69
Le man win dran miri ladj
2 Le man win, mo Dewel!
O pani djal mange bis pash i meen.
3 Me tassau an sapeni tchik,
mire herja hatsenn kek phub, kai jon nai tardo atchans.
Hom an pani, hoi dur tele djal.
Un sorele panja kamenn man tele te tserdell.
4 Me dom gole, bis te man kek soor buder an mande his,
un miri meen dukas.
Mire jaka wan khino, jaake rah dikau pal miro Debleste.
5 Budeder har mire balla ap miro shero hi kolla,
kai hi chojedo ap mande,
ninna te krom me len tchi.
Un kolen, kai kamenn mange tchilatchepen, hi bari soor,
un kamenn man te marell.
Me krom len tchi,
un hunte dap kowa pale, hoi me gar tchorom.
6 Miro Dewel, tu djineh, har dinelo homs,
un prindjreh miri doosh, hoi ap mande anom.
7 Ma muk kolen pengro patsepen te nashrell, kai pen ap tute rikrenna,
te dikenn le har djungeles mange djala.
Tu, baro Dewel, kai hal o rai pral o bolepen un i phub,
ma muk man te anap ladj ap kolende,
kai tut rodenna, o Debles pral o Israel.
8 Dran tute hi i bari ladj ap mande,
un miro shero hi lolo i ladjatar.
9 Wom har i gadjo mire phralenge.
I tchawe miri datar prindjrenn man buder gar.
10 Kamau tiro kheer jaake bud,
te chatchell miro dji an mande har i jag.
Un kolla, kai praassenn tut, praassenn man ninna.
11 Rowom un kamom tchi te chal,
un jon san man doleske win.
12 Har riwom i gonoa an, te sikrap har pharo miro dji hi,
kran le i sapaskri gili pral mande.
13 Ap i platsa, kai le khetne wenn, rakrenn le pral mande.
Un mate giwenn gilja pral mande.
14 Me mangau tut, baro Dewel,
o tsiro hi kai, te wess mange latches.
Mo Dewel, tiro latchepen hi baro!
Shun man, rike tiro lab un ab ap miri rig!
15 Le man win dran kai sapeni tchik, te tassap gar dren,
Le man win dran i wasta kolendar, kai kamenn man te marell!
Tserde man win dran o pani, kai hi man buder kek phub tel i herja,
16 te tserdenn man i sorele panja gar tele,
un me tassap.
Ma muk man te merell!
17 Shun man, mo baro Dewel,
tiro latchepen hi mishto mange.
Kre tiro dji mange dur pre un dik ap mande!
18 Ma khate tut mandar, kai tiro budepaskro hom!
Me hom an bari daar,
shun man sik!
19 Ab pash mande un le man win!
Le man win dran i wasta kolendar,
kai kamenn miro merepen.
20 Tu prindjreh i ladj, hoi ap mande peras,
tu djineh, har jon man praassan un pal mande rakran.
Kolla, kai mange o djipen phares krenn,
hi lauter glan tire jaka.
21 Kai ladj phagell miro dji,
un krell man nasselo.
Patsom, te khaitoms me jekes,
te wals jek kai, kai mange mire swa tele khossals.
Na-a, kote his kek,
gar jek, kai kowa krals.
22 Jon dan man i shutlo chapen,
un har his man trush, dan le man shut te pijell.
23 An kol diwessa, kai wenn le khetne te chan shukar chapen,
muk lengro chapen lenge te well i netsa, kai perenn le dren!
24 Lengre jaka te wenn korelo, te nai dikenn le buder tchi!
Le lendar lengri soor,
te djan le bango.
25 De lenge i phagi!
Un tiri bari choli mu taprell len.
26 Mu well koi platsa paash dino, kai lengre plachtene khera tardo hi,
te djiwell buder kek mensho koi.
27 Jon lenn koles palla,
koles tu dal,
un lenge hi shukar, te rakrenn le pral i duka un dawa, hoi tu les dal.
28 Tchin haki doosh lendar an i liil;
jaake te mukess len tu gar an tiro tchatchepen te well.
29 Le lengre laba win dran tiro liil, kai kolla dren tchinlo hi, kai o djipen lenna,
te hi jon gar dren tchinlo khetne kolentsa, kai an o tchatchepen tardo hi.
30 Me hom tchorwelo un man hi bud duka.
Mo Dewel, ab ap miri rig un de ap mande jak!
31 I giljah kamau tut te sharell,
un tiro lab te hadell,
un man pash tute te parkrell.
32 Kowa hi tuke feteder
har te anap tuke i grumni,
awa, i sorelo gurumb, te well lo tuke chatchedo.
33 Te dikenn kowa kolla, kai tele rikedo hi,
wenn le bachtelo.
Un kolenge, kai o Debles rodenna,
djiwell lengro dji pale pre.
34 O baro Dewel shunell i gole kolendar, kai tele-rikede hi,
un bistrell peskre pandle menshen gar.
35 O bolepen un i phub sharenn les!
Ninna i bare panja un halauter, hoi dren djiwell.
36 O Dewel well o foreske Zion ap i rig,
un krell i forja an o them Juda pale newes.
Leskre menshe djiwenn kote,
un o them hi lengro.
37 Un i tchawe kolendar, kai hi o Debleske koi, lenn ko them.
Un kolla, kai o Debles o djijestar kamenna, djiwenn koi.