mukau gar tire laba, hoi menge penenn, hoi te kras mer.
111 Tire laba, hoi menge sikrenn, har te djiwas, hi mange kutch un atchenna mange hako tsiro.
Awa, jon hi kolla, hoi miro dji bachteles krenn.
112 Me krau miro dji pre, te krap, hoi tu mandar kameh kanna un hako tsiro.
113 Me choirau man ap kolende, kolen dui djia hi,
tiro drom kamau me o djijestar.
114 Tu hal kowa, pash koleste man khatrau,
un koon peskre wasta pral mande rikrella. Doleske dikau ap tiro lab, hoi tu man dal.
115 Djan pale mandar, tumer, hoi krenn o tchilatchepen!
Me rikrau ap i laba miro Deblestar.
116 Rike man ap o djipen
jaake har dal man tiro lab.
Ma muk man tchitcheske ap tute te dikell.
117 Hade man pre, te nai taprell man kek,
un me kamau hako tsiro te krell, hoi mandar kameh.
118 Kolen, kai gar krenna, hoi lendar kameh, tradeh tu tutar.
Lengro chochepen hi tchitcheske.
119 I tchilatchen khosseh tu krik kai phubjatar har tchik.
Doleske kamau me tire laba, hoi menge sikrenn, har te djiwas.
120 Tutar darau jaake, te trissau.
Tu deh i phagi kolen, kai shunan gar ap tute.
121 Me krau o tchatchepen, un djau o tchatcho drom.
De man gar an o wast kolendar, kai kamenn ap mande pre te djan.
122 Me hom tiro budepaskro. Rake mange mishto,
te nai djan gar i pre-phurde i sorjah ap mande pre.
123 Mire jaka nashenn pal tute: Le man win dran o tchilatchepen,
jaake har tu penal an tiro tchatchepen.
124 Ab latches mange, kai tiro budepaskro hom,
un sike mange, hoi tu mandar kameh.
125 Tiro budepaskro hom me.
Muk man tire laba te haiwell,
hoi menge sikrenn, har te djiwas.
126 Kanna hi o tsiro, kai o baro Dewel hunte krell tchomone.
Jon peran tiro dromestar tele.
127 Me kamau tire laba budeder har o sonakai,
awa, budeder har o latcheder sonakai.
128 Tire tsele laba, hoi menge penal, hi mange mishto.
Kamau tchi te djinell i chocheno dromestar.
129 Tire laba, hoi sikrenn menge, har te djiwas, kolla sikrenn tiri bari soor.
Doleske rikrau len o djijestar.
130 Te haiwah tiro lab, palle krell men kowa bachtelo,
un ninna kolla, kai tchi djinenn, wenn gosewo.
131 Me krau miro mui dur pre, un pijau tiro lab,
jaake bud trush hi man pal tire laba.
132 Risse tut pash mande,
un ab mange latches,
jaake har kolenge hal, kai kamenn tut o djijestar.
133 Muk te atchap soreles ap tiro drom, jaake har tu penal,
te well o tchilatchepen kek rai pral mande!
134 Le man win dran i wasta kolendar, kai man tikno rikrenn,
un me kamau kowa te krell, hoi tu menge penal.
135 Dik latches ap mande, tiro budepaskro,
un sike mange, hoi tu mandar kameh!
136 Rowau bud swa pral kolende, kai mukenn tiro drom.
137 Baro Dewel, tu hal an o tchatchepen tardo,
un tire tchatchepaskre laba hi mishto.
138 Tire laba, hoi sikrenn menge, har te djiwas, kolla lauter hi tchatcho un mishto.
139 I choli tapras man un kamas man pre te chatchrell,
har dikom, kai bistran kolla tire laba, kai mange o djipen phares krenna.
140 Tire laba hi latcho un tchatcho,
un me, tiro budepaskro, kamau len miro tselo djijeha.
141 Ninna te hom gar an-diklo, un i menshe dikenn tele ap mande,
bistrau me tchi, hoi menge penal, te kras mer.
142 Tiro tchatchepen atchella hako tsiro,
un tiro drom hi tchatcho.
143 Ninna te hi miro djipen pharo un i daar tapras man,
hom bachtelo pral tire laba.
