29
O Hiskija hi o baro rai pral o them Juda
1 O Hiskija his 25 (biish-te-pantch) bersha, har lo baro rai was; un 29 (biish-te-enja) bersha his lo baro rai, un djiwas an kau tsiro an o foro Jerusalem. Leskri dai kharas Abi, lakro dad his o Secharja. 2 Un job kras, hoi glan o baro Debleskre jaka mishto hi, har leskro phuro dad, o David, ninna kras.
3 An o ersto bersh, har lo baro rai his, an o ersto tchon kras job i wudja an o baro Debleskro kheer pale pre, un mukas len kote, kai his le paash, newes te krell. 4 Un job mukas i rashajen un i Levitarjen khetne te well ap koi platsa pash o Debleskro kheer, hoi ap i rig his, kai o kham pre djala. 5 Un penas ap lende:
“Murshale dran o kheer Levi, shunenn mire laba! Krenn tumen kanna djudjo o baro Debleske, un krenn leskro kheer pale djudjo leske, kai o Dewel tumare phurendar hi! Un witsrenn ko tselo koowa win, hoi kras kau kheer pale-tchiddo. 6 Mare phure mukan o baro Debleskro drom, un kran, hoi glan i jaka maro Deblestar gar mishto hi, un djiwan buder gar leha, un sikran leske un leskro khereske o dumo. 7 Un jon pandan i wudja glan i glanstuni halla, un mukan i momlia win te djal, un chatchran kek sungepaskro koowa, witar kek viechen, o Debleske pral Israel. 8 Doleske was i choli o baro Deblestar pral o them Juda un o foro Jerusalem. Un job mukas mentsa sawo koowa te krell, te atchell kol wawar menshenge, kai kowa dikenn, o rakepen krik i trashatar, un jon rissrenn pengre jaka krik. Un mer wam lenge sapaske, har tumer tumare jakentsa dikenna. 9 Mare dada wan o chareha maredo, un i djuwja un tchawe un tcha wan pandles an i wawar themma anlo.
10 Kanna hi man an o shero, te pandap man ap o baro Debleste, ko Dewel pral o Israel, te djal peske leskri choli mendar, hoi jaake sorelo ap mende tchiddo hi. 11 Tumer, kai han har mire tchawe, ma nashrenn kek tsiro! Djan ap tumari budi! Tumer han kolla, kai o baro Dewel wi-rodas, te wenn glan leste tardo un budrenn leske un anenn leske viechen un sungepaskro koowa.”
12 Kote stan kal Levitarja glan:
dran o kheer Kohat: o Machat, koleskro dad o Amasai his, un o Joel, koleskro dad o Asarja his;
dran o kheer Merari: o Kish, koleskro dad o Abdi his, un o Asarja, koleskro dad o Jehallelel his;
un dran o kheer Gershon: o Joach, koleskro dad o Simma his, un o Eden, koleskro dad o Joach his;
13 dran o kheer Elizafan: o Shimri un o Jehijel;
dran o kheer Asaf: o Secharja un o Mattanja;
14 dran o kheer Heman: o Jehijel un o Shimi;
dran o kheer Jedutun: o Shemaja un o Usijel.
15 Un jon dan pengre phralen khetne gole, un kran pen djudjo o Debleske, un djan an o baro Debleskro kheer, te krenn le les djudjo, jaake har o baro rai les lenge penas, un o baro Dewel les kamas. 16 Un i rashaja djan an o baro Debleskro kheer dren, te krenn le les djudjo, un anan ko tselo koowa, hoi pale-tchiddo his, win ap i glanstuni platsa. Un kote lan i Levitarja kowa un anan les win pash o pani Kidron.
17 I rashaja un i Levitarja kran pen ap i budi ap o ersto diwes an o ersto tchon, te krenn le o Debleskro kheer djudjo. Un ap o ochtato diwes an o ersto tchon wan jon an i glanstuni halla, un budran wawar ochta diwessa. Ap o deesh-te-shobto diwes his koi tseli budi kerdo. 18 Un jon djan pash o baro rajeste, o Hiskija, un penan: “Mer kram o tselo kheer o baro Deblestar djudjo, ninna i sasterni chatchepaskria un i chapaskri o Debleskre marenge, un i tsele koola har pirja, roja, tchare un khore. 19 Ninna kol tsele wawar tchare, pirja un wawar koowa, hoi o Ahas win witsras, har job o baro rai his, un o baro Debleskro dromestar tele djas, kowa halauter anam mer pale, un kram les djudjo, un tchiwam les glan i chatchepaskri.”
