28
O Ahas hi o baro rai pral o them Juda
1 O Ahas his biish bersh, har lo baro rai was. Un 16 (deesh-te-shob) bersh his lo baro rai an o foro Jerusalem. Leskro phuro dad, o David kras, hoi glan o baro Debleskre jaka mishto hi. Kowa kras o Ahas gar. 2 Na-a, job djas ap kol dromma, kai kol bare raja dran o them Israel ninna djan. Koi pashel kras lo figurea, hoi o chocheno debles Baal sikran, 3 un chatchras sungepaskro koowa an i tala, hoi kharell Ben-Hinnom. Ninna chatchras lo peskre tchawen i chochene deblenge. Jaake kras lo sawo djungelo koowa, har i menshe an wawar themma kran, – sawe menshe har kolla, kai o baro Dewel glan i Israelende dran o them tradas. 4 Un job chatchras viechen un sungepaskro koowa i chochene deblenge ap kol mulne platseb ap i berge un tel hako senelo ruk.
5 Doleske das les leskro baro Dewel an o wast o baro rajestar pral o them Syria. Kol Syrarja dan i lurden dran Juda khetne, un lan bud lendar pandles, un anan len an pengro foro Damaskus.
Ninna i lurde dran Israel kuran pen i lurdentsa dran Juda, un wan i sorleder un maran bud lendar. 6 O Israelengro baro rai – leskro lab his Pekach, leskro dad his o Remalja – job peskre lurdentsa maras ap jek diwes 120.000 (sheel-te-biish-serja) kurepangre an o them Juda. Kowa his i phagi doleske, kai mukan jon o baro Debles, ko Dewel lengre phurendar.
7 Un o Sichri, i kurepaskro lurdo dran o them Efrajim, maras o baro rajeskro tchawes, leskro lab his Maaseja. Ninna maras lo o pralstunes pral o rajeskro kheer, leskro lab his Asrikam. Un kowa, koles his penepaske pal o baro rajeste, leskro lab his Elkana, koles maras o Sichri ninna. 8 Un kol lurde dran o them Israel lan pengre phralendar dran o them Juda 200.000 (dui-sheel-serja) djuwja, tchawe un tcha pandles pentsa. Koi pashel lan le bud kutch koowa lendar, un anan len an o foro Samaria.
O Debleskro rakepaskro, o Obed, rakrell i tchatcho lab
9 Kote djiwas i Debleskro rakepaskro. Leskro lab his Obed. Kowa djas win un stakras kol lurdenge an o drom, kai wan pale an o foro Samaria, un penas ap lende: “O baro Dewel, ko Dewel tumare phurendar, his chojedo pral i menshende an o them Juda. Doleske das job len an tumare wasta. Tumer dan len i bari choljah jaake khetne, kai lengre golja an o bolepen shunlo wan. 10 Un kanna kamenn tumer ninna kol pandlen dran o them Juda un o foro Jerusalem tel tumare pire te tchiwell, te wenn le tumare budepangre. Patsenn tumer, kai anenn kau koweha kek doosh ap tumende glan tumaro baro Debleste? 11 Shunenn kanna ap mande! Kal pandle hi tumare phrala un phenja. Mukenn len pale khere te djal! Djinenn, kanna hi o baro Debles ap tumende i bari soreli choli.”
12 Ninna star mursha dran o them Efrajim, kai his pralstune pral bare familje, kolla stakran kol lurdenge an o drom, kai dran o kurepen wan. Kal star his: o Asarja, koleskro dad o Johanan his, o Berechja, koleskro dad o Meshillemot his, o Jehiskia, koleskro dad o Shallum his, un o Amasa, koleskro dad o Hadlai his. 13 Un jon penan ap lende: “Ma anenn kol pandlen kate pash mende! Te krenn kowa, anenn tumer i doosh pral mende glan o baro Debleste, un krenn, te well mari doosh gomme bareder har li hi. Doha doosh anam pral mende. Un o baro Debles hi i bari soreli choli ap Israel.”
14 Kote mukan i lurde kol pandlen te djal, un dan len lengro kutch koowa pale. Un kol pralstune un i tsele menshe, kai kote his, dikan kowa. 15 Un kol mursha, kolengre laba kharedo wan, jon dikan pal kol pandlende un dan kolende, kai tchi an-ripaske his, koola un kircha dran ko koowa, hoi i lurde lenge krik lan. Ninna dan le len te chal un te pijell. Un kolenge, kai dukedo his, tchiwan le djet ap lengro dukepen. Un hakenes, kai nai nashas buder gar, beshan le ap i burikac, un anan len pash pengre menshende an o foro Jericho. Kau foro hi ninna kharedo ‘Palmtikro foro’. Palle djan i mursha dran Israel pale khere an o foro Samaria.
Budeder kurepen, hoi o Ahas nashras
16-17 An ko tsiro peran i Edomarja pale an o them Juda dren, kuran pen i menshentsa koi un lan bud lendar pandles pentsa krik. Jaake bitchras o baro rai Ahas murshen pash o baro rajeste an o them Assur, te well job leske ap i rig. 18 Ninna i Filistarja peran an i forja an o them Juda dren – an kol forja, kai hi an o bergetikro them un an o mulo them Negev. Un jon lan penge kal forja: Bet-Shemesh, Ajalon, Gederot un Socho un i tsele gaba koi trujel, un Timna un i tsele gaba koi trujel, un Gimso un i tsele gaba koi trujel, un jon djiwan kote. 19 Sawi phagi mukas o baro Dewel pral i menshende an o them Juda te well doleske, kai mukas lengro baro rai, o Ahas, o baro Debles, un kai mukas lo i menshen an peskro them bipandles te well.
20 Palle was o baro rai pral o them Assur – leskro lab his Tiglat-Pileser – job was gar o Ahaseske ap i rig – na-a, job kras leske o djipen phares. 21 Un o Ahas las bud kutch koowa dran o baro Debleskro kheer un dran o baro rajeskro kheer un dran i khera kol pralstunendar, un das les o baro rajeste dran o them Assur. Ninna te kras lo kowa, was leske kawa gar ap i rig.
22 Ninna te his ko tsiro jaake pharo o baro rajeske Ahas, anas lo i budeder doosh ap peste glan o baro Debleste. 23 Job chatchras viechen glan i chochene debla dran o foro Damaskus, ninna te dan i lurde dran Damaskus leskre lurden khetne. Job penas: “Kal debla wan i bare rajenge pral o them Syria ap i rig; doleske anau len viechen, te wenn le mange ninna ap i rig.” Kolla anan les un i tsele menshen an leskro them an i bari bibacht. 24 Un o Ahas anas kol koola khetne, kolentsa budran le an o Debleskro kheer, un das len an kotja, un pandas i wudja an o baro Debleskro kheer, un tchiwas peske chatchepangred pre an haki platsa an o foro Jerusalem. 25 Ninna an hako wawar foro an o them Juda mukas lo mulne platse te krell, te well sungepaskro koowa i chochene deblenge chatchedo. Un jaake kras lo, te was o baro Dewel, ko Dewel leskre phurendar, chojedo.
26 Kowa, hoi budeder pral o Ahas penepaske hi, fun ko tsiro, har lo baro rai was, bis te meras lo, kowa hi tchinlo an o liil i bare rajendar pral Juda un Israel. 27 Un o Ahas meras. Ninna te paskran le les an o foro Jerusalem, tchiwan le les gar an o mulengro kheer, kai i bare raja pral Israel tchiddo hi. Un leskro tchawo, o Hiskija, was baro rai pal leste.