13
I menshe, kai kek Israelitarja his, nai atchenn buder gar mank lende
1 Ap ko diwes draweran le dran o Moseskro liil glan i tsele menshende. Un jon hatsan, te hi an ko liil tchinlo: ‘Kek i menshendar Ammon, witar kek i menshendar Moab nai djiwenn o Debleskre menshentsa khetne, un kowa kek tsireske.’ 2 Glan i rah tsiro dan i Ammonarja un i Moabarja i Israelende kek maro un kek pani, har kolla ap o drom his. Un i Moabarja plaissran o Bileames, te rakrell lo i bibacht pral i Israelitarja win. Maro Dewel kras dran i bibacht i bacht.
3 Un har shunan i Israelitarja kanna kau tchinlo lab, rodan le lauter kolen win, kai wawar menshendar his un mank lende djiwan. Un kolla nai atchan gar buder pash lende.
O Debleskro kheer hunte atchell djudjo
4 Glan jek tsiro was o rashai Eljashib o pralstuno pral i chapangre khera pash o Debleskro kheer. Un jek leskre menshendar his o Tobija. 5 Koles das lo ko baro kheer, kai glan kowa o djob tchiddo his, hoi o Debleske chatchedo was, ninna o sungepaskro koowa un kol tsele koola, hoi i budjake koi his, un ninna o djob un i mool, un o djet, hoi o deshto kotar kolestar his, hoi ap i Israelengri phub bares was. Kowa lauter his i Levitarenge un i gipangrenge un kolenge, kai ap o foreskre wudja jak dan un ninna i rashajenge.
6 Har o Eljashib ko baro chapaskro kheer o Tobijaske das, te djiwell lo koi, homs me gar an o foro Jerusalem. An ko bersh, har o Artaxerxes an o 32. (trijanda-te-duito) bersh o baro rai pral Babilonia his, djom me pash leste pale. Pal i tsiro putchom lestar, te mukell lo man pale pale te djal an Jerusalem. 7 Un har wom pale an o foro Jerusalem, dikom me kowa, hoi kote glan djas, un hoi gar pal o tchatchepen his, hoi o Eljashib koi o Tobijaske kras, har lo leste ko chapaskro kheer das ap platsa glan o Debleskro kheer.
8 Un miri choli pral kowa his baro. Un me djom koi un witsrom ko tselo koowa, hoi o Tobijas his, dran o kheer win, 9 un penom soreles, te krenn le ko kheer djudjo, un ninna kol khera, kai pashel his. Un pal kowa anom pale ko tselo koowa, hoi i budjake an o Debleskro kheer hi, ninna o djob chatchepaske, un o sungepaskro koowa.
10 Un kote dikom ninna, te anan i Israelitarja gar i Levitarenge ko koowa, hoi len hunte dino wals. Doleske kran i Levitarja un i gipangre buder gar pengri budi an o Debleskro kheer, un nashan penge hakeno ap peskri kotar phub.
11 Kote tchingrom ap i tchatchepangre murshende un putchom: “Har nai well jaake dur, te well buder kek budi kerdo an o Debleskro kheer?” Un me mukom i Levitarjen un i gipangren pale pale te anell, un dom hakenes peskri budi!
12 Un i tsele menshe dran Juda anan pale o deshto kotar pengro djobestar un djetestar un pengri moljatar an kol chapangre khera. 13 Un me rodom murshen win, te wenn le i pralstune pral i chapangre khera. Kolla his o rashai, o Shelemja, un o tchinepaskro, kai lila tchinell, o Zadok, un o Levitari, o Pedaja. Kolenge ap i rig his tardo o Hanan, koleskro dad o Sakkur his, koleskro dad o Mattanja his. Kolla star his mursha o labestar. Kolenge was penlo, te denn le ko chapen ap pengre phralende.