144 Tire laba, hoi menge sikrenn, har te djiwas, atchenna hako tsiro tchatcho.
Sike mande, har te haiwap len! Palle djiwau.
145 O tselo djijeha dom me gole.
Shun man, mo baro Dewel!
Me kamau lauter te krell, hoi tu mandar kameh.
146 Ap tute dom me gole.
Ab ap miri rig!
Me kamau man te rikrap ap tire laba, hoi mende sikrenn, har te djiwas.
147 Sik taissarlakro dau me gole ap tute, te wess ap miri rig,
un dau jak, te rakreh ap mande.
148 Ninna an i rat djangrau pre, un rakrau miro djijeha pral tire laba.
149 Shun man, hoi me penau!
Baro Dewel! Tu hal jaake latcho!
De man pale newi soor tire tchatchepaskre labentsa!
150 Kol tchilatche, kai man palla lenn, hi buder gar dur mandar.
Tiro dromestar hi le dur.
151 Baro Dewel, tu hal pash mande.
Un tire tsele laba hi o tchatchepen.
152 I rah tsiro prindjrau tire laba, hoi menge sikrenn, har te djiwas.
Tu kral, te atchenn le hako tsireske.
153 Dik, har djungeles mange djal
un le man win dran i bibacht!
Tiro drom bistrom me gar.
154 Le tu miro koowa an tiro wast,
un le man win dran i tchilatche wasta!
De man pale newi soor jaake har tu mange penal!
155 I tchilatche krenn gar, hoi tu lendar kameh.
Doleske tchiweh tu len gar an o tchatchepen.
156 Baro Dewel, tu kreh tiro dji dur pre menge.
De man pale newi soor tire tchatchepaskre labentsa!
157 Bud hi kolla, kai man palla lenna, un les mange phares krenna.
Me mukau gar tire laba, hoi menge sikrenn, har te djiwas.
158 Me nai dikau kol phukepangren gar glan i jaka,
kai rikrenn pen gar ap tire laba.
159 Dik, har me kamau tire laba, hoi menge penenn, hoi te kras mer.
Baro Dewel, tu hal jaake latcho, de man pale newi soor!
160 Tiro tselo lab hi o tchatchepen.
Un tire tsele tchatchepaskre laba atchenna hako tsireske.
161 Raja lenn man palla, ninna te krom me lenge tchi,
tire laba kokres hi kolla, kai me darau man lendar.
162 Pral tiro lab hom jaake bachtelo
har jek, kai las bud brawlepen.
163 Chochepen hi mange djungelo, un me nai dikau les gar glan i jaka.
Tiro drom kamau me o djijestar.
164 Jaake har tu o tchatchepen wi-rakreh, hi kowa mishto.
Un me sharau tut koleske efta kope an o diwes.
165 I bari bacht hi kolen, kai tiro drom kamenna.
Jon perenn gar tiro dromestar tele.
166 Baro Dewel, dikau ap tute, te tchiwess man an o tchatchepen,
un krau, hoi mandar kameh.
167 Miro tselo djijeha rikrau man ap tire laba, hoi menge sikrenn, har te djiwas,
un kamau len bud un budeder.
168 Me rikrau tire laba, hoi menge penenn, hoi te kras un har te djiwas;
lauter, hoi krau, dikeh tu.
169 Baro Dewel, shun miro ropen!
Muk man tire laba te haiwell, jaake har tu penal!
170 Shun koi gole miro djijestar!
Le miro djipen win dran i bibacht jaake har tu mange penal!
171 Tu sikreh mange, hoi mandar kameh.
Doleske kamell miro mui tuke te giwell.
172 Miri tchip kamell tiro lab te giwell.
Tire tsele laba hi mishto un tchatcho.
173 De man tiro wast, hoi hadell man!
Me krom miro dji pre, te rikrap tire laba, hoi menge penenn, hoi te kras mer.
174 Baro Dewel, miro tselo djijeha kamau, te tchiwess man an o tchatchepen.
Me hom bachtelo te djap tiro drom.
175 Muk man te djiwell, te sharap tut,
kre man soreles tire tchatchepaskre labentsa.
176 Me hom har i bakro, hoi nashedo djas.
Rode man, tiro budepaskres,
me bistrom tire laba gar!