118
Penenn i menshenge, hoi o Dewel lauter kras
1 Parkrenn tumen pash o baro Debleste!
Job hi kamlo,
un leskro latchepen atchella hako tsireske.
2 Jaake hunte penenn i Israelitarja: Leskro latchepen atchella hako tsireske.
3 Jaake hunte penell o Aroneskro kheer: Leskro latchepen atchella hako tsireske.
4 Jaake hunte penenn kolla, kai djiwenn o baro Debleha:
Leskro latchepen atchella hako tsireske.
5 Har tapras man i daar, dom me gole ap o baro Debleste,
un job shunas man, un kras miro dji soreles.
6 O baro Dewel hi pash mande.
Me darau gar.
Hoi nai krell man i mensho?
7 O baro Dewel hi pash mande, te well lo ap miri rig tardo.
Jaake dikau mire jakentsa, har tchiwell lo kolen tel mande, kai kamenn mange tchilatchepen.
8 Hi feteder te rikras men ap o baro Debleste, har te rikras men ap i menshende.
9 Hi feteder te rikras men ap o baro Debleste, har te rikras men ap i rajende.
10 Bud menshe his trul mande, kai kaman mange tchilatchepen.
An i soor o baro Deblestar nai tradom len pale.
11 Haki rigjatar wan le ap mande pre.
An i soor o baro Deblestar nai tradom len pale.
12 Jon peran ap mande pre har i biene.
An i soor o baro Deblestar nai tradom len pale.
Har i jag sik win djal, hoi an i subjengre burra chatchell,
jaake sik his le krik.
13 Har dan le man i soreli dap, te perap,
was o baro Dewel ap miri rig.
14 Lestar well miri soor.
Leske giwau miri gili.
Job was un las man win dran i tchilatche wasta.
15 Shun koi gili, hoi giwenn o Debleskre menshe bachteles an pengre khera:
“O baro Dewel hi o sorleder.
Job hi o sorleder an o kurepen.
16 Leskro tchatcho wast hi hadedo:
Job hi o sorleder an o kurepen.”
17 Me merau gar.
Na-a, atchau djido,
un penau i menshenge, hoi o baro Dewel lauter kras.
18 Ninna te das lo man soreles,
mukas lo man gar te merell.
19 Krenn mange i bare wudja pre an o Debleskro kheer,
te djap dren,
te parkrap man pash miro baro Debleste.
20 Kate hi o baro Debleskro wudar:
i Debleskre menshe djana kote dren.
21 Me parkrau man pash tute,
te shunal tu man,
un wal ap miri rig.
22 Ko bar, hoi i budepangre ap i rig witsran,
kowa was ko sorelo bar, ap koleste o kheer tardo hi.
23 O baro Dewel kras kowa.
Un kowa hi menge i baro koowa, hoi haiwah gar.
24 Kawa hi o diwes, hoi o baro Dewel kras.
Giwenn un khelenn i bachtjatar pral leste!
25 Baro Dewel, ab ap mari rig!
De men bacht, te djal lauter mishto!
26 Sharedo well kowa, kai well an o baro Debleskro lab.
Kate, dran o Debleskro kheer rakrah o Debleskri bacht pral tumende win.
27 O baro Dewel hi kokres o Dewel.
Kamles dikell lo ap mende.
Awenn, lenn palmtikre patria an o wast,
un djan khelepah glan o Debleskri chatchepaskria!
28 Tu hal miro Dewel.
Pash tute kamau man te parkrell.
Miro Dewel, tut kamau me te sharell.
29 Parkrenn tumen pash o baro Debleste!
Job hi kamlo,
un leskro latchepen atchella hako tsireske.