19
O Hiobeskro pantchto rakepen
1 Un o Hiob penas koi pre:
2 Har rah kamenn tumer mange miro dji te phagell,
un man tumare labentsa paash te krell?
3 Deesh kope praassan man kanna, un ladjenn tumen gar, te dukrenn man.
4 Ninna te wals man tchatchepah gar tchatches,
wals kowa miro koowa.
5 Tchatchepah, tumer patsenn, te han feteder har me,
un kamenn mange te sikrell, te hi miri doosh, hoi anas man an i ladj!
6 Dikenn tumer gar dren,
te hi kowa o Dewel, kai djas gar mishto mantsa trujel?
Hi jaake, har te taprals lo man an i netsa.
7 Te dau win gole ‘Awenn ap miri rig’,
shunell man kek.
Ninna te dau soreles gole,
dell kek man miro tchatchepen.
8 Ap miro drom tchiwas lo jaake bud barra,
te nai djau gar pral wergel.
Un job mukell man an o kalepen miro drom te hatsell.
9 Job las miro tselo brawlepen mandar,
ninna miro an-dikepen pash i menshende.
10 Job dell man khetne haki rigjatar,
sik hom gar buder.
Job kras, te patsap buder gar ap o latchepen, te dell lo man kowa.
11 Un peskri choli mukas lo pral mande pre chatchell,
un rikrell man har sawo mursheske,
kai kamell leske tchilatchepen te krell.
12 Hi jaake, har te bitchrals job peskre lurden, te djan le ap mande.
Jon kran penge i drom pash mande,
un tchiwan pen pre trul miro kheer.
13 Job rikras mire phralen dur mandar krik.
Un kolen, kai me latches prindjrom,
krenn jaake, har prindjrans le man gar.
14 Mire menshe wenn gar pash mande,
un mire mala bistran man.
15 Kolla, kai mantsa an miro kheer djiwenn
un kol djuwja, kai mange budrenn,
an lengre jaka hom har i wi-themari,
har jek, koles prindjrenn jon gar.
16 Te dau gole ap miro budepaskro,
shunell lo gar,
ninna te mangap les sorjah.
17 Miro ducho dran miro mui khandell jaake,
te rissrell pes miri romni mandar krik.
Ninna mire phralengea hom i khand.
18 Ninna i tchawenge hom tchi moldo.
Te kamau me pre te stell,
sanenn le pral mande.
19 Mire latche mala dikenn tele ap mande.
Un kolen, kai me o djijestar kamom,
sikrenn mange o dumo.
20 Mire mussja un herja hi sane har kashta.
nashrom halauter, kokres miro djipen atchas.
21 Mire mala, krenn tumare djia mange pre! Awenn mange latches!
O Debleskro wast das man!
22 Hoske lenn tumer man palla
har o Dewel kowa krell?
Kran tumer mange gomme gar doha duka?
23 Kamoms, te wans mire laba an i liil tchinlo,
te wenn le gar bistedo.
24 Kamoms, te wenn le i sasteha dino an i baro bar,
te atchenn le hako tsireske!
25 Me djinau, te djiwell o Dewel,
kowa, kai miro koowa an peskro wast lell.
Un an o tsillo, kai o tchatchepen win rakedo well pral kai phub,
hi job miro rakepaskro.
26 Ninna te hi miro mass jaake dukedo
un wom jaake sano,
well ko tsiro, kai dikau miro Debles.
27 Awa, dikau les mire jakentsa.
Un job hi mange kek, kai prindjrau gar.
Miro dji nashell leste palla.
28 Te putchenn tumendar:
“Har nai lah les palla?
Hawo koowa nai anah ap leste pre?”
29 Palle darenn tumen o charestar!
Jek, kai sawi doosh ap peste anell,
pral leste well o charo.
Palle djinenn tumer,
te hi o Dewel o tchatchepaskro mursh.