2
I Ester well i rani
1 Un pal ko koowa, har djas i choli o baro rajestar Ahasveros pale, djas leske an o shero trujel, hoi i Wasti kras, un hoi lah kerdo was. 2 Kote penan leskre budepangre ap leste: “Maro rai, pen, te wenn shukar terne tchen rodede, kolen kek murshestar an-tapedo wan. 3 Un bitche murshen an i tsele themma, kai baro rai hal, te anenn le i tsele shukar terne tchen kate an tiro sorelo kheer an o foro Susa, un kote an o djuwjengro kheer. Un de len an o wast ko pralstunestar, o Hegai, kai dell jak ap i djuwjende. Un job mukell lauter ap lende te krell, hoi i djuwjat shukar krell. 4 Palle le koi terni tchai, hoi an tire jaka i shukeder hi, te well li rani, har i Wasti glan late rani his.”
Un kol laba his mishto an i jaka o baro rajestar. Un job kras kowa jaake.
5 Un an o sorelo kheer an Susa djiwas i biboldo. Kowa kharas Mordekai. Leskro dad his o Jair, un leskro papo his o Shimi. Koleskro dad his o Kish. Kowa his i Benjaminari. 6 Leskri familja his mank kol menshende, kai pandlo wan, har lengro baro rai, ko baro rai pral o them Juda, o Jekonja, pandlo was. Un o baro rai pral o them Babilonia, o Nebukadnezar, mukas len an peskro them te anell.
7 Un pash o Mordekai djiwas i terni tchai, i Hadassa, kai ninna Ester kharedo was. Joi his leskro kakeskri tchai, un lat his buder kek dad un kek dai. Un joi his i shukar un raili tchai. Un har lakro dad un lakri dai meras, las o Mordekai lat pash peste un was lake har lakro dad. 8 Har kanna kol laba o baro rajestar trujel djan, wan bud tcha anlo an o sorelo kheer an o foro Susa. Un ninna i Ester his mank lende un was an o djuwjengro kheer anlo, un an o wast ko murshestar Hegai dino, kai dell jak ap o djuwjengro kheer. 9 Un joi his shukar an koleskre jaka, un las jaake leskro latchepen. Un job dikas koi pre, te lell li sik kutch makepaskro djet un sasto chapen, hoi i djuwjat shukar krell. Un job das lat efta wi-rodede djuwjen, te wenn le lake koi. Un anas lat un lakre budepaskretse an i feteder iseme an o djuwjengro kheer.
10 Glan kowa penas o Mordekai ap i Ester, te penell li gar, dran hawo them un hawe menshendar joi hi. Jaake penas i Ester tchi kolestar. 11 Un o Mordekai djas hako diwes glan ko djuwjengro kheer pre te tele, te nai hatsell lo win, har i Esterake djal, un hoi jon lah krenn.
12 Jek bersh rah was haki tchai shukar kerdo ko diweske, kai djal li pash o baro rajeste dren: shob tchonna was li dren maklo o djeteha, kai Myrrhe dren hi, un pale shob tchonna o djeteha, kai Balsam dren hi un wawar kutch sungepaskro koweha. 13 Un palle djas jek tchai pal i wawar pash o baro rajeste dren. Un lauter, hoi kamas li peha te lell, hunte was lat dino. Un joi was dran o djuwjengro kheer an o baro rajeskro kheer anlo. 14 Ap i rat djas li dren un taissarlake djas li palle an i wawar djuwjengro kheer, tel i wasta ko pralstunestar, kai kharas Shaashgas. Kowa das ap kol djuwjende jak, kai o baro rajeskre wawar djuwjaa his. Un kek kol djuwjendar was i duito kopo pash o baro rajeste, kokres kolla, kai his shukar an leskre jaka, un kolen job mukas pash pengro lab te kharell.
15 Ko tsiro was, te djal i Ester pash o baro rajeste. Lakro dad his o Abichajil un lakro kako o Mordekai, kai lat pash peste las, har well li leskri tchai. Un joi kamas tchi budeder peha te lell, har o Hegai, ko pralstuno pral i djuwjende, lake penas. Un an i jaka lauterendar, kai dikan lat, his li shukar. 16 Un jaake was i Ester pash o baro rajeste Ahasveros an leskro rajeskro kheer anlo. Un kowa his an o deshto tchon, har job an o eftato bersh o baro rai his. Kau tchon kharas Tebet.
17 Un o baro rai kamas lat budeder har i tsele wawar djuwjen. An leskre jaka his li shukeder un feteder har haki wawar terni tchai. Un job tchiwas ko shereskro sonakai ap lakro shero, hoi i rani hidjrell. Un kras latar i newi rani, jaake har i Wasti glan late his. 18 Un o baro rai kras i baro chapen i tsele rajenge un pralstunenge, te well i Ester hadedo. Un i tsele themenge mukas lo lowe palla, hoi jon leste hunte dans. Un mukas djob tchitcheske win te dell, jaake har bare raja krenna.
O Mordekai hatsell i phukepen win
19 His an ko tsiro, har i duito kopo terne tcha khetne anlo wan o baro rajeske. Koi his o Mordekai beshdo an o baro wudar glan o baro rajeskro kheer. 20 I Ester shunas ap o Mordekai jaake har an ko tsiro, har joi gomme pash leste his. Un jaake har lo lake penas, penas li gar dran hawo them un hawe menshendar joi hi.
21 An kol diwessa har o Mordekai an ko baro wudar glan o baro rajeskro kheer beshdo his, wan dui budepangre an i bari choli. Kolla dan jak ap i wudja un kharan Bigtan un Teresh. Un jon lan penge glan, te denn le o baro rajes Ahasveros mulo.
22 Un ko koowa shunas o Mordekai un penas les ap i rani Ester, un penas lake ninna, te penell li les o baro rajeske dureder. Un i Ester kras kowa. 23 Un har dikan le palla, was win, te his kowa tchatcho. Un kol dui wan ap o kasht bladedob. Un o baro rai mukas kau koowa dren te tchinell an o bershengro liil o themestar.