35
O Josia rikrell o festo, hoi kharell Passa
1 Un o Josia kras an o foro Jerusalem ko festo, hoi kharell Passa, te sharenn le o baro Debles. Ap o 14. (deesh-te-starto) diwes an o ersto tchon maran le i terne bakre, te chan le len ap ko festo.
2 Un job das i rashajende pengri budi, un rakras kamles lentsa, te krenn le pengri budi mishto an o baro Debleskro kheer. 3 Un job penas ap i Levitarja, kai o baro Debleske koi his, un i tsele menshende an Israel leskro drom sikran: “Anenn o Debleskro mochton, kai o Debleskre deesh laba dren hi, an o Debleskro kheer, hoi mukas o Davideskro tchawo, o Salomo, ko rai pral Israel, te krell. Tumer hunte hidjrenn les buder gar ap tumare phika. Kanna budrenn tumer kate an o kheer tumaro baro Debleske un leskre menshenge Israel. 4 Awenn pash i budi jaake, har tumer pal tumare familje khetne tchiddo han, te krenn kowa, hoi o baro rai, o David, un leskro tchawo, o Salomo, tumenge glan tchinan. 5 Tchiwenn tumen jaake khetne tardo an o Debleskro kheer, te djinenn kol familje dran Juda un Israel pash koneste jon hunte djan: jek gruppa tumendar budrell fer jek gruppa lendar, jaake har jon khetne tchiddo hi pal lengre familje. 6 Te wenn jon pengre bakrentsa, marenn tumer kol terne bakre o chapaske Passa! Krenn tumen djudjo o Debleske! Un krenn o masseha jaake, har glan tchinlo hi, te nai krenn tumare phrala halauter jaake, har o baro Dewel o Moseske penas.”
7 Un o Josia das i menshende, kai kote khetne his, peskre bakrendar un busjendar 30.000 (trijanda-serja) te wenn le maredo o chapaske Passa, un koi pashel 3.000 (triin-serja) grumja. 8 Un i pralstune an leskro them dan pendar kokres viechen i menshenge un i rashajenge un i Levitarenge. I pralstune pral o Debleskro kheer, kolla his o Hilkija, o Secharja un o Jehijel, jon dan i rashajende ko chapaske Passa 2.600 (dui serja-shob-sheel) tikne bakre un tikne busja, koi pashel 300 (triin-sheel) grumja. 9 O Konanja un leskre phrala, o Shemaja un o Netanel, khetne kol pralstunentsa pral i Levitarja, kolla his o Hashabja, o Jehijel un o Josabad, jon dan i Levitarjen 5.000 (pantch-serja) tikne bakre un tikne busja ko chapaske Passa, un koi pashel 500 (pantch-sheel) grumja.
10 Un jaake was halauter kerdo o chapaske Passa. Un i rashaja his ap pengre platse tardo, un i Levitarja his jaake khetne tardo, har le khetne budrenn, un har les o baro rai penas. 11 Un jon maran i terne bakre, dan o rat i rashajende, un kolla witsran les trul i chatchepaskri. Un i Levitarja tserdan i hauta tele. 12 Un i Levitarja tchiwan ko mass kol viechendar, hoi wan tseles chatchedo, ap i rig, te denn le les hake bare familjende, te nai anenn jon les glan o baro Debleste, jaake har tchinlo hi an o Moseskro liil. Kowa kran le ninna i grumjentsa. 13 Un jaake har kerdo was, pekan le kol bakre o chapaske Passa ap i jag. Un ko wawar mass, hoi o Debleske dino was, keran le an pirja, pfanne un tchare, un anan les sik pash i tsele menshende. 14 Un koi pal kran i Levitarja o chapen penge un i rashajenge; i rashajen dran o kheer Aron his jaake bud budi kol tsele viechentsa, hoi wan tseles chatchedo un ko thulepah, hoi was chatchedo, te kran i Levitarja penge un i rashajenge ko chapen.
15 Un i gipangre dran o kheer Asaf atchan ap penge platse tardo. Jaake penas kowa o David un o Asaf un o Heman un o Jedutun, kowa his o baro rajeskro dikepaskro. Ninna kol mursha, kai dan garda ap i tsele wudja, mukan gar pengre platse. Un i Levitarja kran ninna lenge o chapen.
16 Un jaake was ap ko diwes halauter kerdo, te sharenn le o baro Debles. Jon chan o chapen Passa un anan o baro Debleske wawar viechen, hoi wan tseles chatchedo ap leskri chatchepaskri, jaake har kowa o baro rai Josia kamas un penas. 17 Un i Israelitarja, kai an ko tsiro khetne wan, kran o festo Passa, un rikran pal kowa kol efta bare diwessa, kai chan le maro, kai kek shutlo jarro dren hi.
18 Un pal ko tsiro, kai o Debleskro rakepaskro, o Samuel, djiwas, rikras kek baro rai an Israel ko festo Passa jaake, har o Josia les kanna rikras khetne kol rashajentsa, Levitarja un i tsele menshentsa dran o them Juda un kolentsa, kai dran Israel wan, un kolentsa, kai an Jerusalem djiwan. 19 Kau festo Passa was rikedo, har o Josia an o 18. (deesh-te-ochtato) bersh o baro rai his.
O Josia merella
20 Pal ko tsiro, kai o Josia o baro Debleskro kheer djudjes kras, djas o Necho, ko baro rai pral o them Egiptia, win peskre lurdentsa, te kurell lo pes o foreha Karkemish, hoi pash o pani Eufrat tchiddo hi. Un o Josia djas win leske an o drom. 21 Un o Necho bitchras murshen pash leste un mukas leske te penell: “Tu rai pral Juda, miro kurepen kate hi gar tiro koowa! Gar tuha kamah men te kurell. Me kamau man ko rajeha pral o them Babilonia te kurell, koleha me an o kurepen tardo hom. Un o Dewel penas, te krap sik. Job hi mantsa, doleske tchip tut leske gar an o drom, te marell lo tut gar!”
22 Un o Josia mukas gar tele leste un kamas pes leha te kurell, un shunas gar ap kowa, hoi o Necho penas, ninna te was kowa o Deblestar. Un o Josia was, te kurell lo pes leha an o telstuno them, hoi kharell Megiddo. 23 Un i kurepangre pengre bogentsa dan ap o rajeste Josia karje. Un o baro rai Josia penas ap kol murshende, kai trul leste his: Anenn man kate krik, me wom phares an-karedino! 24 Un leskre mursha hadan les leskro wurdin tele, tchiwan les ap i wawar wurdin, un anan les an o foro Jerusalem. Un job meras un was paskedo an o mulengro kheer, kai peskre phure paskedo his. Un i menshe an o tselo them Juda un an o foro Jerusalem rowan pral o Josia.
25 Un o Jeremia giwas i ropaskri gili pral o Josia. Un i tsele gipangre, mursha har djuwja, giwan ropangre gilja pral o Josia bis ap kau diwes. Jaake well kowa gomme kau diwes kerdo an Israel. Kal tsele gilja hi tele tchinlo an o liil, hoi kharell: Ropangre gilja.