14 Dik, hoi kai krom, miro Dewel! Ma biste ko latchepen, hoi krom ap tiro kheer, te well koi budi an leste mishto kerdo.
O Nehemia krell, te well o Debleskro diwes dren rikedo
15 An kol diwessa dikom me an o them Juda menshen, kai ap o Debleskro diwes molengre drake stakran, un wawar, kai anan djob un tchiwan les ap burike, ninna mool, drake, faige un wawar koowa, un anan kowa an o foro Jerusalem. Un me rikrom len pre un dom len trad, te bikrenn le kowa gar ap ko diwes. 16 An o foro Jerusalem djiwan ninna menshe dran Tirus. Kolla anan matchen un wawar koowa un bikran kowa ap o Debleskro diwes ap i menshende dran Juda. 17 Kote tchingrom ap i pralstunende an Juda un putchom lendar, hoi kowa te well. “Tumer lenn o Debleske leskro diwes krik”, penom me. “Ko diwes, kai leske kokres hi. 18 Kran kowa tumare phure gar ninna jaake, te anas maro Dewel koi bari bibacht pral mende un pral kau foro? Un tumer krenn i choli pral o Israel gomme bareder, doleske te budrenn tumer ap o Debleskro diwes.”
19 Un me penom, te wenn o foreskre wudja pandlo glan te was o Debleskro diwes, an ko tsiro har o kham tele djasa, un te wenn le gar pale pre kerdo glan ko tsiro, kai hi o Debleskro diwes trujel. Un me bitchrom murshen an o foreskre wudja, te denn le jak, te well kek koowa an o foro Jerusalem dren hadedo.
20 Kote atchan kol parepangre un bikepangre pengro koweha jek, dui kope win glan o foro Jerusalem pral i rat. 21 Un me dom len trad un penom ap lende: “Hoske atchenn tumer pral i rat win glan i massuri? Te krenn kowa gomme jek kopo, mukau tumen an o stilepen te witsrell.” Fun ko tsiro wan le gar buder ap o Debleskro diwes.
22 Un me penom ap i Levitarja, te krenn le pen djudjo o Debleske. Palle te wenn le pash o foreskre wudja un denn koi jak, te well o Debleskro diwes dren rikedo.
Ninna kawa biste mange gar, miro Dewel. Un dik latches ap mande an tiro baro kamlepen.
I Israelitarja hunte romedinerenn kekes, kai gar lengre menshendar hi
23 An ko tsiro dikom me bibolden, kai lan penge romjen dran o Filistarengro foro Ashdod, ninna dran i themma Ammon un Moab. 24 Un o paash kolengre tchawendar rakran ashdodikes un haiwan gar o biboldengro rakepen. Jon rakran o rakepen kol wawar menshendar. 25 Un me tchingrom kol murshentsa, praassom len, un dom ninna murshen lendar, un tserdom lengre balla win. Un krom, te denn le pen sowel pash o Debleste, te denn le kek pengre tchendar kol wawarengre tchawende, un lenn kek kolengre tchendar penge un pengre tchawenge. 26 “Djinenn gar”, penom, “te kras o baro rai Salomo sawo koowa un anas doosh ap peste? Un an bud wawar themma, his kek baro rai har job his. Un o Dewel kamas les jaake, te kras lo, te well lo rai pral o tselo them Israel. Ninna les anan peskre romja dran kol wawar themma jaake dur, te anas lo doosh ap peste! 27 Un kanna hunte shunap tumendar, te anenn sawi bari doosh ap tumende, un rikrenn tumen gar ap ko lab, hoi o Dewel das, un lenn tumenge romjen dran wawar themma!”
28 Un o tchawo o baro rashajestar Eljashib, o Jojada, koles his mursh tchawe, kolendar jek i romjat las, kolakro dad o Sanballat hi dran o foro Bet-Horon. Un koles tradom mandar krik!
29 Miro Dewel, ma biste, kai anan jon ladj ap o rashajeskri budi, un rikran pen gar ap ko lab, hoi tu i rashajentsa un i Levitarentsa win kral.
30 Un jaake krom me i Israelitarjen pale djudjo un erligo glan o Debleste, un las dran lende lauter krik, hoi dran o wi-them an lende dren was. Un penom lenge, koon i rashajendar un i Levitarendar hawi budi hunte krell, jaake te djinas hakeno, hoi te krell lo. 31 Un penom ninna, koon ap hawo tsiro o kasht hunte anell chatchepaske, un krom, te well o newo djob un i newe rukengre anlo.
Biste kowa mange gar, miro Dewel, un dik latches ap mande!