106
O Debleskre menshe ap lengro drom an o them Kanaan
1 Sharedo well o baro Dewel!
Parkrenn tumen pash o baro Debleste!
Job hi i latcho Dewel.
Leskro latchepen atchella hako tsireske.
2 Koon nai penella ko tselo baro koowa, hoi o baro Dewel lauter kras?
Koon nai sharell les doha?
3 Bachteles hi kolla, kai leskre laba rikrenna,
un hako tsiro o tchatchepen krenna.
4 Baro Dewel, tu dal tire menshende tiro lab, te wess ap lengri rig.
Biste man gar un ab mange latcho!
5 Te nai dikap i bacht, hoi tu kolen dal,
hoi tuke wi-rodal,
te nai wap bachteles khetne tire menshentsa,
te nai sharas men, te ham tire.
6 Mer anam doosh ap mende jaake har mare phure,
un kram gar, hoi tchatcho hi.
Na-a, mer kram tchilatcho koowa.
7 Mare phure haiwan gar ko baro sorelo koowa, hoi tu an o them Egiptia kral,
un bistran har bud lenge latches hals,
un hadan pen pral tute pash o Baro Lolo Pani.
8 O baro Dewel sikras, te hi lo lengro Dewel,
un was ap lengri rig,
te sikrell lo peskri soor.
9 Job tchingras ap o Baro Lolo Pani.
Koi djas o pani pale,
un i phub his buder gar sapeno.
Un job mukas len mank o pani te djal har te wals truk them.
10 Jaake las lo len win dran i wasta kolendar, kai kaman len te marell.
11 Un o pani tassas lauteren, kai len palla lan.
Kek atchas djido.
12 Palle patsan le leskre laba,
un giwan leske gilja.
13 Sik bistran le lauter, hoi job kras,
un putchan gar, hoi job lendar kamell.
14 An o mulo them lan le bok pal o mass,
un patsan gar, te nai dell o baro Dewel len lauter, hoi len hunte well djipaske.
15 Kote das lo len, hoi jon mangan,
un das len jaake bud, te was lenge kowa dran o nak win.
16 Ap lengri platsa hadan le pen pral o Moseste,
un pral o Aroneste, koles o baro Dewel peske win rodas.
17 Koi djas i phub pre, un chas o Datan, un tchakras tel peste o Abiram peskre menshentsa.
18 Un i jag chatchras mank lende
un chatchras kolen, kai kau tchilatcho koowa kran.
19 Pash i berga Horeb kran le penge i sonakaskri terni grumni,
witsran pen glan late tele un mangan lat an.
20 Jon mukan o railo baro Debles, un mangan i figura i grumjatar an, hoi khass chal.
21 Jon bistran ko Debles, kai lengro djipen dran o merepen win las,
un baro koowa an o them Egiptia kras,
22 sawo koowa, hoi kek wawar nai kras,
ninna sawo sorelo koowa pash o Baro Lolo Pani, kai lenge o rakepen krik atchas.
23 Doleske kamas lo len mulo te dell,
te wals kote gar o Mose, koles job peske wi-rodas.
Kowa stas pre, te rikrell lo o Debles leskri choljatar tele, jaake te dell lo len gar mulo.
24 Un lenge his ko shukar them tchi moldo,
un patsan gar ap ko lab, hoi o Dewel len das.
25 An pengre plachtene khera rakran le djungeles pral leste,
un shunan gar ap o baro Debleste.
26 Kote hadas lo peskro wast un das pes sowel,
te marell lo len an o mulo tato them,
27 un tradell lengre tchawen an wawar themma,
te djiwenn jon mank wawar menshende.
28 Pal i tsiro witsran pen i Israelitarja glan kol wawarengro debleste Baal tele ap i berga Peor,
un chan ko mass kol viechendar, hoi wan maredo i mulenge.
29 O baro Debles tapras i bari choli pral kowa, hoi peskre menshe kran.
Un job mukas i pharo nasslepen pral lende te well.
30 Kote stas o Pinhas pre, un das len i phagi,
un ko nasslepen djas krik.
31 Kowa, hoi o Pinhas kras, his shukar glan o Debleskre jaka.
Doleske kras o Dewel les tchatcho glan peskre jaka hako tsireske.
32 Pash o pani Meriba choiran le pale o Debles,
un anan o Moses an i bibacht:
33 Jon kran les jaake chojedo, te rakras job sik, un leskre laba his gar gosewo.
34 Mare phure maran gar kol wawar menshen an o them,
har o baro Dewel lenge penas.
35 Na-a, jon romedineran pen kolentsa, kai o Debles gar prindjrenn,
un kran sau koowa har jon kran,
36 un mangan lengre deblen an.
Jaake peran le o baro Debleskro dromestar tele.
37 Jon maran pengre tchawen un tchen i bengenge.
38 Awa, jon dan pengre tchawen un tchen mulo, kai kek doosh ap pende anan,
un dan len kol mule deblen, kolen i Kanaanitarja an-mangan.
Jaake anan le rateskri doosh ap o them Kanaan,
39 un kran pen pale-tchiddo koleha, hoi jon kran,
un peran o baro Debleskro dromestar tele.
40 Kote choiras pes o baro Dewel ap peskre menshende,
un nai dikas len buder gar glan peskre jaka.
41 Job das len an o wast i menshendar an wawar themma,
te wenn kolla rai pral lende, kai dikan tchilatche jakentsa ap lende.
42 Un kolla, kai lenge tchilatchepen kaman, rikran len tikno,
un soreles his lengro wast ap lende tchiddo.
43 Bud kope las lo len dran lengre wasta win.
Un pale te pale kran le kowa, hoi choiras les,
un mukan gar tele pengro tchilatcho koowa,
un wan bud un budeder koi dren.
44 Un te dan le gole ap leste an pengre duka,
un job dikas, har djungeles lenge djal,
45 palle was an leskro shero, hoi kras lo lentsa win, te hi lo lengro Dewel.
Un an peskro baro latchepen khaitan le les.
46 Un job kras, te dikan lauter kolla latches ap lende, kai len pandan.
47 Baro Dewel, le men win dran i wasta kol wawar menshendar, maro Dewel!
An men pale lauter khetne an o them Israel,
te parkras men pash tute, kai kokres o tchatcho Dewel hal.
Mari bacht hi, te nai sharah tut.
48 Sharedo well o baro Dewel, kai o Israeleskro Dewel hi, kanna un hako tsireske!
Mu penenn i tsele menshen: “Amen! Sharedo well o baro Dewel!”