O baro Dewel well pale an-mangedo an peskro kheer
20 Un o baro rai Hiskija stas taissarlake sik pre un mukas i pralstunen dran o foro khetne te well, un djas lentsa pral pash o baro Debleskro kheer. 21 Un jon anan efta terne gurmab, un efta mursh bakre un efta terne bakre un efta mursh busja, te marenn un chatchrenn le len o baro Debleske, te nai well i doosh krik lino o rajeskro kherestar, un o Debleskro kherestar un i tsele menshendar an o them Juda. Un o Hiskija penas ap i rashajende dran o kheer Aron, te chatchrenn le i viechen ap i chatchepaskri o baro Debleske. 22 Un jon maran kol grumja, un i rashaja lan o rat un witsran les ap koi chatchepaskri. Palle maran le i mursh bakre, un palle i terne bakre, un hako kopo witsran le lengro rat ap i chatchepaskri. 23 Un palle anan le i busja glan o baro rajeste un glan kol Israelitarja, kai pashel his. Kolla tchiwan pengre wasta ap lengre sherja. 24 Palle maran i rashaja kol busja, un witsran lengro rat ap i chatchepaskri, te well i doosh i Israelendar krik lino. Kowa kran le jaake, har lenge o baro rai penas: te marenn le viechen, kai tseles chatchedo wenn un wawar, te well i doosh i tsele Israelendar krik lino.
25 Un job penas, te tchiwenn pen i Levitarja pre an o baro Debleskro kheer un lenn pengre bashepangre an o wast: kol zimbale, harfe un wawar dorjengre bashepangre. Jaake penas les o David, har leske penlo was, kai o baro Dewel kowa jaake kamell. Kowa penan leske o dikepaskro, o Gad, un o Debleskro rakepaskro, o Natan.
26 Un i Levitarja his koi tardo. Un kol bashepangre, hoi o David kras, his an lengre wasta. Un i rashaja his koi tardo, un len his phurdepangre an o wast.
27 Un o Hiskija penas, te anenn le kanna i marede vieche, kai o Debleske tseles chatchedo wenna, un tchiwenn len ap i chatchepaskri. Un an ko tsiro, kai o mass chatchedo was, giwan i Levitarja o baro Debleske, un i phurdepangre phurdan an pengre bashepangre. Un ninna was bashedo ap i wawar bashepangre, hoi kras o David, ko baro rai pral Israel.
28 Un i tsele menshe mangan o baro Debles an, i gipangre giwan un i bashepangre bashran. Un kowa djas jaake rah, bis ko tselo mass chatchedo his. 29 Har halauter kerdo was, djan o baro rai, un halauter, kai pash leste his, ap i tchanga, un mangan o baro Debles an.
30 Un o Hiskija un i pralstune penan ap i Levitarja, te sharenn le o baro Debles kol giljentsa, hoi kras o David un o dikepaskro, o Asaf. Un jon giwan bachteles, un witsran pen ap i phub un mangan o baro Debles an.
31 Palle penas o Hiskija ap i menshende: “Kanna han djudjo o baro Debleske. Awenn un anenn tumare viechen, kolentsa parkrenn tumen pash o baro Debleste!” Un jon anan viechen, te parkrenn le pen pash leste. Un hakeno, kai kamas budeder te dell, anas sawe viechen, kai wan tseles chatchedo o baro Debleske. 32 Khetne his kolla 70 (efta-deesh) grumja, 100 (sheel) mursh bakre un 200 (dui-sheel) terne bakre. Jaake bud vieche wan tseles chatchedo o baro Debleske. 33 Koi pashel wan 600 grumja un 3.000 bakre anlo, te wenn le maredo o Debleske. Lengro mass chan i menshe. 34 Kote his gar doha rashaja, te tserdenn le i hauta kol tsele marede viechendar tele. Doleske wan lenge lengre phrala, kol Levitarja, pash o wast, bis te i tseli budi kerdo his, un budeder rashaja pen djudjo kran o baro Debleske. [I Levitarja his sikeder koi pashel, te krenn le pen djudjo o Debleske har i rashaja.] 35 Koi his bud budi kol tsele viechentsa, kai wan tseles chatchedo. Ninna hunte was o thulepen chatchedo kol wawar viechendar, kolengro mass i menshe chan. Un mool hunte was wi-tchoredo pash ko mass kol viechendar, kai wan tseles chatchedo.