O liil pral i Ester
1
O Ahasveros hi i baro rai, koles bud brawlepen hi
1 His an ko tsiro, har o Ahasveros o baro rai his pral 127 (jek-sheel-te-biish-te-efta) themma, hoi djan o themestar India bis pash o them Etiopia. 2 Leskri rajeskri beshepaskri his tardo an peskro sorelo kheer an o foro Susa. 3 Har job o triinto bersh o baro rai his, kras job i baro festo i tsele pralstunenge un barenge: kolenge, kai his pralstune pral kol bud lurdende an i themma Persia un Media, ninna kol brawelenge un themeskre rajenge dran peskre tsele themma. 4 Kau baro festo djas 180 (jek-sheel-te-ochta-deesh) diwessa. Un an ko tsiro sikras lo len peskro baro brawlepen un ko tselo kutch koowa, pral kowa job halauter o rai hi.
5 Har kol diwessa trujel djan, kras o baro rai i baro chapen kolenge lauterenge, kai an peskro sorelo kheer an o foro Susa his, i barenge un i tiknenge. Ko baro chapen djas efta diwessa. Un i menshe wan khetne an i baara pash o baro rajeskro railo kheer. 6 Kote his parne un blauete plachte pandlo ap rupene gustria mank turme dran marmor. Trul kol plachte his laintikre un lole dorja. Beshepangre i herjentsa dran sonakai un rup his kote tardo ap i kutch barrengri phub, hoi senelo, parno, djelto un kalo his. 7 O pipen was win tchoredo an khore dran sonakai, kolendar his kek har o wawar. Un das bud rajeskri mool, budeder har bud. O baro rai rikras lat gar pale. 8 Job penas i pralstunenge pral peskro kheer, te nai pijell hakeno jaake bud har job kamella. Doleske penas kek o wawareske, har bud te pijell lo. 9 Un ninna i rani Wasti kras i baro chapen i djuwjenge an o railo kheer o baro rajestar Ahasveros.
I rani Wasti atchell gar buder i rani
10-11 Un ap o eftato diwes his o baro rajeskro dji bachteles bud moljatar. Un job kamas i rajenge un i tsele menshenge peskri romjat, i rani Wasti, te sikrell, kai jaake shukar his. Un job rakras kol efta pralstunentsa, kai ninna pral o djuwjengro kheer penepaske hi: o Mehuman, o Biseta, o Harbona, o Bigta, o Abagta, o Setar un o Karkas. Lenge penas lo, te anenn le i rani, un te hidjrell li peskro shereskro sonakai.
12 Har penan kol efta mursha i ranjake Wasti, hoi o baro rai latar kamell, kamas li gar pash leste te well. Kote tapras i bari choli i baro rajes. 13 Un o baro rai rakras i gosewe murshentsa, kai prindjran mishto o themeskro tchatchepen. Pash lende his jaake, kai o baro rajeskro koowa hunte well glan kolende, kai haiwan mishto o themeskro tchatchepen un djinan, hoi te krenn. 14 Mank lende his o Karshena, o Shetar, o Admata, o Tarsis, o Meres, o Marsena, un o Memukan. Kol efta his i raja pral i themma Persia un Media. Un pal o baro rajeste his jon i pralstune an o tselo them. Ap lende rakras lo, te kamell lo tchomone te djinell.
15 Un job penas ap lende: “Me, o baro rai, bitchrom mire budepangren pash i rani Wasti, te penenn le lake, hoi latar kamom. Un joi shunas gar ap miro lab. Hoi te kras mer kanna lah pal maro tchatchepen?”
16 Koi penas o Memukan glan o baro rajeste un glan i pralstunende: “Koi doosh, hoi i rani Wasti ap peste anas, hi gar kokres i doosh ap o baro rajeste, na-a, kaja hi i doosh ap i tsele pralstunende un ap i tsele murshende an i tsele themma, kai o Ahasveros o baro rai hi. 17 Kowa, hoi i rani Wasti kras, shunenn i tsele djuwja, un dikenn tele ap pengre romende un penenn: O baro rai Ahasveros penas, te well i rani Wasti glan leste. Un joi kamas gar. 18 Kau diwes penenn i pralstunengre romja an o them Persia un Media pengre romenge, hoi i rani kras. Un jon dikenn buder gar pre ap pengre romende. Un kolla wenn chojedo pral lende. 19 Te hi mishto an o baro rajeskre jaka, palle djal i lab win lestar, te nai well i Wasti buder gar glan leste. Ko lab well tchinlo an o tchatchepaskro liil ko themestar Persia un Media, kai kek nai lell les buder pale. Un palle lell o baro rai i wawar tchai, te well li rani, – i tchai, kai latcheder hi har i Wasti. 20 Kanna te well kau lab o baro rajestar penlo an o tselo them, palle dikenn i tsele djuwja pre ap pengre romende, – pash i brawelende, ninna pash i tchorwelende.”
21 Un kal laba his mishto an o baro rajeskre jaka un i jaka leskre pralstunendar. Un o baro rai kras jaake, har o Memukan penas. 22 Un bitchras lila an i tsele themma, kai lo baro rai his. Hako liil his jaake tchinlo, har an ko them tchinlo well, un an ko rakepen, har kote rakedo well, kai ko liil bitchedo was. Un an ko liil was penlo, te well hako romes an peskro kheer o penepaske, un te well an hako kheer ko rakepen rakedo, hoi o rom rakrella.b