3
O Haman kamell i bibolden te marell
1 Pal i tsiro hadas o baro rai Ahasveros i murshes pral i tsele pralstunende, kai pash leste hi. Ko mursh kharas Haman. Leskro dad his o Hammedata i menshendar Agag. 2 Un o baro rai penas, te djan i tsele pralstune, kai an o baro wudar glan leskro kheer hi, ap i phub glan o Haman un parkrenna les. Un jaake kran le. Kokres o Mordekai kamas gar, un djas gar glan leste tele ap i phub.
3 Kote putchan lestar i wawar pralstune, kai an o wudar glan o baro rajeskro kheer his: “Hoske kreh tu kowa gar, hoi o baro rai penas?” 4 Un jaake putchan le les hako diwes. Un job penas lenge: “Me hom i biboldo un nai witsrau man gar tele glan o Haman.” Un har job gar ap lende shunas, djan le koi un penan kowa o Hamaneske. Jon kaman te dikell, hoi o Haman penell, te djinals lo, hoi o Mordekai kras.
5 Un har o Haman dikas, te witsrell o Mordekai pes gar glan leste tele, tapras les i bari choli. 6 An leskre jaka his kowa gar doha, te taprell lo peske o Mordekai kokres. Job kamas ninna leskre menshen te marell. Har shunas lo, kai o Mordekai i biboldo hi, rodas lo, har nai marell lo i tsele bibolden, kai djiwenn an kol themma, kai o Ahasveros o baro rai hi.
7 Un an o ersto tchon, kowa hi o tchon Nisan, an o deesh-te-duito bersh ko baro rajestar Ahasveros, mukas o Haman peske tikne barra te witsrell, hoi kharenna ‘Purim’, te hatsell lo win, hawo diwes an hawo tchon ko feteder hi, te krell lo, hoi lo peske glan las. Un kol tikne barra Purim peran ap o deesh-te-triinto diwes un ap o deesh-te-duito tchon. Kowa hi o tchon Adar.
8 Koi pal penas o Haman ap o baro rajeste Ahasveros: “Kate denna menshe, kai djiwenn penge kokres mank i tsele wawar menshende kate te kote an tire tsele themma. Un len hi i wawar tchatchepen har i tsele wawar menshen. Un ap kowa, hoi tu, baro rai, peneh, te well kerdo, shunenn le gar. Kowa hi gar mishto tuke, te mukess len jaake dureder te krell. 9 Miro rai, te kameh, muk i liil te tchinell, kai dren tardo hi, te wenn le maredo. Un me dau deesh-serja kotar rup an i wasta i pralstunendar pral o rajeskro brawlepen.”
10 O baro rai las peskri gustri o gushto tele. Un das koi gustri an o Hamaneskro wast, kai kamas i bibolden te marell. Koleskro dad his o Hammedata kol menshendar Agag. 11 Un o baro rai penas ap o Haman: “O rup nai rikreh, ninna wenn tuke kol menshe dino, te nai kress lentsa hoi tu kameh.”
12 Ap o 13. (deesh-te-triinto) diwes an o ersto tchon wan kol mursha kharedo, kai o baro rajeskre lila tchinenn. Un kolla tchinan, hoi o Haman lenge penas, an lila ap i pralstunende ko themestar, ap i themeskre rajende un i pralstunende pral hako them. Hako liil his jaake tchinlo, har an ko them tchinlo was, un an ko rakepen, har kote rakedo was. An o lab o baro rajestar Ahasveros wan kol lila tchinlo. Un leskri gustjah was leskro sikepen tel hako liil tchiddo. 13 Koi dren his tchinlo:
I tsele bibolde hunte wenn maredo, terne un phure, ninna i tchawe un djuwja, te atchell kek lendar buder djido. Un kowa te well ap jek diwes, ap o deesh-te-triinto diwes an o deesh-te-duito tchon. Kowa hi o tchon Adar. Un i biboldengro koowa nai lell hakeno peske.
Un naashepangre wan kharedo, un lenge was penlo, te anenn le kol lila an i tsele themma, kai o Ahasveros baro rai hi.
14 Un o baro rai penas ninna, te hunte wenn kal tchinle laba prindjedo kerdo an hako them, jaake te rikrenn pen i menshe kote ap lende, un djinenn, hoi te krenn le, te well ko diwes. 15 Un kol naashepangre djan sik win, jaake har o baro rai penas. Un an o sorelo kheer an o foro Susa was ko liil kote ap i kasht dino, kai nai dikell les hakeno. Un o baro rai un o Haman beshan pen tele, te chan un pijenn le. O tselo fores Susa tapras i daar.