31
1 Me djom i sowel mire jakentsa dren,
te dikap gar lubekanes i terni tchake palla.
2 Te rikroms me gar ap kowa, hoi krals palle mantsa o Dewel an o pralstunepen?
Tchatchepah o sorelo Dewel, kai hi an o pralstuno bolepen, dals man kek latcho koowa koleske!
3 Pral i tchilatcho well bibacht,
un koleske, kai krell djungelo koowa, djal tchi mishto.
4 O Dewel dikell halauter, hoi krau,
un djinell, hawo drom mire pire djan.
5 Djom me i chocheno drom?
Rakrom dui tchipjentsa?
6 Me mangau o Debles, te dikell lo palla an o tchatchepen: Lom me doosh ap mande oder gar?
Palle dikell lo, te hom an o tchatchepen tardo.
7 Te djan mire herja tele leskro dromestar,
un te nashas miro dji mire jakenge palla,
un te kran mire wasta tchomone, hoi gar mishto hi,
8 palle kamau djob an i phub te witsrell,
un i wawar nai chal kowa, hoi kolestar bares was.
Un kowa, hoi mange dran i phub win was,
tserdenn palle i wawar dran i phub win.
9 Te mukas pes miro dji i wawareskri djuwjake dren,
un te luroms me ap late pash koleskro wudar,
10 palle te kerell miri romni i wawareske,
un wawar mursha te sowenn lah!
11 Kowa wals i wi-ladjedo koowa,
un i doosh, hoi hunte well glan i tchatchepaskre murshende anlo.
12 Sawi doosh wals har i jag, hoi man tseles chatchrell,
un ninna halauter, hoi man hi, pre chals.
13 Te doms miro budepaskres
– nai well i mursh, nai well i djuwel –
gar tchatches an i tchingepen, kai les tchatches his,
14 hoi kroms me nai palle,
te hadals pes miro Dewel pre,
un dikals ko koowa palla?
Hoi nai penoms me leske?
15 Job, kai kras man an miri dakro per,
hi kowa, kai kras ninna kolen, kai mange budrenn.
16 Dom me gar o tchorweles kowa,
hoi lo mandar mangas?
Wom me gar koi djuwjake ap i rig, kolakro rom meras,
un kai gar doha djipaske his?
17 Chom me miro chapen kokres,
un dom kolen tchi, kolen buder kek dad his?
18 Fun tiknes pre dom me ap lende jak,
har te woms me lengro dad.
Un miro tselo djipen wom kol djuwjenge ap i rig, kolengro rom meras.
19 Te dikom jekes, kai jaake tchorwelo his, te his les kek ripen, te tatsrell lo pes,
20 dom me leste koola kerdo dran i balla mire bakrendar, te was leske tato.
Un job parkras pes pash mande o tselo djijestar.
21 An kek tsiro hadom me miro wast pre ap i tchaweste, koles kek dad buder hi,
ninna te djinom, te hi halauter ap miri rig, kai his an o foreskro wudar beshdo.
22 Te kroms me sau koowa,
palle mu phagell miri mussi,
un win tserdedo well dran miri phik!
23 Sau koowa nai kroms me gar, me trashau o Deblestar,
un hunte daroms, te well leskri choli pral mande!
24 Miro sonakai was gar miro dewel.
Ap leste penom me gar: Tu hal kowa, hoi man hunte well!
25 Me stom gar i bachtjatar,
te was miro brawlepen baro,
un mange jaake bud khetne lom.
26 Me mangom gar o kham an peskro railepen an,
witar gar o tchona an peskro shukapen.
27 Miro dji rissras pes gar tchorchanes pash lende,
te witsroms me lenge i wasteskri tchum koi!
28 Kowa wals i doosh,
hoi hunte wals glan o tchatchepangre murshende anlo.
Koleha phukroms ap o Debleste an o pralstunepen.
29 Me wom gar bachtelo koi pral,
har djas koleske djungeles, kai mange tchilatchepen kamas.
Witar gar dom gole i bachtjatar,
har was i bibacht pral leste.
30 Me anom kek doosh ap mande,
te rakroms i bibacht pral leste win,
te merell lo.
31 Na-a, lauter kai pash mande djiwenn, djinenn,
hakeno, kai pash mande was, las latches un doha te chal.
32 Kolla, kai ap pengro drom pash miro wudar wan,
kolenge krom me pre.
Kek wi-themari hunte sowas win ap o drom.
33 An kek tsiro kamom miri doosh te khatrell, har wawar menshe krenn.
34 Man his kek daar kolestar,
hoi nai rakrens i menshe pral mande,
witar kek traash i ladjatar,
hoi nai anens mire menshe ap mande,
te penoms doleske tchi,
un djoms gar glan miro wudar.
35 Ach, te wals jek koi,
kai ap mande shunell!
Hoi penom, tel kowa nai tchinau miro lab.
O sorelo Dewel te rakrell pale!
Kai hi ko liil, an koleste kowa miri doosh pre-tchinas,
kai penell, te lom doosh ap mande?
36 Tchatchepah me hadaus kau liil ap miri phik pre,
un hidjraus les har i rajeskri stadi ap miro shero.
37 Me penaus leske hako koowa, hoi krom an miro djipen,
un har i rai waus me glan leste.
38 Te das miri hachetikri phub gole pral mande,
un leskri tchik hunte rowas,
39 te chom ko djob, un plaissrom koleske tchi,
un mukom i hachen i bokatar te merell,
40 palle te well buder kek gib un djob win dran miri phub!
Na-a, palle te anell i phub subjengre burra un djungelo senlepen win!
Kate herell o Hiobeskro rakepen pre.